Jesuspa yachachiykunasnin

Wiñay kawsayta suyakuymanta

¿Jesús, janaqpachapi runas wiñay kawsayta japʼinankutachu nirqa?

Ari, kawsarimuytawan Tatanwan kananpaq pay kikin janaqpachaman ripurqa. Chantá niraq ripuchkaspa, 11 apostolesninman nirqa: “Tatay kashan, chaypi ashkha wasis tiyan; [...] kunanqa rishani qankunapaj uj cheqata wakichimoj”, nispa (Juan 14:2). Chaywanpis wakin discipulosnillan janaqpachaman rinanku karqa. Paykunatataq Jesús ‘juchʼuy tropa ovejaswan’ kikincharqa, nirqataq: “Juchʼuy tropa ovejasniy, ama manchachikuychejchu, imaraykuchus Tataykichejqa reinonta qankunaman qoyta munan”, nispa (Lucas 12:32).

Janaqpachaman riqkuna, ¿imatá ruwanqanku?

Diosqa, juchʼuy tropamanta kaqkuna Cristowan khuska janaqpachamanta Jallpʼata kamachimunankuta munan. ¿Imarayku chayta ninchik? Imaraykuchus kawsarimuq Jesucristoqa, apóstol Juanman, wakin chiqa sunqu cristianos ‘kay pachata kamachimunankuta’ willarqa (Apocalipsis 1:1; 5:9, 10). ¡Chayta yachayqa mayta kusichiwanchik! Imaraykuchus tukuypis juk sumaq kamachiq kamachinawanchikta munanchik, ¿icharí? Chaywanpis, ¿imatá Jesús kamachichkaspa ruwanqa? Pay kikin nirqa: “Tukuy ima mosojman tukojtin, Runaj Churin kamachinan jatun tiyanampi tiyaykukojtintaj, qhepayta jamusqaykichejrayku qankuna chunka iskayniyoj kamachina tiyanaspi tiyaykukullankichejtaj”, nispa (Mateo 19:28). Arí, Jesuswan akllasqa discipulosninwan kamachichkaspa, tukuy imata ‘musuqman  tukuchinqanku’, Adanwan Evawan manaraq juchallikuchkaptinku imaynachus kawsay karqa chayjinaman.

¿Imataq kanqa mana janaqpachaman riqkuna cristianosmanta?

Jesús nirqa: “Qankunaqa kay uramanta kankichej, noqatajrí patamanta kani”, nispa (Juan 8:23). Arí, Diosqa, runata ruwarqa kay Jallpʼallapi kawsakunanpaq (Salmo 115:16). Chayrayku Jesusqa, kay Jallpʼapi wiñay kawsayta tariyta atisqanchikta nirqa. Chantá nillarqataq: “Kusikuyniyojmin kanku llampʼu sonqoyojkunaqa, imaraykuchus paykuna kay pachata herenciankupaj japʼenqanku”, nispa (Mateo 5:5). Kayta nispaqa, Salmo 37:11, 29 pʼitikunamanta parlachkarqa, maypichus nin: “Llampʼu sonqoyojkunatajrí kay pachata herenciata jina japʼenqanku, allin kawsaypitaj kusisqa kanqanku. Cheqan runasqa kay pachata herenciankupaj japʼenqanku, chaypitaj wiñaypaj kawsanqanku”, nispa.

Rikunchikjina, Jallpʼantinmanta achkha runaspis wiñay kawsayta japʼiyta atillanqankutaq. Jesús nirqa: “Diosqa chay jinatapuni kay pachapi kaj chhikata munakusqanrayku, uj kʼata Churinta qorqa. Ajinamanta pillapis paypi creejqa mana chinkayman renqachu, astawanqa wiñay kawsayniyoj kanqa”, nispa (Juan 3:16).

¿Imaynatá Dios ñakʼariyta chinkachinqa?

Jesús nirqa: “Kunanqa kay pachaman juicio chayamun. Kunanmá kay pachata kamachejqa jawaman wijchʼusqa kanqa”, nispa (Juan 12:31). Diosqa, ñakʼariyta chinkachinanpaq, saqra runastaraq ñawpaqta chinkachinqa. Chaymantataq Satanasta, Jallpʼamanta “jawaman wijchʼu[nqa]”, jinamanta manaña runasta pantachinanpaq.

Chaywanpis unay tiempomantapacha kunan tiemponchikkama, achkha runas mana Diosmanta nitaq Jesucristomantapis yachakurqankuchu paykunapi creenankupaq. ¿Imataq paykunamanta kanqa? Kay tapuyman kutichinapaq Jesús kurkupi warkhusqa kachkaspa, ladonpi kaq suwaman imatachus nisqanta ñawirina, Jesús nirqa: “Ñuqawan Paraisopi kanki”, nispa (Lucas 23:43). Arí, chay runajina achkha runas kawsarimuytawan Diosmanta astawan yachakuyta atinqanku. Jinamanta llampʼu sunquyuqkunawan khuska, paraisopi wiñaypaq kawsakuyta akllayta atinqanku (Hechos 24:15).

Astawan yachakunaykipaq, ¿Imatapunitaq Biblia yachachin? *, libromanta 3, 7 yachaqananta ima ñawiriy.

[Sutʼinchaynin]

[19 paginapi dibujo/foto]

“Cheqan runasqa kay pachata herenciankupaj japʼenqanku, chaypitaj wiñaypaj kawsanqanku.” (Salmo 37:29)