1, 2. Diospa kamachisnin, ¿imatataj ruwankupuni?

UNAYMANTAPACHAÑA Jehovaqa imaymana profeciasta willacherqa. Kamachisnintaj pacienciawan suyarqanku chay profecías juntʼakunanta. Sutʼincharinapaj, Jeremiasqa Judá llajtata babilonios thuñiykunankuta nerqa. Chaytaj 607 watapi Jesús niraj jamushajtin juntʼakorqa (Jer. 25:8-11). Isaiaspis nerqa judíos Babiloniamanta llojsipunankupaj, llajtankuman kutipunankupaj ima Jehová yanapananta. Pay nerqa: “Kusikuyniyojmin paypi tukuy suyakojkunaqa”, nispa (Isa. 30:18). Miqueaspis mana iskayrayarqachu Diospa nisqasnin juntʼakunanmanta. Chayraykutaj nerqa: “Diosnillaypi suyakusaj”, nispa (Miq. 7:7). Diospa kamachisnenqa may chhika unayta Mesías chayamunanta suyarqanku (Luc. 3:15; 1 Ped. 1:10-12). *

² Noqanchejpis Diospa Reinonmanta profecías juntʼakunanta suyashanchej. Chay Reinopi kamachejqa Jesús, tumpamantawantaj kay sajra pachata chinkachenqa. Tukukuy pʼunchay chayamojtintaj sajra runasta, imaschus llakichiwanchej chay imastapis  chinkachenqa (1 Juan 5:19). Tukukuy pʼunchayqa ima ratollapis chayamonqa, chayrayku wakichisqapuni kananchej tiyan.

3. Ashkha watastaña tukukuy pʼunchay chayamunanta suyashanchej chayqa, ¿imatá ichapis tapurikusunman?

³ Mayta suyashanchej Jehovaj munaynin kay Jallpʼapi ruwakunanta (Mat. 6:10). Ashkha watastaña tukukuy pʼunchay chayamunanta suyashanchej chayqa, ichapis tapurikusunman: “¿Tukukuy pʼunchay chayamunanta suyakunallaypunichu tiyan?”, nispa.

4. ¿Imaraykutaj rijchʼarisqallapuni, wakichisqallapuni kananchej tiyan?

⁴ Jesusqa yachachisqasninman rijchʼarisqas, wakichisqas kanankuta kamacherqa. Chayrayku noqanchejpis kay pachaj tukukuynin tumpamantawan jamunanta suyakunallanchejpuni tiyan (Luc. 21:34-36, Dios Parlapawanchej; Mat. 24:42). Diospa llajtanpis tukukuy pʼunchaypaj wakichisqas, rijchʼarisqas kananchejta, mosoj pachapi yuyananchejta ima sapa kuti niwanchej (2 Pedro 3:11-13 leey).

5. ¿Imaraykutaj tukukuy pʼunchaypaj wakichisqa kananchej tiyan?

⁵ Ñaupa tiempomanta cristianosqa Jehovaj pʼunchayninpaj wakichisqas, rijchʼarisqas kananku karqa. Kunan tiempotaj astawanraj tukukuy pʼunchaypaj wakichisqas kananchej tiyan. ¿Imaraykú? Imaraykuchus Jesuspa profeciasnin rikuchiwanchej pay kamachishasqantaña, qhepa pʼunchaykunapi kausakushasqanchejta ima. Sutʼincharinapaj, kay pachaqa astawan sajrayashan, Reinomanta willaytaj Jallpʼantinpi willakushan. Tukuy kaytaj 1914 watamantapacha juntʼakushan (Mat. 24:3, 7-14). Jesusqa mashkha unaytachus qhepa pʼunchaykuna kananta mana nerqachu. Chayrayku wakichisqa kananchej tiyan, imaraykuchus tukukuy pʼunchayqa ima ratollapis chayamonqa.

6. ¿Imaraykutaj ninchej kay pacha sajrayanallantapuni?

⁶ Bibliaqa kay pʼunchaykunapi runas astawan sajrayanankuta nin (2 Tim. 3:1, 13; Mat. 24:21; Apo. 12:12). Chayrayku kay pʼunchaykuna may sajra kajtinpis, astawan sajrayallanqapuni. ¿Chay ninayanchu tukukuy pʼunchay chayamunanpaj kay pacha astawanpuni sajrayananta?

7. Kay Mateo 24:37-39 versiculospa nisqanpi tʼukurispa, ¿imatataj reparanchej?

⁷ Wakin runasqa niraj manchay ñakʼariy tiempo qallarishajtin tukuy suyuspi yarqhay, onqoy, maqanakuykuna ima kananta yuyanku (Apo. 7:14). Chaywanpis chayqa mana jinachu kanqa. ¿Imaraykú? Imaraykuchus ajina kanman chayqa tukuy runas reparankuman Bibliaj profeciasnin juntʼakushasqanta. Bibliaj nisqanpi mana creej runaspis chayta reparallankumantaj. Chaywanpis Jesusqa ashkha runas qhepa sajra pʼunchaykunapi kausashasqankuta mana reparanankuta nerqa. Payqa tukukuy pʼunchay mana suyashajtillanku chayamunanta nerqa, ni ima kananta yuyaspa kausakushasqankurayku (Mateo 24:37-39 leey). Jesuspa nisqanpi tʼukurispa, ¿imatataj reparanchej? Niraj manchay ñakʼariy tiempo qallarishajtin, kay pachaqa sajra kasqanmanta manaña astawan sajrayanqachu (Luc. 17:20; 2 Ped. 3:3, 4).

8. ¿Imatataj yachanchej?

⁸ Jesusqa imachus qhepa pʼunchaykunapi kananta nerqa, wakichisqa kajkunalla tukukuy pʼunchay chayamusqanta reparanankupaj. Diospa kamachisnenqa wakichisqapuni kashanchej (Mat. 24:27, 42). Chayrayku 1914 watamantapacha rikushanchej  imaynatachus Jesuspa nisqasnin juntʼakushasqanta. Yachanchejtaj qhepa pʼunchaykunapi kausashasqanchejta. Jehovataj maykʼajchus kay sajra pachata chinkachinanta yachanña.

9. ¿Imaraykutaj wakichisqas, rijchʼarisqas kananchej tiyan?

⁹ Rikunchej jina wakichisqas, rijchʼarisqas kananchej tiyan. ¿Imaraykutaj? Imaraykuchus Jesucristota kasukuyta munanchej. Chantapis qhepa pʼunchaykunamanta profecías juntʼakushasqanpi creenchej. ¿Imaraykutaj chaypi creenchej? Mana imapipis creesqanchejraykullachu, manaqa Bibliaj profeciasnin juntʼakushasqanta yachasqanchejrayku.

10, 11. 1) ¿Imaraykutaj Jesús yachachisqasninman nerqa wakichisqallapuni kanankuta? 2) ¿Imatataj ruwananchej tiyan tukukuy pʼunchay suyasqanchej horapi mana chayamojtin? (14 paginapi dibujota qhawariy.)

¹⁰ Jehovaj ashkha kamachisnenqa tukukuy pʼunchay chayamunanta ashkha watastaña suyashanku. Unaytaña Jehová Diosta sirvispapis chayri manapis, wakichisqallapuni, rijchʼarisqallapuni kananchej tiyan. Jesús, Satanaspa sajra pachanta chinkachej jamunanpaj wakichisqa kananchej tiyan. Jesús yachachisqasninman imatachus nisqanta yuyarikuna, payqa maykʼajchus tukukuy pʼunchay chayamunanta mana yachasqankurayku wakichisqa kanankuta nerqa. Chantapis nillarqataj: “Chayqa karu llajtaman ripoj runaman rijchʼakun. Wasinta saqenampaj, atiyta qosqa sapa uj kamachisninman, sapa ujman ruwananta ruwanampaj. Punku qhawajtapis nisqa allinta qhawananta. Chayrayku ama puñuspa, wakichisqa kaychej, imaraykuchus mana yachankichejchu maykʼajchus wasiyoj chayamunanta, chʼisiyaykuytachus, chayri chawpi tutatachus, chayri gallo waqaytachus, manachayri sutʼiyaytachus. Pajtataj wasiyoj chayarparimuspa, puñushajta taripasunkichejman. Chayrayku imatachus qankunaman niykichej, chayllatataj runasmampis nini: Ama puñuspa wakichisqapuni kaychej”, nispa (Mar. 13:33-37).

¹¹ Cristianosqa, 1914 watamantapacha Jesús kamachiyta qallarisqanta entiendeytawan, repararqanku tukukuy pʼunchay ima ratollapis chayamuyta atisqanta. Chayrayku wakichikorqanku. ¿Imaynatá? Runasman astawan willamuspa. Marcos 13 capitulopi Jesusqa kamachispa patronninku suyasqankumanta aswan qhepata chayamunanta nerqa. Paykunaqa wakichisqa kananku karqa patronninku maykʼajchus chayamunanta mana yachaspapis. Tukukuy pʼunchay chayamunanta unaytaña suyajtinchejpis, mana nisunmanchu manaraj chayamunanta chayri ni jaykʼaj chayamunanta. Chayrayku wakichisqallapuni kananchej tiyan.

12. ¿Imatataj Habacuc Jehovata taporqa, chantá imatataj Jehová kuticherqa?

¹² Profeta Habacuc ruwasqanpi tʼukurina. Payqa Jerusalén llajta chinkachisqa kananta willashaspa pacienciawan suyarqa chinkachisqa kananta. Paymanta aswan ñaupajta waj profetaspis chay kikin willayllatataj ashkha watasta willarqanku. Chay tiempomanta runas mana jaykʼaj jina astawan sajrayasqankuta rikorqa. Chayrayku Jehovaj yanapayninta mañakorqa. Tapurerqataj: “Maykʼajkamataj qanta qhaparikamuspa, yanapata mañakusaj, mana uyarichikuspa?”, nispa. Jehovaqa maykʼajchus Jerusalén llajta chinkachisqa kananta profetanman mana willaspapis, wakichisqa kananta nerqa. Chayraykutaj “juntʼakunan tiempoqa chayamonqapuni”, nispa nerqa (Habacuc 1:1-4; 2:3 leey).

13. ¿Imatataj Habacuc yuyayta atinman karqa, imaraykutaj chay mana allinchu kanman karqa?

 ¹³ Kaypi tʼukuriy: Habacucqa saykʼusqaña kashan Jerusalén thuñisqa kananta suyakuspa, nintaj: “Ashkha watastaña chinkachisqa kananta suyashani. Ichapis manaraj chayamonqachu, chayrayku manasina allinchu kanman willamunallaypuni. Wajkuna willamuchunku ari”, nispa. Ajinata Habacuc yuyanman karqa chayqa, ¿imataj kanman karqa? Jehovawan allinpi kayninta chinkachinman karqa. Jerusalén thuñisqa kananpaj mana wakichisqachu kaspataj wañunman karqa.

14. ¿Imamantataj Jehovaman agradecesqas kasunchej?

¹⁴ Kunantaj mosoj pachapiña kashasqaykipi tʼukuriy. Qhepa pʼunchaykunapi imachus kananta Jehová nisqan, juntʼakusqanta rikorqanki. Chayraykutaj Jehovapi mana jaykʼaj jina astawan atienekunki, yachankitaj tukuy ima nisqasnin juntʼakunanta (Josué 23:14 leey). Qanqa Jehovaman may agradecesqa kashanki, maychus tiemponpi Satanaspa sajra pachanta tukuchisqanrayku, kamachisninta wakichisqas, rijchʼarisqas kanankuta kamachisqanrayku ima (Hech. 1:7; 1 Ped. 4:7).

15, 16. ¿Imaraykutaj willamunallanchejpuni tiyan?

¹⁵ Jehovaj llajtanqa, Diosta sirviyta kausayninchejpi ñaupajman churanata yuyarichillawasunpuni. Chaytaj Jehovata sirvinallapajpuni, Reinomanta runasman willamunapuni kasqanta mana qonqanapaj ima yanapawasunchej. Qhepa pʼunchaykunapi imaschus kananta Jesuspa nisqan juntʼakushasqanta, tumpamantawan tukukuynin chayamunanta ima yachanchej. Chayrayku Jehovata sirviyta, runasman Reinomanta willamuyta ima ñaupajman churanchej (Mat. 6:33; Mar. 13:10).

¹⁶ Reinomanta sumaj willaykunata runasman willamuspaqa, kay sajra pacha chinkachisqa kashajtin runasta salvakunankupaj yanapanchej. Kay 1945 watapi Alemaniamanta kaj uj jatun barco yakuman chinkaykorqa, ashkha runastaj wañorqanku. Chay barcomantataj uj hermanata qosantawan salvarqanku. Hermana yuyarikun barco chinkaykushajtin uj warmi jinata qhaparisqanta: “Qʼepisniyta orqhopuwaychej, qʼepisniyta orqhopuwaychej, chay ura cuartopi kashan, tukuy imay chaypi kashan. Tukuy imayta chinkachini”, nispa. Chay barcomanta waj pasajerostaj yacharqanku runasta mana wañunankupaj usqhayllata yanapananku kasqanta qʼepista orqhomunankumanta nisqaqa. Chay pasajerosqa runasta yanapanankupaj mayta kallpachakorqanku. Kunanpis runasta yanapana tiyan kay pacha chinkachisqa kashajtin mana  wañunankupaj. Chayrayku chay barcomanta pasajeros jina runasta salvakunankupaj yanapayta munanchej. Chaypajtaj sonqo kʼajaywan Reinomanta willamunchej.

17. ¿Imaraykutaj tukukuy pʼunchay ima ratollapis chayamunanta ninchej?

¹⁷ Sutʼita rikunchej Bibliaj profeciasnin juntʼakushasqanta, tukukuy pʼunchay tumpamantawan chayamunanta ima. Suyashanchejtaj, tumpamantawan “chunka wajras” nisunman kamachejkuna chantá phiña animal ima llulla religionespa contrankupi sayaykunankuta (Apo. 17:16). Chayrayku mana allinchu kanman yuyananchej chay kananpaj unaytaraj suyana kasqanta. Chantapis mana qonqanachu Jehová chay kamachejkunata llulla religionespa contrankupi sayaykunankupaj tanqayta atisqanta. Chaytaj ima ratollapis, usqhayllatataj kanqa (Apo. 17:17). Tumpamantawan Satanaspa sajra pachan chinkachisqa kanqa. Chayrayku Jesuspa nisqanta kasukuna. Pay nerqa: “Qhawarikuychej; pajtataj sonqoykichej atipachikunman mikhunawan, machaykuywan, kay pacha ruwanaswan ima. Jinallapitaj juicio pʼunchay ujllata taripasunkichejman”, nispa (Luc. 21:34, 35; Apo. 16:15). Wakichisqallapuni kanachej, Jehovatataj sirvinallapuni. Wakichisqa kajkunata, rijchʼarisqa kajkunata salvananpitaj atienekuna (Isa. 64:4).

18. ¿Ima tapuymantaj qhepan yachaqanapi kutichisunchej?

¹⁸ Tukukuy pʼunchay chayamunanta suyashaspa, Jesuspa yachachisqan Judas yuyaychasqanman jina ruwanallapuni. Pay nerqa: “Qankunarí munasqa hermanosníy, kallpachanakuspa wiñaychej may llimphu santo kaj creesqaykichejpi. Jinallatataj Espíritu Santoj yanapayninwan Diosmanta mañakuychej. Diospa munakuynimpi kallaychejpuni, Señor Jesucristoj khuyakuyninta suyaspa, wiñay kawsayta japʼinaykichejpaj”, nispa (Jud. 20, 21). ¿Imaynatataj rikuchisunman mosoj pachapi kausakuyta suyashasqanchejta? Qhepan yachaqanapi chayta yachakusunchej.