Juk mañakuyta tukuy mañakunku

KAYPI tʼukuriy, Diosman may chhika runas juk mañakuyllata mañakuchkanku. Chay mañakuytaqa juk sutiwan riqsikun, chaywanpis juk chhikalla imatachus mañakuchkasqankuta yachanku. ¿Jinachu kanman? Arí, sapa pʼunchay jinata mañakunku. Chanta, ¿imatataq mañakunku? Diospa Reinon jamunanta.

Kimsa chunka qanchisniyuq waranqa religiones kasqankuta nikun, chaypitaq 2.000.000.000 runas kasqankuta, paykunaqa Cristop yachachisqanta juntʼasqankuta ninku. Chayrayku padrenuestro nisqata mañakunku. Qampis chay mañakuytaqa yachankichá. Chayta Jesús discipulosninman yachachirqa, jinatataq qallarin: “Janaj pachapi kashaj tatayku, sutiyki jatunchasqa kachun. Reinoyki jamuchun munayniykitaj ruwasqa kachun, imaynachus janaj pachapi, ajinallatataj kay pachapipis”, nispa (Mateo 6:9, 10).

Chay religionmanta kaqkunaqa, may unaytaña kay mañakuyta kutin kutita may jatunpaq qhawaspa, iglesiasninkupi, familiankupi, sapitallankupipis mañakunku. Chantapis sunqu kʼajaywan, tukuy sunqu ima, allin kachkaspa, mana allin kachkaspapis kay mañakuyta mañakunku. Wakinkunataq, manapis imatachus mañakuchkasqankuta yachaspa, yuyaynillankumantaña kutin kutita mañakunku. Kay mañakuypi, Diospa Reinon jamunanta mana cristianos nichikuqkuna mañakuchkan, nitaq paykunallachu suyakuchkanku.

Tukuy religiones mañakunku

May riqsisqa mañakuy judaísmo nisqamanta, qaddish mañakuy, chay mañakuytaqa runa wañuptin mañakunku. Manapis kay mañakuyqa, wañusqasmantachu, nitaq wañusqaspaq waqaymantachu parlachkan, runa wañuptin chayta rezanku. Kay mañakuyqa nin: “Kunan pʼunchaykunapi Pay [Dios] Reinonta sayachikuchun [...] jinallataq qhipa pʼunchaykunapipis”. * Unaymantapacha wak mañakuyta sinagogaspi mañakullaqtaq kanku, chaypi Davidpa mirayninmanta Mesiaspa Reinon jamunanta suyachkasqankuta rikuchinku.

Mana cristiano religionkunamanta wakinqa, Diospa Reinon sayachisqa kasqanmanta uyarispa, astawan yachayta munanku. Kay The Times of India, periodico nisqanmanjina, Indiamanta religionta kamachiq, may jatunpaq qhawasqataq runa, 19 siglopi hinduismota, islamta, cristianismota ima, jukchakuyta munaspa jinata nirqa: “Diospa chiqa Reinonqa chayamunqa, Oriente Occidentewan jukchakuptinku”, nispa. Kunallanraq, universidad islámica Strathfield (Australia) nisqamanta kamachiq, juk periodicoman jinata qillqarqa: “Tukuy musulmanesjina ñuqapis, Jesús kutimunanta, paytaq Diospa Reinonta chiqamanta sayachinanta ima, creeni”, nispa.

Rikunchikjina, Diospa Reinonta mañakuqkuna, suyaqkuna ima, may achkha kanku.

Ichapis, yachankiña, Jehovamanta sutʼinchaqkuna, kay revistata ruwaqkuna, wasimanta wasi punkuta takaspa purinku, Bibliamanta runawan parlanankupaq. Kunanqa paykunaqa, tukuy pachantinpi 236 suyuspi, chantapis 400 simismanta aswan kuraq simispi willachkanku. Kay willaypitaq Diospa Reinonmanta astawan parlakun. Kay: Torremanta Qhawaq. Jehová Diospa Reinonmanta willachkan, revistap titulonta ñawiriy. Sapa kuti runasman tapuriyku, chay Reinota mañakuchkankuchus manachus, paykunataq mañakuchkasqankuta ninku. Chaywanpis, ¿imataq chay Reinori?, nispa tapuriptiykutaq, achkha runaqa mana yachanichu nispa kutichin, wakintaq imatachus chay Reinomanta yuyasqankumanjinalla kutichinku.

¿Imaraykutaq may achkha runa Diospa Reinonta mañakunku, mana imachus chay mañakuy kasqanta yachaspapis? ¿Chay Reinoqa may yuyayniyuq runallapaqchu, chayri mana sutʼinchanapaqjinachu? Mana: Bibliaqa imachus chay Reino kasqanta sutʼita willawanchik, chantapis kay mana allin tiempopi kawsaqkunaman juk suyayta quwanchik. Qhipan yachaqanapi, Biblia imaynatachus chay suyaymanta parlasqanta yachakusunchik, chantapis Jesús Reino jamunanmanta mañakusqan, imaynatachus juntʼakunanta qhawasunchik.

[Sutʼinchaynin]