1. ¿Imaynatá Pablo qhawaj Diospaj sinchʼita trabajajkunata?

APÓSTOL Pabloqa Diospaj sinchʼita trabajajkunamanta yuyarikojpuni, chayrayku nerqa: “Mana saykʼuspa yuyarikuykupuni creesqaykichejpa ruwasqanmanta, munakuywan sinchʼita trabajasqaykichejmanta, Señorninchej Jesucristopi pacienciawan suyakusqaykichejmanta ima”, nispa (1 Tes. 1:3). Jehovapis llajtanpi tukuy sonqo yanapakojkunamanta mana qonqapunchu, ashkhata chayri pisita ruwajtinkupis (Heb. 6:10).

2. ¿Imatá kay yachaqanapi yachakusun?

² Kunanpis ñaupa tiempopi jinallataj, ashkha hermanos Diospaj astawan llankʼanankupaj ima ruwanankutapis saqenku. Kay yachaqanapeqa yachakusun ñaupa tiempo cristianosmanta, kunan tiempo cristianosmanta, ima ruwaykunapichus paykuna astawan yanapakusqankumanta, paykunamantataj yuyarikunapuni kasqanta ima.

3, 4. 1) ¿Imaynasmantá ñaupa tiempomanta cristianos Diospa llajtanpi yanapakorqanku? 2) ¿Imaynatá hermanos paykunata yanaparqanku?

³ Jesusqa bautizakuytawan willayta qallarerqa, chay willaytaj tukuynejman chayanan karqa (Luc. 3:21-23; 4:14, 15, 43). Pay wañupojtintaj apostolesnin willayta ñaupajman aparqanku  (Hech. 5:42; 6:7). Wakin cristianosqa misioneros jina Palestinapi willamorqanku, chaykunamanta ujnintaj Felipe karqa (Hech. 8:5, 40; 21:8). Pablo waj cristianospis, aswan karu llajtasman sumaj willaykunata willaj rerqanku (Hech. 13:2-4; 14:26; 2 Cor. 1:19). Wakenqa Bibliaj wakin librosninta qhelqarqanku, chaykunataj karqanku Marcoswan, Lucaswan, wakintaj Silvano jina (Silas) chay qhelqajkunata yanapakorqanku (1 Ped. 5:12). Wakin cristianaspis chay cheqa sonqo hermanosta yanapakorqanku (Hech. 18:26; Rom. 16:1, 2). Mateomanta Apocalipsiskama qhelqakusqanpeqa, cheqa sonqo cristianos Diospa llajtanpi yanapakusqankumanta willashan. Chayqa sutʼita rikuchin Jehovaqa kamachisninmanta yuyarikusqanta.

⁴ Diospaj astawan llankʼajkuna, ¿imawantaj kausakoj kanku? Pablo, compañerosnin ima necesitasqallankupaj llankʼaj kanku, manataj suyajchu kanku hermanos yanapanankuta. Chaywanpis wakin kuteqa hermanos yanaparej kanku (1 Cor. 9:11-15). Paykunataqa wasinkuman wajyarikoj kanku mikhunankupaj, qhepakunankupaj ima. Sapa uj hermano chayri qotuchakuynintin yanapariyta munaj kanku (Hechos 16:14, 15; Filipenses 4:15-18 leey).

5. ¿Imatá uj qhariwarmi Diospaj astawan llankʼasqankumanta ninku?

⁵ Kunanpis ashkha hermanos Diospa llajtanpi astawan llankʼanku (“Kay imaspi Diospaj astawan llankʼanku” nisqa recuadrota qhawariy). ¿Imatá yuyanku chaykunapi yanapakojkuna? ¿Kusisqachu kanku? Chayta yachayqa mayta yanapasunkiman. Uj hermano, precursor regular, precursor especial, misionerotaj karqa, kunanqa waj llajtapi Betel wasipi yanapakushan. Pay nin: “Diospaj astawan llankʼanayta ajllakusqayqa, ima ruwasqaymantapis may sumaj. Chunka pusajniyoj kashajtiy mana yacharqanichu universidadman rinaytachus, diantinta trabajanaytachus chayri precursor kanaytachus. Kunanqa reparani Jehovapaj astawan llankʼanayrayku imata saqesqaymantapis, Jehovaqa mana qonqasqanta. Paypa yanapayninwanqa mana yuyasqay ruwanasta ruwani. Chaytataj kay pachaj yachachiyninwanqa mana ruwayta atiymanchu karqa”, nispa. Warmintaj nin: “Imapichá yanapakoj kayku, chayqa astawan yachakunaypaj yanapawaj. Sapa kuti Jehová yuyaychawasqaykuta, jarkʼawasqaykutataj reparaj kayku. Jehovapaj mana llankʼaspaqa chay imasta mana japʼiymanchu karqa. Chayrayku mana saykʼuspa Jehovaman agradecekuni, paypaj astawan llankʼasqaykumanta”, nispa. ¿Qanpis paykuna jina kusisqa kayta munawajchu?

6. ¿Imamantá mana iskaychakunachu tiyan?

⁶ Mana tukuychu Diospaj astawan llankʼayta atinku. Ichá qanpis ima kasqanrayku mana atinkichu. Jinapis Jehovaqa llajtanpi yanapakunapaj kallpachakusqanchejta yuyarikunpuni. Pabloqa Colosasmanta hermanosman qhelqasqanpi, wakin cristianospa sutisninkuta oqharerqa (Filemón 1-3 leey). Pabloqa yanapakusqankuta jatunpaj qhawarqa. Jehovapis kikillantataj qhawarqa. Arí, Jehovaqa llajtanpi yanapakusqanchejta may jatunpaj qhawan. Chaywanpis, ¿imaynasmantá Diospaj astawan llankʼajkunata yanaparisunman?

7, 8. 1) ¿Imastá precursores ruwanku? 2) ¿Imaynasmantá precursoresta yanaparisunman?

⁷ Ñaupa tiempopi jina kunanpis precursoresqa qotuchakuykuna sinchʼi sayasqa kananpaj yanapakunku. Sapa killa 70 horasta willamunku. ¿Imaynasmantá paykunata yanaparisunman?

⁸ Uj precursora Shari sutiyoj nin: “Sapa  día willaj rispaqa kallpayojman ichá rijchʼakuykuman. Jinapis wajkuna kallpachanawaykuta necesitayku”, nispa (Rom. 1:11, 12). Uj hermanataj pichus watasta precursora karqa, qotuchakuyninpi kaj precursoresmanta nin: “Paykunaqa mana samarispa sinchʼita llankʼanku. Chayrayku hermanos autonkupi willayman pusarejtinku, wasinkuman mikhurej wajyarejtinku chayri gasolinankupaj manachayri waj imitapaj mashkhitallawanpis yanaparejtinku kusikunku. Ajinata yanaparispaqa paykunamanta yuyarikusqanchejta rikuchinchej”, nispa.

9, 10. ¿Imatá wakin hermanos ruwarqanku precursoresta yanaparinankupaj?

⁹ Precursoresta yanaparillanchejtaj paykunawan willaj rispa. Iskay precursoras, chaupi semanata chantá tardesninpi pisi hermanoslla willaj risqankuta ninku. Uj hermana Brooklyn Betelpi yanapakushan paytaj precursora kasqanmanta yuyarikuspa nin: “Uj autoyoj hermana niwaj: ‘Willaj rinaykipaj mana pi kajtenqa wajyamullawanki noqawan risun’, nispa. Chay hermanaqa precursorallapuni kanaypaj yanapawarqa”, nispa. Shari sutiyoj hermanataj nin: “Willayta tukuytawan wakin precursores solteros chayri solteras kajkunaqa sapallanku qhepakunku. Allin kanman paykunata familiapi Diosta yupaychayman, chayri waj ruwanasninchejman wajyarina. Chayqa paykunata mayta kallpachanqa”, nispa.

¹⁰ Uj hermana casi 50 watastaña precursora. Pay, waj soltera precursoraswan yanapata japʼisqankumanta nin: “Ancianosqa precursoresta waturikuwaj kayku sapa iskay killa jina. Tapuriwajtaj kayku imaynachus kashasqaykuta, trabajoyojchus manachus kasqaykuta, imachus llakichiwasqaykutapis, yanapariytapuni munawaj kayku. Wasiykumantaj jamoj kanku imachus pisiwasqaykuta yachanankupaj”, nispa. Chayqa ichá yuyarichiwanchej apóstol Pablota. Payqa mayta agradecekorqa Éfeso llajtapi uj hermano familiayoj kaspapis yanaparisqanmanta (2 Tim. 1:18).

11. ¿Imatá ruwanku precursores especiales?

¹¹ Wakin qotuchakuykunapeqa precursores especiales kasqan uj sumaj bendición.  Paykunaqa sapa killa 130 horasta willanku, chantapis qotuchakuyta tukuy imaymanamanta yanapanku. Paykuna trabajakunankupaj mana tiempoyojchu kanku. Chayrayku Diospaj astawan llankʼanallankupajpuni sucursal sapa killa pisi qolqewan yanapan.

12. ¿Imaynatá ancianos, waj hermanospis precursores especialesta yanaparinkuman?

¹² ¿Imaynatá precursores especialesta yanapasunman? Uj ancianoqa sucursalpi yanapakuspa ashkha precursoreswan parlariyta yachan, pay nin: “Ancianosqa precursores especialeswan parlarinanku tiyan, imaynachus kashasqankuta yachanankupaj, chayman jinataj yanaparinankupaj. Wakin hermanosqa yuyanku, precursores especiales qolqesituta japʼisqankuwan allinña kasqankuta. Jinapis yanaparillasunmanpuni paykunata”, nispa. Precursores regulares jina, precursores especialespis, paykunawan willayman rinanchejta munanku. ¿Paykunawan willaj llojsiwajchu?

13, 14. 1) ¿Imajtintaj waturejkunamanta mana qonqapunachu tiyan? 2) ¿Imaynatá paykunata yanapariwaj?

¹³ Qotuchakuykunata waturejkunata, warmisninkutapis Diosta yupaychaypi sumaj kallpachasqasta reparanchej, nitaj llauchʼiyanankupaj jinachu kanku. Jinapis paykunataqa kallpacharina, willaymantaj paykunawan rina, khuskataj kusirikuna tiyan. ¿Imanasunmantaj onqoykojtinku, hospitalmantaj chayajtinku? ¿Manachu paykunata waturikamusunman? Hechos librota qhelqaj “munasqa doctor” Lucasqa, Pablota, paywan rejkunatapis sumajtachá yanaparqa (Col. 4:14; Hech. 20:5–21:18).

¹⁴ Qotuchakuykunata waturej hermanos, warmisninkupis paykunawan masichakunanchejta munanku. Uj waturej hermano nin: “Amigosneyqa yachaspa jinanku maykʼajchus kallpachanawankuta. Imachus llakichiwasqanta yachanankupajqa tapuriwanku. Willarisqaytawantaj kusikunku”, nispa. Waturej hermanosqa may jatunpaj qhawanku, paykunamanta yuyarikusqanchejta.

15, 16. ¿Imaynatataj betelitas, Jatun Tantakuna Wasista qhawajkunapis yanapakunku? ¿Imaynatá paykunata yanaparisunman?

¹⁵ Betelpi kajkuna, jinallataj Jatun Tantakuna Wasista qhawajkunapis, Jallpʼantinpi Reinomanta willakunanpaj mayta yanapakunku. Qotuchakuyninchejpi chayri qaylla qotuchakuykunapi betelitas kajtin, ¿imaynatá paykunata yanaparisunman?

¹⁶ Betelman ripuspaqa ichá familiankuta, amigosninkutapis faltachanku. Chayrayku paykunaqa, waj betelitas, mosoj qotuchakuyninkumanta hermanos, walejta jamunki nisqankumanta mayta kusikunku (Mar. 10:29, 30). Betelitasqa tantakuykunaman, willaymanpis rinku. Jinapis wakin kutisqa ichá ashkha ruwanayoj kaspa mana riyta atillankuchu. Qotuchakuymanta hermanosqa mana paykunata qhawaranankuchu tiyan, astawanqa yanapakusqankuta jatunpaj qhawananku tiyan (1 Tesalonicenses 2:9 leey).

17, 18. ¿Imastataj ruwanku waj suyuspi yanapakoj hermanos?

¹⁷ Wakin hermanosqa waj suyusmanta yanapakoj jamunku, paykunaqa uj jina mikhunasman, uj jina parlaykunaman, uj jina ususman, uj jina kausaymanpis yachakunanku tiyan. ¿Imajtintaj waj suyusmanta jamunku? ¿Imaspitaj yanapakunku?

 ¹⁸ Wakenqa misioneros kanku. Qotuchakuykunapitaj mayta yanapakunku yachasqankuwan, may unaytaña willaypi kasqankuwanpis. Sucursalesqa misionerosman maypichus tiyakunankupaj wasiwan, qolqesituwantaj yanaparinku. Wakin hermanostaj waj suyusman rinku Betelpi yanapakunankupaj, manachayqa sucursalesta, Waj Parlayman Tijrachinapaj Oficinasta, Jatun Tantakuna wasista chayri Tantakuna Wasista ruwaysikoj. Paykunataqa sucursal chayri qotuchakuymanta hermanos yanapanku, wasiwan mikhunawanpis. Betelitas jina paykunapis tantakuykunaman, willaymanpis rillankutaj. Hermanostaj mayta kusikunku ajina yanapata japʼispa.

19. ¿Imaynatá waj suyusmanta jamoj hermanosta yanaparisunman?

¹⁹ ¿Imaynatataj waj suyusmanta jamoj hermanosta yanaparisunman? Ichá mikhusqanchej mikhunasta mana yachankuchu. Mikhunitata paykunaman qoriyta munaspaqa, imatachus mikhurikuyta munasqankuta tapurisunman, chayri waj mikhunata malliriyta munasqankutachus manachus. Parlayninchejta, ususninchejtawan yachakunankukama paykunawan pacienciakuna. Ichá mana usqhayllatachu parlayninchejta entiendeyta atenqanku. Chantapis parlayninchejta yachakunankupaj yanaparisunman. Imaraykuchus paykunaqa yachakuyta munanku.

20. ¿Imaynatá Diospaj astawan llankʼaj hermanosta tatasninkutapis yanaparisunman?

²⁰ Diospaj astawan llankʼaj hermanosqa, machuyasqa tatasninkuta imaynatachus yanaparinankuta qhawarinanku tiyan. Tatasninku testigosllataj kajtinkoqa, munankuchá chaypi yanapakunallankutapuni (3 Juan 4). Chaywanpis wawasninkoqa atisqankuman jina waturimuspa yanaparinku. Chay hermanospa tatasninku yanapata munajtinkoqa, qayllankupi tiyakojkuna yanaparillankumantaj. Mana qonqanachu, astawan sirvej hermanosqa pachantinpi willakunanpaj mayta yanapakushasqankuta (Mat. 28:19, 20). Astawan sirvej hermanospa tatasninkuta qotuchakuyninchej chayri noqanchejpis, ¿yanaparisunmanchu?

21. ¿Imaynatá Diospaj astawan llankʼaj hermanos yanaparisqanchejta, kallpacharisqanchejtapis qhawanku?

²¹ Diospaj astawan llankʼajkunaqa mana qolqeraykuchu Diosta sirvinku. Paykunaqa Jehovata munakusqankurayku, runa masinkuta munakusqankurayku yanapakunku. May jatunpajtaj qhawanku imallapipis, imallawanpis paykunata yanaparisqanchejta. Uj karu llajtapi yanapakoj hermana nin: “Uj papelitopi agradecekuspa qhelqamuwajtinkoqa, yachani paykuna mana qonqakapuwasqankuta, yanapakusqaytataj jatunpaj qhawasqankuta”, nispa.

22. ¿Imatá yuyanki Diospaj astawan llankʼaymanta?

²² Jehovapaj astawan llankʼajkunaqa may kusisqas kausakunku. Ajinata yanapakuspaqa Diospa Reinon kamachimushajtin, Jehovata wiñaypaj sirvinankupaj wakichikushanku. Chayrayku Diospaj astawan llankʼaj hermanosmanta yuyarikunapuni. Chantapis ruwasqankumanta, sinchʼita trabajasqankumanta ima yuyarikunallapuni (1 Tes. 1:3).