“Filósofo Platonqa, infierno yachachiyta astawan yachachirqa, chayrayku chay yachachiy astawan rikhurirqa.” (Historia de los infiernos [Infiernomanta sutʼinchaynin], de Georges Minois, página 64.)

“Iskay kaq siglomantapacha, griegospa yachachiyninkupi yachachisqas cristianosqa, imapichus creesqankuta griegospa yachachiykunasninkumanjinalla sutʼinchayta qallarirqanku [...]. Astawanraq Platonpa yachachiykunasninmanjina.” (The New Encyclopædia Britannica, 1988.)

“Iglesiapiqa, infierno kasqantapuni yachachikun. Saqra runas wañupuptinku almasninkuqa infiernoman ripunku, chaypitaq ‘nina lawraypi’ wiñaypaq ñakʼarinku [...]. Infiernopi kaqkunaqa, wiñaypaq Diosmanta karunchasqas kanku.” (Catecismo de la Iglesia Católica, tercera edición revisada, página 242.)

“Kawsashajkunaqa wañunankuta yachakunku; wañusqasrí mana imatapis yachankuchu, [...] imaraykuchus wañuspa maymanchus rinki, chaypeqa manaña ima ruwanapis kanchu, ni yachana, nitaj yachaypis.” (Eclesiastés 9:5, 10, Qheshwa Biblia.)

Kay pʼitikuna nisqanmanjina, ¿wañupuqkuna juchasninkumanta paganankupaq infiernopichu ñakʼarichkanku? Mana, imaraykuchus kay pʼitikuna nisqanmanjina wañupuqkunaqa, “mana imatapis yachankuchu”, nisunman, manaña imatapis sientenkuchu. Chayrayku juk kuti Job juk unquyrayku mayta ñakʼarichkaspa, Diosmanta jinata mañakurqa: “Allin kanman wañupuypa kamachiyninpi pakaykunawayki”, nispa (Job 14:13, Qheshwa Biblia). Jobpa mañakusqanqa, juk runa wañupuspa aya pʼampana tʼuqullaman ripusqanta, manataq ñakʼarinanpaq infiernomanchu ripusqanta rikuchiwanchik.

Chantá Biblia nisqanmanjina, Jehová Diosqa munakuymin, chayrayku ni jaykʼaq juk runata wiñaypaq ñakʼarichinmanchu imallapipis juchallikusqanmanta (1 Juan 4:8). Chaywanpis, saqra runaspa almasninku infiernopi ñakʼarichkasqanku llulla yachachiy kaptin, ¿kʼacha runas wañupuspa janaqpachaman ripusqanku yachachiyri, llulla yachachiyllataqchu?

Kay pʼitikunap nisqanpi tʼukuriy: Salmo 146:3, 4; Hechos 2:24-27; Romanos 6:7, 23.