¿Imaraykutaq Jesús politicaman mana chhapukurqachu?

KAY 32 watamanta juk pʼunchayqa, may chhika runas, Mesiaspa yachachiyninta uyarichkarqanku. Jesustaqa, unqusqasta jampisqanmanta, wañusqasta kawsarichisqanmanta ima, sumaqta riqsirqanku. Chantapis, chay pʼunchaypi milagrosta ruwasqan, Jehovamanta yachachisqan ima, runasta tʼukullata saqirqa. Chantá Jesusqa, runasta qutuspi tʼaqarqa, Diosmanta mañakuytawantaq, juk milagrota ruwaspa tukuyta mikhuchirqa. Puchuq mikhunatataq, mana usunanpaq tantaykuchirqa. Chayta rikuspa, ¿imatataq runas ruwarqanku? (Juan 6:1-13.)

Jesusqa, runaspa allinninkuta maskʼaq, milagrosta ruwaq, sumaq yuyayniyuqtaq karqa. Chayrayku, reyninkupaq qhawarqanku (Juan 6:14). Chaytaq mana tʼukunapaqjinachu. Imaraykuchus munasqa suyunkuqa, juk saqra suyup atiyninpi kachkarqa. Chayraykutaq, kacharichikunankupaq juk sumaq kamachiqta maskʼachkarqanku. Jinamanta, Jesusta munaqta mana munaqta, kamachiqta ruwayta munarqanku. ¿Imatá pay ruwarqa?

Biblia sutʼinchan: “Jesusrí munajta mana munajta reyninku kanampaj payta pusanankuta yachaspa, watejmanta orqoman kutirerqa, sapallan kayta munaspa” (Juan 6:15). Jesusqa, ruwasqanwan politicapi, mana chhapukuyta munasqanta rikuchirqa. Chay yuyaynintaq, ni jaykʼaq tikrakurqachu. Discipulosninmanpis, payjina ruwanankuta kamachirqa (Juan 17:16). ¿Imaraykutaq jinata yuyarqa?

¿Imaraykutaq Jesús politicapi mana chhapukurqachu?

Kay tapuyman kutichinapaqqa, Bibliamanta iskay yuyaychaykunata ukhunchana.

“Runaqa runa masinta chakisnin uraman churan paypa mana allinnillampaj.” (Eclesiastés 8:9.) Kay pʼitiqa, runap kamachisqanmanta allinta sutʼinchan. Yuyarikuna, Jesusqa, niraq Jallpʼaman jamuchkaspa, unaytaña janaqpachapi kawsarqa (Juan 17:5). Chayrayku, runas sumaq sunquyuq kaspapis, mana kamachiyta atisqankuta yacharqa. Imaraykuchus Diosqa, mana chaypaqchu runasta ruwarqa (Jeremías 10:23). Jesusqa, runap kamachiynin, chʼampaykunata ni jaykʼaqpis allinchananta yacharqa.

“Kay pachapi kaj chhika runastaj Kuraj Supaypa atiynimpi ka[chkanku]”. (1 Juan 5:19.) Wakin runasqa, chiqamantapuni runaspa kawsayninta allinchayta munaspa, politicaman yaykunku. May allin sunquyuq kamachiqpis, Jesús nirqajina ‘kay pachata kamachiqpa’ atiyninpi kachkan (Juan 12:31; 14:30). Chayrayku, juk kamachiqman, nirqa: “Reinoyqa mana kay pachamantachu” (Juan 18:36). Chayta nichkaptinqa, Diospa Reinonpi Rey kayta suyakuchkarqa. Chayrayku, politicapichus chhapukunman karqa chayqa, Tatanpa kamachiyninta wasanchanman karqa.

Jesús, ¿kamachiqkunata mana kasukunanchiktachu niyta munarqa? Mana. Astawanpis payqa, kamachiqkunata kasukunata yachachirqa. Chantapis, Diospa kamachiykunasninta juntʼanata nillarqataq.

Jesusqa kamachiqkunata kasukurqa

Jesús templopi yachachichkaptin, enemigosnin, impuestosta paganamanta tapuspa pantachiyta munarqanku. “Mana paganachu” ninman karqa chayqa, kamachiqkunap contranpi uqharikuchkasqanta ninkuman karqa. Runastaq, romanospa contranpi uqharikuyta  munankuman karqa. “Impuestota pagana tiyan” ninman karqa chaytaq, runasqa, ñakʼarisqankuta allinpaq qhawasqanta yuyankuman karqa. ¿Imaynatá Jesús kutichirqa? Pay nirqa: “Cesarpata kajtaqa Cesarman qopuychej, Diospa kajtataj Diosman qopuychej”. Chay sumaq kutichiyninqa, maychus kasqanta yuyasqanta rikuchirqa (Lucas 20:21-25). ¿Imatá chaymanta yachakunchik? Cristianosqa, Diospa kamachiyninta, runaspa kamachiyninta ima, kasukunanchik kasqanta.

¿Imaraykutaq runaspa kamachiyninta kasukuna tiyan? Qallarinapaq, kamachiqkunaqa, mana chʼaqwas kananpaq, runas allinta kawsakunankupaq ima, yanapanku. Chayrayku, runasman chiqan kaqta ruwanankuta, impuestosta paganankuta, leyesta kasukunankuta ima, kamachiyta atinku. Jesuspis, “Cesarpata kajtaqa Cesarman” pagapurqa. Jesuspa, tatasninqa leyesta kasukunanta, mana payta yanapaptinpis yachachirqanku. Sutʼinchanapaq, Romamanta kamachiqqa, tukuy runas yupasqa kanankupaq llaqtankuman rinankuta kamachirqa. Josewan Mariawanqa, chay kamachiyta kasukuspa, 150 kilometrosta Belenkama viajarqanku. Mariataq wiksallisqa kaspapis, rirqa (Lucas 2:1-5). Kikillantataq Jesusqa, mana pagana impuestotapis, leyta juntʼananrayku pagarqa (Mateo 17:24-27). Payqa, Diospa Churin kasqanrayku, tukuy imata ruwananpaq atiyniyuq karqa. Chaywanpis mana munasqanta ruwarqachu (Lucas 12:13, 14). Kamachiqkunata jatunpaq qhawarqa. Chaywanpis, mana paykunawan chhapukuyta munarqachu. Chantá, “Diospa kajtataj Diosman qopuychej” nispa, ¿imatá niyta munarqa?

 “Diospa kajtataj Diosman qopuychej”

Juk kutiqa, Jesusta tapurqanku: “Diospa kamachisqanmanta, ¿mayqintaq aswan kuraqrí?”, nispa. Paytaq kutichirqa: “Señor Diosniykitaqa munakunki tukuy sonqoykiwan, tukuy almaykiwan, tukuy yuyayniykiwantaj. Chaymin leypa kamachisqasninmanta aswan kuraj, ñawpaj kajtaj. Qhepan kaj kamachisqapis ñawpaj kajman rijchʼakullantaj: Runa masiykita munakunki qan kikiykita jina” (Mateo 22:37-39). Chayrayku, Jehovaqa payta munakunanchikta, paymanta ni imata suyaspalla chiqa sunqu kananchikta ima, mañawanchik. Chayta ruwaspaqa, ‘Diospa kaqta’ Diosman pagachkanchik.

Yachanchikjina, sunqunchikqa mana iskaypi tʼaqasqa kayta atinmanchu. Chayrayku, sunqunchik Jehovawan, kamachiyninwan ima kachkan chayqa, runap kamachiyninwan mana kayta atinmanchu. ¿Imaraykutaq? Jesús nirqa: “Mana pipis atinchu iskay patronesta ujllapi sirviyta, imaraykuchus ujninta chejnenqa, ujnintataj munakonqa; chayri, ujninman kʼaskakonqa, ujnintataj qhesachanqa (Mateo 6:24). Jesusqa, qhapaqyaymanta parlachkarqa. Chaywanpis, kay yuyaychayqa, politicata maychus kaqmanjina qhawanapaq yanapallawanchiktaq. Jesuspa discipulosnin, jinallataq yuyarqanku.

Ñawpa tiempomanta libros, chiqa cristianos, mana politicaman chhapukusqankuta rikuchiwanchik. Paykunaqa, Jesusjina Jehová Diosllata yupaycharqanku. Chayrayku Romata, kamachiqninta ima, mana yupaycharqankuchu. Nitaq soldado kanapaqpis wakichikurqankuchu, autoridad kaytapis qhisacharqanku. Chayta ruwasqankurayku, chiqnisqas, qhatiykachasqas ima, karqanku. Chayraykutaq enemigosninkuqa, runa masinkuta chiqnikusqankuta nispa juchachaq kanku. Chaywanpis, ¿jinachu karqa?

 Chiqa cristanosqa runa masinkuta munakunku

Jesús nisqanmanjina, iskay kaq kamachiyqa kayjina: “Runa masiykita munakunki qan kikiykita jina”. Chayrayku, “cristiano” nichikuqqa, mana runa masinta chiqnikunanchu tiyan. Jesusqa, runasta munakuq. Chayrayku tiempochakuq, kallpachakuq ima, runata yanapananpaq (Marcos 5:25-34; Juan 2:1-10).

Jesusqa, mana unqusqasta jampisqanraykuchu, chayri achkha runasta mikhuchisqanraykuchu, nitaq wañusqasta kawsarichimusqaraykuchu, riqsisqa karqa. Runasqa, “Yachachiq” nispa suticharqanku. Manataq chayta nispa pantarqankuchu (Juan 1:38; 13:13). Sutʼincharqajina, runasman Diospa Reinonmanta yachachinanpaq, Jallpʼaman jamurqa (Lucas 4:43).

Jesusjina chiqa cristianosqa, Diospa Reinonmanta Jallpʼantinpi yachachinankupaq, tukuy kallpankuta churanku (Mateo 24:14; 28:19, 20). Kay Reinonqa, janaqpachapi kachkan, mana jaykʼaypis saqraman tukunqachu. Tukuy kawsaqkunatataq, munakuywan kamachinqa. Chantapis, Diospa munayninta juntʼanchinqa, wañuyta, ñakʼariyta ima chinkachispa (Mateo 6:9, 10; Apocalipsis 21:3, 4). Cristoqa, chiqamantapuni sumaq willaykunata willarqa (Lucas 8:1-3).

Rikunchikjina, Jesusqa ni jaykʼaqpis politicapi chhapukurqachu. Chay ruwasqanqa, kay tiempopi chiqa cristianosta, riqsiyta atinapaq yanapawasunman. Chiqa cristianosqa, Jesusjina, mana politicapi chhapukunkuchu. Astawanqa, Diospa Reinomanta yachachinku.

Chay Reinomanta astawan yachayta munanki chayqa, llaqtaykipi Jehovamanta sutʼinchaqkunata maskʼawaq. Manachayqa, kay www.watchtower.org chayri www.dan124.com nisqaman yaykuwaq.

[24, 25 paginapi recuadro, dibujos/fotos]

Runa masinkuta yanapanku

Jehovamanta sutʼinchaqkunaqa, politicapi mana chhapukunkuchu. Chaywanpis, runa masinkup allinninkuta maskʼanku. Chayrayku, tukuy laya runasta yanapanku. Kay willaykunaqa, chayta rikuchin:

▪ Jehovamanta sutʼinchaqkunaqa, Jallpʼantinpi qanchis junumanta astawan kanku. Sapa watataq, 1.500 junu horasta, runasman Bibliamanta yachachinku. Achkha runas, Bibliamanta yachakuspa, kawsayninkuta allinchanku, viciosta saqinku, familiankuwanpis aswan kusisqas kawsakunku.

▪ Bibliamanta publicacionesta, 500 kuraq qalluspi urqhunku. Kaykunamanta wakinpiqa Jehovamanta sutʼinchaqkunalla urqhunku. Chaytataq, mana qullqita mañaspalla, runasman jaywanku.

▪ May chhika runas, sutʼita, wakkunata jatunpaq qhawaspa ima, parlayta yachakunku.

▪ Jallpʼantinpi may chhika runasman, ñawiriyta, qillqayta ima, yachachinku.

▪ Jallpʼantinpi, 400 kuraq Comités Regionales de Construcción nisqata sayachinku. Chayniqtataq, may chhika yanapaqkunata, Bibliamanta yachakunapaq wasista ruwanankupaq wakichinku. Paykunataq, kay pasaq 10 wataspi, 20.000 kuraq Tantakunapaq Wasista ruwarqanku.

▪ May chhika Jehovamanta sutʼinchaqkunaqa, jatun llakiykuna rikhuriptin, hermanosninkuta, wak runasta ima, yanapamunku. Sutʼinchanapaq, Estados Unidospi sinchi wayra tukuy imata thuñisqanmanta iskay watanman, 90 kuraq Tantakunapaq Wasista, 5.500 wasista ima, sayachirqanku.

[23 paginapi dibujo/foto]

Runas, Jesusta munaqta mana munaqta kamachiqta churayta munachkaptinku, payqa “orqoman kutirerqa, sapallan kayta munaspa”