Pay kikinmanta imastachus yachachisqan

“Jesusqa, pichus pay kasqanta, maymantachus jamusqanta, imapaqchus Jallpʼaman jamusqanta, imaynatachus ñakʼarinanta ima sutʼita yacharqa.”(HERBERT LOCKYER, QILLQAQ)

JESUSPI, yachachiykunasninpi ima iñinanchikpaqqa, pichus pay kasqanta, maymantachus jamusqanta, imapaqchus Jallpʼaman jamusqanmanta ima, allintaraq yachananchik tiyan. Tawa Evangeliospiqa, Jesusllataq tukuy chaykunata sutʼinchawanchik.

Niraq Jallpʼaman jamuchkaspa janaqpachapi kawsachkarqa Juk kuti Jesús nirqa: “Manaraj Abraham kashajtin, noqaqa kani”, nispa (Juan 8:58). Jesusqa, Abraham kawsasqanmanta iskay waranqa watanmanraq nacekurqa, jina kaptin, ¿imaraykutaq Jesús manaraq Abraham kachkaptin kasqantaña nirqa? Jesusllataq chay tapuyman kutichirqa, nirqataq: “Janaj pachamanta uraykʼamorqani”, nispa (Juan 6:38).

Diospa Churin Janaqpachapi angelesqa, Diospa wawasnillantaq kaptinkupis, Jesusqa, paylla “Diospa kʼata Churin” kasqanta nirqa (Juan 3:18). Imaraykuchus Jehovaqa, payllata mana piqpa yanapayninwan ruwarqa. Tukuy kaq chhikatataq Jesusniqta ruwarqa (Colosenses 1:16).

‘Runap Churin’ Jesusqa, pay kikinmanta parlananpaq ‘Runap Churin’ nisqa rimayta astawan uqhariq (Mateo 8:20). Jinamanta juk runapuni kasqanta, manataq runaman tukuq Dioschu kasqanta ima sutʼinchaq. Jehová Diosqa, espíritu santonniqta Mariap wiksanman, Churinpa kawsayninta churarqa. Ajinamanta Jesusqa, mana juchayuq runajina nacekurqa (Mateo 1:18; Lucas 1:35; Juan 8:46).

Paypuni Mesías karqa Juk kuti Samariamanta juk warmi Jesusta nirqa: “Yachani Cristo nisqa Mesías chayamunanta”, nispa. Jesustaq kutichirqa: “Noqa chay Cristo kani, pichus parlashasunki, chay”, nispa (Juan 4:25, 26). Mesías chayri cristo rimayqa, “akllasqa” niyta munan. Wak parlaypi nisunman Diosqa, munayninta juntʼananpaq Jesusta akllasqanta.

Diospa Reinonmanta willananpaq kachamusqa karqa Jesusllataq nirqa: “Diospa reinonmanta evangeliota willamunallaytaj tiyan, imaraykuchus chaypaj kachamusqa kani”, nispa (Lucas 4:43). Runata yanapananpaq milagrosta ruwaspapis, runasman Diospa Reinonmanta willay astawan sumaq paypaq karqa. Qhipan yachaqanaspi Diospa Reinonmanta imatachus yachachisqanta ukhuncharisunchik.

Rikunchikjina Jesusqa, mana mayqin runajinallachu karqa. * Niraq Jallpʼaman jamuchkaspa janaqpachapi kawsakusqanrayku, Jesusqa, Diosmanta chiqa kaqta yachachiyta atirqa. Chayrayku yachachiykunasninqa kunankama achkha runasta yanapachkallanpuni.

[Sutʼinchaynin]