Jatun misionerojina runawa

“Noqata qhawarispa imatapis ruwaychej, imaynatachus noqapis Cristota qhawarispa ruwani, ajinata.” (1 COR. 11:1.)

1. ¿Imaptintaq Jesucristojina ruwananchik tiyan?

APÓSTOL Pabloqa jatun misionero Jesucristojina, ruwarqa. Chayrayku hermanosman nirqa: “Noqata qhawarispa imatapis ruwaychej, imaynatachus noqapis Cristota qhawarispa ruwani, ajinata”, nispa (1 Cor. 11:1). Jesuspis apostolesninman payjina ruwanankuta nirllarqataq. Payqa discipulosninpa chakisninkuta mayllaspa, llampʼu sunqu kasqanta rikuchirqa, nirqataq: “Chayta noqa ruwani, qankunapis noqa jina ruwanaykichejpaj”, nispa (Juan 13:12-15). Jinallatataq, kunan pʼunchaymanta cristianosqa, Jesuspa kʼacha kayninta, kawsayninkupi, parlayninkupi, ruwayninkupi ima, rikuchinku (1 Ped. 2:21).

2. Manapis, Jallpʼapi Diospa llaqtanta Kamachiqkuna, misionerostajina kachawasunchu, ¿paykunajinachu ruwayta munasunman?

² Ñawpaq kaq yachaqanapi, rikurqanchikjina juk misioneroqa, runaman kachasqa, sumaq willaykunata willananpaq kasqanta. Kaymanta parlaspaqa, Pablo achkha tapuykunata, tʼukurichinanpaqjina ruwarqa (Romanos 10:11-15, ñawiriy). Juknin tapuy kay: “[¿]Imaynatataj uyarenqanku, paykunaman mana pipis willajtinri?”. Chaymantataq profeta Isaías qillqasqanmanta uqharispa, nirqa: “Orqo patasninta sumaj willaykunata apamojpa chakisnenqa may kʼachitus kanku”, nispa (Isa. 52:7). Manapis ñuqanchikta misioneros kananchikpaq karu llaqtasman kachawanchikchu, chaywanpis misionerosjina ruwayta atisunman, Jesusjina kusiywan sumaq willaykunata willaptinchik. Qayna wata, 6.957.852 Reinomanta willaqkuna, ‘Evangeliota willarqanku’, 236 llaqtaspi, suyuspi ima (2 Tim. 4:5).

“Noqaykoqa tukuy kapuyniykuta saqerparispa, qanwan purishayku”

3, 4. ¿Imatataq Jesús janaqpachapi saqirqa, ñuqanchik paypa discipulosnin kananchikpaq imatataq ruwasunman?

³ Jesusqa, kay Jallpʼapi ruwayninta juntʼananpaq, “janaj pachapi jatun kaynimpa kʼanchayninta saqespa, payqa kamachi runaj kayninta japʼerqa” (Fili. 2:7). Sutʼita rikunchik, ñuqanchik saqisqanchikqa, mana kikinchakunmanchu Jesús saqisqanwanqa. Chaywanpis, Jesusjina ruwayta atisunman, Satanaspa pachanpi saqisqanchikta mana yuyarikuspa (1 Juan 5:19).

 ⁴ Juk kutiqa, apóstol Pedro Jesusman nirqa: “Noqaykoqa tukuy kapuyniykuta saqerparispa, qanwan purishayku”, nispa (Mat. 19:27). Arí, Pedroqa, Andreswan, Santiagowan, Juanwan ima, Jesuspa waqyasqanta mana iskaychakuspa kasukurqanku, challwa japʼina chʼipasninkutataq saqirqanku. Challwa japʼina llamkʼayninkuta saqiytawan, kawsayninkupi Diosmanta willayta ñawpaqman churarqanku. Lucas Evangeliopis, Pedro nisqanta qillqarqa: “Noqaykoqa tukuy kapuyniykuta saqeraspa, qanwan purishayku”, nispa (Luc. 18:28). Ñuqanchikqa, manachá tukuy kapuyninchikta saqirqanchikchu, Jesuspa qhipanta rinanchikpaqqa. Chaywanpis, ‘ñuqanchikqa tukuy munayninchikta saqirqanchik’, Jesuspa discipulosnin, Jehovata yupaychaq kamachisnin ima kananchikpaq (Mat. 16:24, Dios Parlapawanchej). Chayraykutaq, achkha tʼinkaykunata japʼinchik (Mateo 19:29, ñawiriy). Cristojina tukuy sunquwan willaptinchik, mayta kusichiwanchik, astawanraq juk runallatapis Diosmanta, munasqa Churinmanta ima, yachakunanpaq juk chhikallatapis yanapaptinchik.

5. ¿Imatá achkha runas wak llaqtaspi Diosmanta chiqa kaqta yachakuspa, ruwanku? Juk runa ruwasqanmanta parlariy.

⁵ Brasil llaqtamanta Valmir sutiyuq runa, Surinampi qurita urqhuspa llamkʼaq, chantapis payqa anchata machaq, khuchichakuq ima. Pay wak llaqtapi kachkaptin Jehovamanta sutʼinchaqkuna payman Diosmanta willarirqanku. Chaymanta payqa Bibliamanta sapa pʼunchay yachakuyta qallarinqa, kawsayninpitaq mana allin kaqta saqirqa, chaymantataq bautizakurqa. Pay rikusqanmanjina llamkʼayninqa, yachakusqanmanjina kawsananpaq mana yanapachkarqachu, chayrayku qhapayachiq empresanta venderqa, Brasil llaqtaman kutispataq familianta, Diosmanta sumaq yachaykunata, yachakunankupaq yanaparqa. Jinallatataq achkha runasqa, wak qhapaq llaqtaspi Diosmanta chiqa kaqta yachakuspa, llamkʼayninkuta saqinku, llaqtankuman kutipuspataq, familiankuman wak runasmanpis yachakusqankuta riqsichinku. Kay Reinomanta willaqkunaqa, allinmanta rikuchinku misionerosjina ruwayta munasqankuta.

6. ¿Imatataq ruwasunman, maypichus Reinomanta astawan willaqkunata necesitakun, chayman mana ripuyta atiptinchik?

⁶ Wakin, Jehovamanta sutʼinchaqkunaqa, llaqtallankupitaq wakin ranchospi Reinomanta astawan willaqkunata necesitakusqanrayku, chayman ripunku, wakintaq wak  llaqtasman ripuspa, chaypi Diosmanta willamunku. Ichapis ñuqanchikqa, paykunajina mana ruwayta atisunchu, chaywanpis Jesusjina ruwasunman, atisqanchikmanjinataq willasunman.

Jehová may allinta wakichiwanchik

7. ¿Ima escuelastaq kan, ñuqanchik Reinomanta willaqkunajina astawan sumaqta willananchikpaq?

⁷ Jesustaqa, Tatan may allinta wakichirqa, paytaq chayta mayta japʼikurqa, ñuqanchikpis Jehová kunan pʼunchayninchikpi allinta yachachinawanchikpaq, wakichisqanta mayta japʼikunanchik tiyan. Jesusllataq jinata nirqa: “Profetaspa qhelqasqampi nin: [Jehová] Diosqa tukuyman yachachenqa”, nispa (Juan 6:45; Isa. 54:13). Kunanqa, Reinomanta willaqkunata allinta wakichinapaq, sumaq escuelas nisqata ruwakun. Tukuychá aswan sumaqta yachakunchik, kay Diosmanta Parlayta Yachanapaq, tantakuypi. Precursorespis, kay Escuela del Servicio de Precursor nisqaman rinku; unaytaña precursores kaqkunaqa iskay kutitaña kay escuelaman rinku. Ancianos, chayri siervos ministeriales kaqkunapis kay Escuela del Ministerio del Reino nisqaman rinku, jinamanta astawan sumaqta yachachinankupaq, chantapis hermanosninkuta astawan yanapanankupaq. Mana warmiyuq kaqkunataq, kay Escuela de Entrenamiento Ministerial, nisqaman riyta atinku, chaypitaq sumaqta kay hermanosta yachachinku, qutumanta willaqkunata yanapanankupaq. Chantapis, may achkha hermanos, hermanas ima, wak llaqtasman kachasqa kanku, kay Escuela Bíblica de Galaad de la Watchtower, nisqaman risqankurayku.

8. Wakin hermanos, ¿allinpaqchu qhawanku Jehová ruwasqanta paykunata wakichinanpaq?

⁸ Achkha, Jehovamanta sutʼinchaqkuna, chay escuelasman rinankupaq may allin imasta saqinku. Juk hermano, Canadá llaqtapi Yugu sutiyuq, llamkʼayninta saqipurqa, kay Escuela de Entrenamiento Ministerial, nisqaman rinanpaq, mana llamkʼayninpi permisota qusqankurayku. Yugu nin: “Mana chaymanta pesachikunichu; permisota quwankumanchus karqa, chay llamkʼayniypi astawanraq qhipakuyman karqa, chay khuyakuyninman kutichinaypaq. Chaywanpis, kunanqa mana imapis watawanchu, rinaypaq maymanchus Jehová kachawayta munan, chayman.” Rikunchikjina, may chhika hermanos tukuy imata saqinku, Diosninchik paykunata sumaqta wakichinanpaq (Luc. 5:28).

9. Parlariy, imaynatachus Bibliamanta yachakuy, sunqumanta yachakuyta munay ima, aswan sumaq kasqanta.

⁹ Bibliamanta yachakusqanchikmanjina, sunqumanta ruwaptinchikqa, aswan allin ruwaykunata ruwasunchik (2 Tim. 3:16, 17). Kayta rikuchiwanchik, Saulo sutiyuq wawita, payqa Guatemalapi pisi yuyayniyuq nacekurqa. Yachay wasipitaq juk yachachiq Saulop mamanman nirqa, ‘ama anchata Saulota ñawiriyta yachananpaq matʼinkichu, mana sunqunta pʼakinaykipaq’, nispa. Ajinamanta Saulo mana ñawiriyta yachaspa, chay yachay wasita saqipurqa. Chaywanpis, Jehovamanta sutʼinchaq juk hermano Saulota ñawiriyta yachachirqa, kay Ñawiriyman qillqayman qukuy, folletowan. Aswan qhipamantaq, Sauloqa allintapuni yachakuspa, kay Diosmanta Parlayta Yachanapaq tantakuypi, yachachiyta qallarirqa. Juk pʼunchay, Saulop mamanqa willachkaspa Saulop ñawpaq kaq yachachiqninwan tinkurqa. Willarqataq Saulo ñawiriyta yachasqantaña, kay yachachiqtaq nirqa qhipan semanata wawanwan kutimunankuta. Saulo kutiptintaq, kay yachachiqqa tapurqa: “¿Imatá yachachiwanki, Saulo?”, nispa. Paytaq kay ¿Imatapunitaq Biblia yachachin?, libromanta ñawirirqa, kay yachachiqtaq nirqa: “¡Mana creeyta atinichu, qam ñuqaman yachachiwachkasqaykitaqa!”, nispa. Waqay ñawillataq, Saulota uqllaykurqa.

Sunquman chayaq yachachiykuna

10. ¿Ima sumaq librotaq kapuwanchik Bibliamanta chiqa kaqta yachachinapaq?

¹⁰ Jesusqa, Jehovamanta yachakusqanmanjina, Diospa Palabranmanta ima yachachirqa (Luc. 4:16-21; Juan 8:28). Ñuqanchikqa, Jesusjina ruwasunchik, pay nisqanta kasukuspa, chantapis Diospa Palabranmanjina yachachispa.  Jinamanta, tukuypis kikinta parlasunchik, kikinta yuyasunchik, aswan jukchasqataq kasunchik (1 Cor. 1:10). ‘Allin kamachi, yuyayniyuqqa’ Bibliamanta publicacionesta ruwan, tukuy pachantinpi juk yachachiyllata yachachinawanchikpaq, chantapis willayninchikta juntʼananchikpaq. ¿Manachu chay ruwasqanmanta mayta pachis ninchik? (Mat. 24:45; 28:19, 20.) Chay publicacionesmanta jukninqa, ¿Imatapunitaq Biblia yachachin?, libro, chaytaq 179 simispi urqhukun.

11. ¿Imaynatá Etiopiamanta juk hermana churanakuyta, Yachachin librowan atiparqa?

¹¹ Runaman, Yachachin librowan Bibliamanta yachachiptinchik, ichapis ñuqanchikwan churanakuqkunapta yuyayninku tikrakunman. Etiopía llaqtapi, juk precursora Lula sutiyuq Bibliamanta yachachichkarqa, chayllapi yachakuqpa familianmanta juk warmi phiñakuspa rikhurirqa, nirqataq paykuna mana yachananku kasqanta. Mana phiñakuspalla Lulaqa, allinllamanta chay warmita tʼukurichirqa, kay Yachachin libromanta 15 yachaqanapi, qhasi qullqimanta rikchʼanachinawan. Chaymanta chay warmiqa manaña phiñakurqachu, manaqa Lula yachachinallantapuni saqirqa. Mana chayllachu, Lula kutimunanta paypis suyachkarqa, Bibliamanta yachakuyta munasqanta willarqa, chaypaqtaq qullqitapis quyta munarqa. Juk chhika tiemponmantaq, semanapi kimsa kutita yachakuchkarqa, sumaqtataq ñawparichkarqa.

12. Parlariy, imaynatachus waynakunapis, sipaskunapis Bibliamanta yachachiyta atisqankuta.

¹² Wayna kaqkuna, sipas kaqkunapis, runata yanapankuman, Yachachin librowan. Hawai llaqtapi, juk lluqallitu 11 watayuq Keanu sutiyuq, yachay wasipi Yachachin, librota ñawirichkarqa, chayllapi wak lluqallitu payta tapurqa: “¿Imaptintaq diachakuta mana ruwankichu?”, nispa. Keanutaq kay librop yapanta rikuchispa ñawirirqa, “¿Raymikunata ruwananchikchu tiyan?”, nisqata. Chaymanta librop kapuynin nisqata rikuchispa, mayqintachus astawan yachakuyta munasqanta tapurirqa, Bibliamantataq yachachiyta qallarirqa. Qayna watapi, Jehovamanta sutʼinchaqkuna 6.561.426 runasta Bibliamanta yachachirqanku, chaykunamantataq achkha runata, Yachachin, librowan yachachirqanku. Qamri, ¿kay librowanchu runata Bibliamanta yachachichkanki?

13. ¿Imaynatá runata Bibliamanta yachakuy yanapan?

¹³ Yachachin, librowan Bibliamanta yachachiyqa, Diospa munayninta ruwayta munaqkunata allinta yanapan. Noruega llaqtapi, juk qhariwarmi precursores especiales Bibliamanta yachachiyta qallarinqanku Zambiamanta juk kimsa wawayuq familiaman. Kay matrimonioqa manaña astawan wawasniyuq kayta munarqankuchu, chayrayku warmi watiqmanta wiksallikuptin, paykunaqa chay  wawitata urqhuchiyta munarqanku. Chaymantataq, manaraq doctorpaman richkaspa, chay pʼunchaykunapi yacharqanku, “Diosjina kawsaytaqa qhawarinnanchik tiyan”, sutichasqa yachaqanata. Juk fotopi mamanpa wisanpi juk wawitata rikurqanku, chayta rikuytawantaq manaña chay wawitata wañuchiyta munarqankuchu. Chay matrimonioqa sumaqta ñawparirqa, chay wawitanku nacekuptintaq chay yachachiq hermanop sutinta churarqanku.

14. Juk hermana ruwasqanmanta parlariy, yachachisqanchikmanjina kawsay allin kasqanta rikuchinapaq.

¹⁴ Jesusqa, yachachisqanmanjina kawsakuq. Ñuqanchikqa payjina ruwasqanchikrayku, allin kaqta ruwanchik, chaytataq achkha runas rikunku. Qhawanachik juk hermana ruwasqanta. Nueva Zelandamanta, juk empresariop autonmanta maletinninta suwarqanku. Chay runaqa policiaman rispa, chay suwasqankuta willamurqa, juk policiataq nirqa: “chay maletinniykitaqa tarikapuyta atinki, Jehovamanta sutʼinchaqkunalla tariptinku”, nispa. Chaymanjinataq, juk Jehovamanta sutʼinchaq chay maletinta tarikurqa. Chay runaman maletinninta tarisqankuta willaptinkutaq, chay hermanap wasinman rirqa, maletinninta qhawaykuspataq manaña llakikurqachu, imaraykuchus chayllapipuni juk sumaq documento kakuchkarqa. Chay hermantaq nirqa: “Qampa imasniykitaqa ñuqapaq manapuni qhipachikuymanchu, imaptinchus ñuqaqa Jehovamanta sutʼinchaq kani”, nispa. Chay runataq chay paqarin imatachus nisqankuta yuyarikuspa, tʼukulla qhipakurqa. Rikunchikjina Jesuspa chiqa discipulosninqa, Yachachiqninjina Biblia yachachisqanta kawsayninkupi ruwanku (Heb. 13:18).

Jesusjina runata allinpaq qhawanachik

15, 16. ¿Imaynatá runasta chiqa kaqman pusamusunman?

¹⁵ Jesús runata allinpaq qhawasqanrayku, tukuypis payta uyariyta munarqanku. Pay munakuyniyuq, llampʼu sunquyuq kasqanrayku, llampʼu sunquyuq runas payta maskʼaq kanku. Payqa runata khuyakuq, munakuywan sunquchaq; wakinkunatataq jampirqa ima (Marcos 2:1-5, ñawiriy). Ñuqanchikqa mana milagrosta ruwayta atinchikchu, chaywanpis munakuyninchikta, khuyakuyninchikta, llampʼu sunqu kasqanchikta ima, rikuchiyta atisunman, chayjinamanta wak runastapis Diospa llaqtanman pusamusunman.

¹⁶ Juk hermanaqa Tariua sutikurqa, payqa Kiribati islaspi willaq, chaytaq mama qucha Pacífico sur nisqapi kachkan, paytaqa astawan willananpaq khuyakuynin yanapaq, precursora especialtaq karqa. Tariuaqa, juk machitup punkunta takarqa, chay machituqa Beere sutikurqa, paytaq mana uyariyta munasqanta nirqa. Kay hermanaqa, chay machitu mana sanuchu kasqanta rikuspa, khuyakurqa. Jinatataq tapurqa: “¿Maykʼaqpis uyarirqankichu Diosninchik imatachus unqusqaspaq, machituspaq ima, ruwananta?”, nispa. Chaymantataq Isaías librop pʼitinta ñawiripurqa (Isaías 35:5, 6, ñawiriy). Chay runataq, kutichirqa: “Achka watastaña Bibliata ñawirini, religionniymantaq sapa kuti yachachiq jamuwanku, manataq jaykʼaqpis kaytaqa ñawirirqanichu”, nispa. Beereqa Bibliata yachakuyta qallarirqa, sumaqtaq ñawparirqa Bautizakunankama. Manapis ñawpaqta payqa sanituchu karqa, kunanqa karupi juk juchʼuy qututa yanapachkan, chay islapitaq sumaq willaykunata willananpaq chakipi rin.

Cristojina ruwanallapuni

17, 18. a) ¿Imatá ruwananchik tiyan, sumaq willaqkuna kananpaq? b) ¿Imataq kanqa Jesusjina allinta willaqkunapaq?

¹⁷ Rikunchikjina willachkaspa, tukuypis sumaq  willaqkuna kasunman, Jesusjina kʼachas kaptinchik, chaytataq runaman rikuchiptinchik. Chayrayku, Yachachiqninchikjina kananchik tiyan, kusiywantaq willananchik tiyan.

¹⁸ Ñawpaq kaq siglopi, Jesuspa discipulosninman tikrakuqkunamanta, Pedro tapurqa: “[¿]Imataj noqaykupaj kanqari?”, nispa. Jesustaq jinata kutichirqa: “Pillapis wasisninta, wawqesninta, panasninta, chayri tatanta, mamanta, warminta, chayri wawasninta, jallpʼasninta ima noqaj sutiyrayku saqejqa, tukuy imamanta pachaj kutitawan japʼikaponqa, wiñay kawsaymantaj yaykonqa”, nispa (Mat. 19:27-29). Chayta ñuqanchikpis japʼisunchik, jatun misionero Jesucristojina ruwaptinchik.

¿Imatataq kutichiwaq?

• ¿Imaynatá Jehová sumaqta willananchikpaq wakichiwanchik?

• ¿Imaraykutaq sumaqtapuni willayninchikpi Yachachin libro yanapawanchik?

• ¿Imaynatá Jesusjina runata allinpaq qhawasunman?

[Tapuykuna]

[23 paginapi dibujo/foto]

Jesús Pedrota, Andresta, Santiagota, Juanta ima, paywan khuska rinankupaq waqyariptin, paykunaqa mana iskaychakuspa qhipanta rirqanku

[25 paginapi dibujo/foto]

Kay Yachachin libroqa, tukuy pachantinpi runata Bibliamanta yachachinapaq yanapawanchik