1, 2. ¿Imatataj Diosninchejmanta wakin runas yuyanku?

RUNASQA, yuyanku Diosninchej mana noqanchejmanta llakikusqanta. Sutʼincharinapaj, noviembre de 2013 watapi, sinchʼi muyoj wayra kasqanrayku mama qochamanta yaku wasaykamuspa Filipinaspa ashkha churusninta chinkarparicherqa. Chay pasayta uj llajtamanta alcalde nerqa: “Diosqa ashkha ruwanasniyoj kasqanrayku runasta yanapananpaj mana tiempoyojchu”, nispa.

² Wakin runasqa imatachus ruwasqanchejta Dios mana rikusqanta yuyanku (Isa. 26:10, 11; 3 Juan 11). Apóstol Pabloqa tiemponpi kausakoj runas Diosmanta qonqapusqankuta nerqa. Imaraykuchus chay runasqa “mana cheqan ruwaykunawan, sajra ruwaykunawan, qolqe munapayaywan” ima juntʼa kasharqanku (Rom. 1:28, 29).

3. ¿Imastataj tapurikuna kanman?

³ Noqanchejqa yachanchej Dios tukuy ima ruwasqanchejta qhawashasqanta. Chaywanpis tapurikuna: “¿Creenichu Dios noqamanta interesakusqanta? ¿Reparanichu imaynatachus kausayniypi yanapashawasqanta?”, nispa. Bibliaqa niwanchej imaynatachus Jehová atiyninta rikuchispa kamachisninta yanapashasqanta  (Deuteronomio 26:8 leey). Jesús nisqanman jinaqa wakin runas ‘Diosta rikunanku’ karqa, nisunman Diosninchej yanapashasqanta reparananku karqa (Mat. 5:8). ¿Qanpis yanapashasusqanta reparankichu? ¿Kausayniykipi rikunkichu imaynatachus Dios yanapashasusqanta? Bibliaqa Diospa yanapayninta reparajkunamanta, mana reparajkunamanta ima parlan. Kay yachaqanapeqa chaykunamanta wakinta qhawarisunchej. Qhepan yachaqanapitaj yachakusunchej imaynatachus creeyninchej, Diosninchej yanapashawasqanchejta reparanapaj yanapawasqanchejta.

4. ¿Imaraykutaj Israel llajtaj enemigosnin Jehová llajtanta yanapashasqanta mana repararqankuchu?

⁴ Ñaupa tiempomanta ashkha runas imaynatachus Dios Israel llajtata yanapasqanta rikuyta aterqanku. Sutʼincharinapaj, Jehovaqa ashkha milagrosta ruwarqa llajtanta Egiptomanta orqhomunanpaj, Sumaj Jallpʼapitaj ashkha reyesta atiparqa (Jos. 9:3, 9, 10). Wakin reyesqa imaynatachus Jehová llajtanta salvasqanta uyarerqanku, rikorqanku ima. Jinapis israelitaspa contrankuta maqanakunankupaj uj yuyayllaman yaykorqanku (Jos. 9:1, 2). Israelitaswan maqanakushaspa imaynatachus Dios llajtanta yanapasqanta reparayta aterqanku. Sutʼincharinapaj, rikorqanku Jehová atiyninwan intita, killatawan sayachisqanta “israelitas enemigosninkuwan pagachikunankukama” (Jos. 10:13). Chaywanpis chay reyesqa sonqosninkuta rumiyachisqankurayku, Jehová llajtanta yanapashasqanta mana reparayta munasqankurayku ima, chay maqanakupi atipachikorqanku (Jos. 11:20).

5. ¿Imatataj rey Achab mana creerqachu?

⁵ Ashkha watasninman sajra rey Achabpis imaynatachus Jehová llajtanta yanapasqanta rikuyta atillarqataj. Profeta Elías payman nerqa: “Kay wataspi mana paramonqachu nitaj chhullamonqachu, noqa ujtawan ninaykama”, nispa (1 Rey. 17:1). Arí, Jehovalla Eliasman atiyta qoyta aterqa maykʼajchus watejmanta paramunanta ninanpaj. Achabtaj chayta mana creerqachu. Chantapis Eliasqa Diosmanta mañakorqa cielomanta nina uraykamunanta, Jehovataj mañakuyninta uyarerqa. Chantapis Eliasqa Achabman nillarqataj Jehová mayta parachimunanta. Chaytaj nisqanman jinapuni karqa (1 Rey. 18:22-45). Chaywanpis Achabqa, Jehová chay milagrosta ruwasqanta mana creerqachu. ¿Imatataj kay parrafopi ñaupaj parrafopi ima yachakunchej? Diospa yanapayninta reparayta atisqanchejta.

6, 7. ¿Imatataj gabaonitas, Rahab ima repararqanku?

⁶ Gabaonitasqa mana waj llajtas jinachu karqanku. Israelitaswan maqanakunankumantaqa paykunawan allinpi kayta maskʼarqanku. ¿Imaraykú chayta ruwarqanku? Jehovamanta, llajtanrayku tukuy imata ruwasqanmanta ima uyarisqankurayku (Jos. 9:3, 9, 10). Arí, paykunaqa allinta ruwarqanku Jehová llajtanta yanapashasqanta reparaspa.

⁷ Rahabpis Jehová llajtanta yanapasqanta repararqa. Payqa yacharqa imaynatachus Jehová Egiptomanta llajtanta orqhomusqanta. Iskay wateqajkuna wasinman chayajtinku pay nerqa: “Noqa yachani Tata Diosqa qankunaman kay jallpʼata qo[sunay]kichejta”, nispa. Kausayninta, familianpa kausayninta ima wañuypataman churashasqanta yachaspapis Dios salvananpi atienekorqa (Jos. 2:9-13; 4:21-24).

8. ¿Imatataj wakin israelitas repararqanku?

 ⁸ Achabmanta parlarinallapuni. Payqa cielomanta nina uraykamojta rikuspapis, Eliaspa mañakuyninta Dios uyarisqanta mana creerqachu. Chaywanpis wakin israelitasqa, Jehová chay milagrota ruwasqanta repararqanku. Chayraykutaj qhaparerqanku: “Tata Diosllamin Diosqa”, nispa (1 Rey. 18:39).

9. ¿Imaynatataj reparasunman Jehová kay tiempopi yanapashawasqanchejta?

⁹ Rikunchej jina wakin runasqa imaynatachus Jehová llajtanta yanapasqanta repararqanku, wakintaj mana. Noqanchejrí Jehová llajtanta yanapasqanta reparajkuna jina kayta munanchej. ¿Imaynatá reparasunman Jehová kay tiempopi yanapashawasqanchejta? “Sonko[n]chejpi reparaspa” (Efe. 1:18, Dios Parlapawanchej). Chaypajtaj Jehovamanta, kʼacha kaykunasninmanta ima astawan yachakunanchej tiyan. Kay tiempopi Jehová payta kasukuyta munajkunata yanapashasqanta, ¿imastaj rikuchiwanchej?

10. ¿Imataj Jehová kamachisninta yanapashasqanta rikuchiwanchej? (4 paginapi dibujota qhawariy.)

¹⁰ Imaynatachus Jehová kamachisninta yanapashasqanta, ashkha imas rikuchiwanchej. Jehovaqa runas paymanta mañakojtinku uyarin (Sal. 53:2). Sutʼincharinapaj, Allan sutiyoj hermano Filipinaspa ujnin churitunpi uj warmiman Diosmanta willashajtin, jinallapi chay warmeqa waqayta qallarisqa. ¿Imaraykú? Imaraykuchus chay paqarillan Diosmanta mañakusqa Jehovaj testigosnin waturej rinankupaj. Chay warmeqa Jehovaj testigosninwan sipas kashaspa yachakusqa. Casarakuspataj waj llajtaman ripusqa, manañataj Jehovaj testigosninwan yachakusqachu. Chay warmeqa Jehová mañakuyninta uyarisqanmanta may agradecesqa kasharqa. Niraj watanmantaj bautizakorqa.

11, 12. 1) ¿Imaynatataj Jehová kamachisninta yanapan? 2) Imaynatachus Jehová uj hermanata yanapasqanmanta sutʼinchay.

¹¹ Kay tiempopipis Jehovaqa kamachisninta yanapashallanpuni. Sutʼincharinapaj, wakin hermanosqa, niraj Jehovaj kamachisnin kashaspa cigarrota pitaj kanku, drogakoj kanku chayri khuchichakuymanta millay imasta qhawaj kanku. Ashkhas ninku chay sajra ruwaykunata saqeyta munaspapis mana atillasqankuta. Jehovamanta yanapata mañakojtinkutaj, payqa chay may sumaj atiyta qorqa. Ajinamantataj chay millay ruwaykunata saqerqanku (2 Cor. 4:7; Sal. 37:23, 24).

¹² Jehovaqa kamachisninta yanapallantaj chʼampaykunasninkuta atipanankupaj. Amy sutiyoj hermanamanta parlarina. Paytaqa Tantakuna Wasita ruwaypi, misionerospaj wasita ruwaypi ima yanapakunanpaj Pacífico mama qochaj ujnin churitunman rinanta nerqanku. Chaypi kausayqa uj jinataj karqa. Wakin kuteqa mana yaku kajchu, nitaj luzpis. Ñankunamanpis yaku juntʼaykoj. Chantapis uj alojamientoj juchʼuy cuartitonpi tiyakoj, familiantataj mayta faltachaj. Uj pʼunchaytaj uj hermanata khuska llankʼashajtinku qhapariykorqa. Cuartonman kutipuspataj pay kikinwan mana allinchu kasharqa. Chay ratoqa mana luz kasqanrayku laqhapacha kasharqa. Chaypitaj Jehovamanta mañakorqa. Luz kajtinñataj Torremanta Qhawaj revistapi uj yachaqanata tarerqa, maypichus misionerospaj yuyaychaykuna kasharqa chayta. Chay yachaqanaqa parlasharqa llakiyta atipanamanta, waj suyumanta runaswan imaynatachus kausakunamanta ima. Chayta leespa Amyqa repararqa Jehovapis payta parlapashanman jina. Chaytaj ñaupajman rinallanpajpuni  yanaparqa (Sal. 44:25, 26; Isa. 41:10, 13).

13. ¿Imastaj Jehová kamachisninpa willayninkuman churanakojkunamanta jarkʼasqanta rikuchiwanchej?

¹³ Jehovaqa kamachisninta jarkʼan willayninkuman churanakojkunamanta (Fili. 1:7). Sutʼincharinapaj, wakin gobiernosqa mana willajta saqewarqanchejchu, chayraykutaj tribunalesman demandakoj rerqanchej. Jallpʼantinpi 268 demandaspi atiparqanchej. Sutʼincharinapaj, 2000 watamantapacha Tribunal Europeo de Derechos Humanos nisqapi 24 kutista atiparqanchej. Chaytaj Jehová llajtanta yanapananta ni ima jarkʼayta atisqanta rikuchiwanchej (Isa. 54:17; Isaías 59:1 leey).

14. ¿Imastataj Jehovaj yanapaynillanwan ruwashanchej?

¹⁴ Jehovaj yanapaynillanwan sumaj willaykunamanta kay pachaj kʼuchusninpi ima willakushan (Mat. 24:14; Hech. 1:8). Chantapis Jehovaj yanapaynillanwan Jallpʼantinmanta kamachisnin ujchasqas kashanku. Chaytaj Diospa llajtallanpi rikukun. Jehovata mana yupaychaj runaspis ninku: “Cheqamantapuni Dios qankuna ukhupi kashasqa”, nispa (1 Cor. 14:25). Jehová yanapashawasqanchejta ashkha imas rikuchiwanchej (Isaías 66:14 leey). ¿Qanrí kausayniykipi rikunkichu imaynatachus Jehová yanapashasusqanta?

15. ¿Imaraykutaj Jehovaj yanapayninta mana reparasunmanchu?

¹⁵ Wakin kuteqa ichapis mana reparanchejchu Jehová yanapashawasqanchejta. ¿Imaraykú? Ichapis chʼampaykunasnillanchejpi yuyasqanchejrayku qonqapunchej Jehová imaynatachus ñaupajta yanapawasqanchejmanta. Ajinapi rikukorqa profeta Elías. Payqa mana manchachikoj runa karqa. Chaywanpis reina Jezabel wañuchiyta munajtin, Jehová imaynatachus ñaupajta yanapasqanmanta qonqaporqa. Chayrayku Bibliaqa Elías mayta manchachikusqanrayku wañupullaytaña munasqanta nin (1 Rey. 19:1-4). ¿Imaynatataj kallpachasqa  kanman karqa, yanapatapis japʼinman karqa? Jehovaj yanapayninta maskʼaspa (1 Rey. 19:14-18).

16. Chʼampaykunasniyoj kaspa, ¿imataj Jehovaj yanapayninta reparanapaj yanapawasun?

¹⁶ Jobpis Elías jinallataj rikukorqa. Chʼampaykunasninmanta may llakisqa kashasqanrayku, mana Jehová jinachu qhawasharqa (Job 42:3-6). Noqanchejpis chʼampaykunasniyoj kaspa Jehovaj yanapayninta ichá mana reparasunmanchu. ¿Imataj Jehovaj yanapayninta reparanapaj yanapawasun? Biblia chʼampaykunasninchejmanta imatachus nisqanpi tʼukuriy. Ajinata ruwasunchej chayqa, Jehovata rikushasunmanpis jina qhawasunchej. Job jinataj nisunchej: “Kunantajrí, ñawisniywan rikuyki”, nispa.

17, 18. 1) ¿Imaynasmantataj Jehová kausayninchejpi yanapawasunman? 2) Kay tiempopi, ¿imaynatataj Jehová wakin kamachisninta yanapan?

¹⁷ ¿Kausayniykipi imaynatachus Jehová yanapashasusqanta reparankichu? Sutʼincharinapaj, wakin hermanosqa Jehová cheqa religionta tarinankupaj yanapasqanta ninku. Wakenqa uj umallirichiynejta Jehová yanapasqanta ninku. Chayri Jehová mañakuyninkuman kutichispa yanapasqanta ninku. Wakintaj ichapis ninku Jehová, paypaj astawan llankʼanankupaj yanapasqanta. Wajkunataj ninku Jehová tukuy ima necesitasqankuta qosqanta tantakuykunaman, willayman ima rinankurayku llankʼayninkuta saqejtinku (Heb. 13:5). Jehovaj amigosnin kasunchej chayqa, tukuy imaymanamanta yanapashawasqanchejta reparasunchej.

¹⁸ Kenia suyupi Sarah sutiyoj hermanaqa, yachakojnin Bibliamanta yachakusqanta mana jatunpajchu qhawashasqanta yuyarqa. Chayrayku payqa Jehovamanta mañakorqa, yachananpaj yachakojninman yachachinallantapunichus manachus. Mañakuyta tukusqantawantaj telefononman yachakojnin wajyamorqa, paywan tantakuyman riyta atisqantachus manachus tapurinanpaj. Sarahtaqa chay mayta tʼukucherqa. Noqanchejpis Jehová imaynasmantachus yanapashawasqanchejta reparanapaj kallpachakuna. Asiamanta Rhonna sutiyoj hermanaqa Jehová imaynatachus yanapashawasqanchejta reparayta yachakunanchejta nin. Nillantaj: “Yanapayninta reparaspaqa, noqanchejmanta interesakusqanta yachanchej”, nispa.

19. Jehovaj yanapayninta reparanapaj, ¿imatawan ruwananchej tiyan?

¹⁹ Jehovaj yanapayninta reparayta munanchej chayqa llimphu sonqoyoj kananchej tiyan (Mat. 5:8). Chaytaj niyta munan allin imaspi yuyanata, sajra imastataj qhesachanata (2 Corintios 4:2 leey). Kay yachaqanapi yachakunchej Jehovaj yanapayninta reparayta munaspaqa, paypa amigosnin kananchejta. Qhepan yachaqanapitaj yachakusunchej, imaynatachus creeyninchej kausayninchejpi Jehovaj yanapayninta reparanapaj yanapawasqanchejta.