1, 2. 1) ¿Imasmantataj Jesús amigosninwan parlarqa? (Patapi kaj dibujota qhawariy.) 2) Ovejasmanta, cabrasmanta rijchʼanachinamanta, ¿ima tapuykunamantaj kutichisunchej?

JESUSQA amigosnin Pedrowan, Andreswan, Santiagowan, Juanwan ima, uj sumaj imamanta parlasharqa. Allin kamachi yuyayniyojmanta, chunka sipaskunamanta, talentos rijchʼanachinamanta ima parlaytawan, maykʼajchus Runaj Churin tukuy runasta juzgaj jamunanmanta parlarqa. Chantapis waj rijchʼanachinamanta willallarqataj. Jesusqa, imaynatachus uj michej ovejasta, cabrasmanta tʼaqan, ajinallatataj Runaj Churin runasta iskay qotusman tʼaqananta nerqa. Chantapis waj qotu runasmanta parlallarqataj, paykunataj ‘reypa wauqesnin’ kanku (Mateo 25:31-46 leey).

² Kay tiempomanta Diospa kamachisninpis, apóstoles jina chay rijchʼanachinamanta astawan yachakuyta munanchej, imaraykuchus kausayninchej chaymanta kashan. Jesusqa wakin runas wiñay kausayta japʼinankuta, wakintaj chinkachisqas kanankuta ima nerqa. Chayrayku chay rijchʼanachina imatachus niyta munasqanta yachananchej may sumaj, imaraykuchus ajinallamanta wiñay kausayta japʼisunchej.  Kay yachaqanapeqa kay tapuykunaman kutichisunchej: ¿Imaynatá Jehová yanapawanchej chay rijchʼanachinata entiendenapaj? ¿Imaraykutaj ninchej chay rijchʼanachina willamunapaj yuyaychashawasqanchejta? ¿Pitaj Reinomanta willamunan tiyan? Chantá, ¿imaraykutaj kay tiempopi ‘reyman’, ‘wauqesninman’ ima cheqa sonqos kananchej tiyan?

3, 4. 1) Ovejasmanta, cabrasmanta rijchʼanachinata entiendenapaj, ¿imatataj yachananchej tiyan? 2) ¿Imatataj Watch Tower revista 1881 watapi chay rijchʼanachinamanta sutʼincharqa?

³ Ovejasmanta, cabrasmanta rijchʼanachinata sumajta entiendenapajqa, kay tapuykunaj kutichiykunasninta yachananchej tiyan: 1) ¿Pitaj ‘Runaj Churin’ chayri ‘rey’? ¿Pikunataj ovejas, cabras ima kanku? ¿Pikunataj ‘reypa’ ‘wauqesnin’ kanku? 2) ¿Maykʼajtaj ‘Runaj Churin’ ovejasta, cabrasmanta tʼaqanqa chayri juzganqa? 3) ¿Imaraykutaj wakin runasta ovejaswan, wakintataj cabraswan kikinchakun?

⁴ Kay 1881 watapi Watch Tower revista ‘Runaj Churin’ chayri ‘rey’, Jesús kasqanta nerqa. Chantapis sutʼinchallarqataj reypa ‘wauqesnin’ mana janaj pachaman kamachej rejkunallachu kasqankuta, manaqa kay Jallpʼapi wiñaypaj kausakuyta suyakojkunapis. Chantapis chay revista nillarqataj Jesús waranqa watasta kamachishaspa ovejasta, cabrasmanta tʼaqananta, Dios jina munakuyta rikuchejkunataj ovejaswan ninakunankuta.

5. ¿Imatataj 1923 watapi ovejasmanta, cabrasmanta rijchʼanachinamanta sutʼinchakorqa?

⁵ Jehovaqa 1923 watapi ovejasmanta, cabrasmanta rijchʼanachinata astawan entiendenapaj yanapawarqanchej. Chay watapi Watch Tower del 15 de octubre nisqa revista Runaj Churin, Jesús kasqanta nerqa. Cristoj wauqesnin paywan janaj pachamanta kamachimojkuna kasqankuta rikuchinanpajtaj Bibliaj ashkha versiculosninta oqharerqa, jinallataj ovejaswan ninakojkuna Jesús kamachimushajtin kay Jallpʼapi kausakojkuna kasqankuta rikuchinanpajpis. Chay revistaqa maykʼajchus ovejasta, cabrasmanta tʼaqakunantapis sutʼinchallarqataj. Chay revista nisqanman jina Jesusqa rijchʼanachinanpi iskay qotusmanta parlarqa. Ujnin qotoqa Cristoj ‘wauqesninta’ yanapanan karqa, ujnintaj mana. Chayrayku nikorqa Cristoj wauqesnin niraj janaj pachaman Jesuswan khuska waranqa watasta kamachimunankupaj ripushajtinku ovejasta, cabrasmanta tʼaqakunanta. ¿Imaraykutaj wakin runas ovejaswan ninakunku? Jesuspi, Diospa Reinon sumaj kausayta apamunanpi ima creesqankurayku.

6. ¿Imatataj 1995 watapi Jesuspa rijchʼanachinanmanta entienderqanchej?

⁶ Ashkha watasta yuyarqanchej kay qhepa pʼunchaykunapi willayninchejta qhesachajkuna cabraswan ninakusqankuta, willayninchejta uyarejkunataj ovejaswan ninakusqankuta. Kay 1995 watapitaj chay rijchʼanachinata astawan sutʼita entienderqanchej. Chay wata La Atalaya revistaqa Mateo 24:29-31 (leey) versiculosta Mateo 25:31, 32 (leey) versiculoswan kikincharqa. * Sutʼincharqataj Jesús manchay ñakʼariy tiempopi runasta juzgananta, Runaj Churin “jatun kaynimpa kʼanchaynimpi” jamojtin.

7. ¿Imaynatataj kay tiempopi ovejasmanta, cabrasmanta rijchʼanachinata entiendenchej?

⁷ Kay tiempopeqa ovejasmanta, cabrasmanta  rijchʼanachinata aswan sutʼita entiendenchej. Yachanchejtaj Runaj Churin chayri rey, Jesús kasqanta. Reypa wauqesnin espíritu santowan ajllasqa kajkuna kasqankuta, pikunachus Jesuswan khuska janaj pachamanta kamachimonqanku (Rom. 8:16, 17). Ovejaswan, cabraswantaj “tukuy laya runas” kasqankuta. Paykunaqa manchay ñakʼariy tiempo tukukushajtin juzgasqas kanqanku, chay tiempotaj tumpamantawan qallarenqa. Yachallanchejtaj, Jesús paykunata juzgananta kay Jallpʼapiraj kaj ajllasqa cristianosta imaynatachus yanapasqankuman jina. Jehovaman mayta agradecekunchej Mateo 24, 25 capitulospi parlakusqan rijchʼanachinasta aswan sutʼita entiendenapaj yanapawasqanchejmanta.

8, 9. ¿Imaraykutaj Jesús ovejaswan ninakoj runas cheqan runaspaj qhawasqa kasqankuta nerqa?

⁸ Jesusqa ovejasmanta, cabrasmanta rijchʼanachinanpi runasman willamunamanta mana parlarqachu. Chantá, ¿imaynatá yachanchej chay rijchʼanachinawan Reinomanta willamunapuni kasqanta yuyaychashawasqanchejta?

⁹ Chay tapuyman kutichinapajqa, ñaupajta entiendenanchej tiyan imatachus Jesús chay rijchʼanachinawan yachachiyta munawasqanchejta. Payqa rijchʼanachinanpi mana ovejasmantapunichu, nitaj cabrasmantapunichu parlarqa. Nillataj chaywan niyta munasharqachu ovejaswan ninakoj runas reypa wauqesninman mikhunata, pʼachata qonankuta, carcelpi wisqʼasqa kashajtinku waturikoj rinankuta, paykunata qhawanankuta ima. Jesusqa ovejaswan ninakojkuna cheqan runaspaj qhawasqa kasqankuta nerqa, imaraykuchus kay Jallpʼapiraj kaj ajllasqa cristianosta Cristoj wauqesninta jina qhawanku, kay qhepa pʼunchaykunapitaj tukuy sonqo paykunata yanapanku (Mat. 10:40-42; 25:40, 46; 2 Tim. 3:1-5).

10. ¿Imaynatataj ovejaswan ninakoj runas Cristoj wauqesninta yanapankuman?

¹⁰ Jesús ovejasmanta, cabrasmanta rijchʼanachinanpi, imachus kay qhepa pʼunchaykunapi rikukunanmanta parlarqa (Mat. 24:3). Sutʼincharinapaj, pay nerqa: “Janaj pacha reinomanta evangelio tukuynejpi willasqa kanqa”, nispa (Mat. 24:14). Manaraj ovejasmanta, cabrasmanta rijchʼanachinamanta parlashaspa, talentos rijchʼanachinamanta parlarqa, ajllasqa cristianosman Reinomanta willaypi mayta llankʼanankuta yachachinanpaj. Chaywanpis ajllasqa cristianosmanta kay Jallpʼapi pisillaña kanku, ruwayninkutaj may ashkharaj kashan. Paykunaman Jesús kamacherqa niraj kay pachaj tukukuynin chayamushajtin tukuy runasman willamunankuta. Chay rijchʼanachinamantataj yachakunchej ovejaswan ninakoj runas, Cristoj wauqesninta yanapananku kasqanta. Paykunaqa mana qolqellawanchu yanapananku tiyan, nitaj willamunallankupajpuni kallpachanallankuchu tiyan. Astawanpis sumaj willaykunata tukuy runasman willamuspa yanapananku tiyan.

11. ¿Imatataj ichapis tapukusunman, imaraykutaj?

¹¹ Jesuspa yachachisqasnenqa, 8 millonesña kanku, paykunamanta ashkhastaj mana ajllasqa cristianoschu kanku. Jesusqa ajllasqa cristianosllaman talentosta qorqa (Mat. 25:14-18). Chayrayku ichá tapukusunman: “Waj ovejasmanta kajkunaman talentosta mana qorqachu chay, ¿Reinomanta willamunankuchu tiyan?”,  nispa. Arí, willamunanku tiyan. Kunantaj chayta qhawarinachej.

12. ¿Imatataj Jesús Mateo 28:19, 20 versiculospi nisqanmanta yachakusunman?

¹² Jesusqa yachachisqasninman runasman willamunankuta kamacherqa. Jesusqa kausarimuytawan yachachisqasninman runasta yachachisqasninman tukuchimunankuta, imatachus pay kamacherqa chayta yachachimunankuta ima nerqa. Chantapis yachachisqasnenqa Jesús willamunankuta kamachisqanta kasukunanku karqa (Mateo 28:19, 20 leey). Chayrayku Jesuspa tukuy yachachisqasnin willamunankupuni tiyan, janaj pachapi tiyakuyta suyakojkuna kaspapis chayri manapis (Hech. 10:42).

13. ¿Imatá Juan mosqoypi jina rikusqanmanta yachakunchej?

¹³ Apocalipsis libro rikuchin ajllasqa cristiano kaspapis chayri manapis, Reinomanta willamunanchejpuni kasqanta. Apóstol Juanqa mosqoypi jina uj ‘noviata’ rikorqa, pichus “kawsay yakumanta” ujyanankupaj runasta wajyarisharqa. Mosqoypi jina rikusqan noviaqa, 144.000 ajllasqa cristianoswan ninakunku, pikunachus janaj pachamanta Jesuswan kamachimonqanku (Apo. 14:1, 3; 22:17). Yakoqa Jesús kausayninta qosqanwan ninakun, imaraykuchus pay kausayninta qosqanrayku wañuymanta, juchamanta ima kacharichisqas kayta atinchej (Mat. 20:28; Juan 3:16; 1 Juan 4:9, 10). Ajllasqa cristianosqa Jehová, Jesuspa kausayninwan rantiwasqanchejmanta, imaynatachus chaywan yanapachikunata ima runasman sonqo kʼajaywan willamunku (1 Cor. 1:23). Juanqa mosqoypi jina waj qotu runastawan rikusqanmanta parlarqa, chay qotu runastaj mana ajllasqa cristianoschu kanku, manaqa kay Jallpʼapi wiñaypaj kausakuyta suyakojkuna kanku. Paykunapis runasta “jamuychej”, nispa wajyarinankupaj kamachisqa kanku. Chay kamachiytataj kasukunku wajkunaman sumaj willaykunata willaj rispa. Chaytaj rikuchiwanchej  sumaj willaykunata tukuy uyarejkuna, wajkunaman willamunanku kasqanta.

14. ¿Imaynatataj “Cristoj leyninta” kasukusqanchejta rikuchinchej?

¹⁴ “Cristoj leyninta” kasukuyta munajkunaqa willamunanku tiyan (Gál. 6:2). Jehovaqa payta yupaychajkuna kikin leyesllata kasukunankuta munan. Sutʼincharinapaj, Payqa israelitas, israelitaswan tiyakoj forasteros ima, leyesninta kasukunankuta munarqa (Éxo. 12:49; Lev. 24:22). Manaña Moisesman qosqa leypichu kaspapis, “Cristoj leyninta” kasukunanchejpuni tiyan, ajllasqa cristianos kaspapis chayri manapis. Jesuspa yachachisqanmanta aswan kuraj kamacheyqa munakuyta rikuchiy karqa (Juan 13:35; Sant. 2:8). Noqanchejqa Jehovata, Jesusta, runa masinchejta ima munakunchej. Chay munakuytataj rikuchinchej Diospa Reinonmanta sumaj willaykunata runasman willamuspa (Juan 15:10; Hech. 1:8).

15. ¿Imaraykutaj ninchej Jesús tukuy yachachisqasninman, runasman willamunankuta kamachisqanta?

¹⁵ Jesús wakin imasta yachachisqasninman nisqanta ashkha runas kasukunanku karqa. Sutʼincharinapaj, Jesusqa 11 yachachisqasnillanwan uj Reinopaj tratota ruwarqa, chaywanpis 144.000 runas paywan khuska kamachimonqanku (Luc. 22:29, 30; Apo. 5:10; 7:4-8). Chantapis Jesús kausarimusqantawan, mana tukuy yachachisqasninchu “tukuy laya runasta yachachisqasniyman tukuchimuychej” nisqa kamachiyta uyarerqanku (Hech. 10:40-42; 1 Cor. 15:6). Chaywanpis Jesuspa tukuy yachachisqasnin ñaupa tiempopi willamorqanku (Hech. 8:4; 1 Ped. 1:8). Noqanchejpis yachanchej runasman willamunanchej kasqanta, chay kamachiyta Jesús qoshajtin mana chaypichu kaspapis. Kunanqa 8 millonesña Reinomanta willamushanchej. ¿Imaraykú chayta ruwashanchej? Imaraykuchus ajinamanta Jesuspi creesqanchejta rikuchinchej (Sant. 2:18).

16-18. 1) ¿Imaynatataj Cristoj wauqesninta tukuy sonqo yanapasunman? 2) ¿Imaraykutaj chayta ruwananchej tiyan?

¹⁶ Satanasqa Jallpʼapi kaj Cristoj wauqesninwan mayta maqanakushan. Yachantaj “paypaj pisi tiempollaña kasqanta” (Apo. 12:9, 12, 17). Satanás ajllasqa cristianosman churanakojtinpis, paykunaqa ni jaykʼaj jina willashallankupuni. Mana ni jaykʼaj jinataj may ashkha runas sumaj willaykunata uyarishanku. Sutʼita rikunchej Jesús ajllasqa cristianoswan kashasqanta, paykunata yanapashasqanta ima (Mat. 28:19, 20).

¹⁷ Noqanchejqa Cristoj wauqesninta willaypi yanapakushasqanchejta may jatunpaj qhawanchej. Chantapis kay llankʼay ruwakunanpaj qolqenchejwan yanapakunchej, Tantakuna Wasista, Jatuchaj Tantakuna Wasista, sucursalesta imataj ruwaysikunchej. Allin kamachi yuyayniyoj churasqan ancianosta, waj hermanosta ima kasukuspaqa, Cristoj wauqesninta yanapayta munasqanchejta rikuchishanchej (Mat. 24:45-47; Heb. 13:17).

¹⁸ Tumpamantawan ajllasqa cristianosqa wiñaypaj sellasqa kanqanku. Chantá ángeles kay pachaj tawantin wayrasninta manaña jarkʼajtinku, manchay ñakʼariy tiempo qallarenqa (Apo. 7:1-3). Manaraj Armagedón maqanakuy qallarishajtin Jesús ajllasqa cristianosta janaj pachapi tantaykonqa (Mat. 13:41-43). Jesús chayamuspa juzgashajtin ovejaswan ninakoj runas jina kayta munanchej chayqa, kunan Cristoj ajllasqa wauqesninta yanapananchej tiyan.