Diosman qayllaykuy

Jehovap sunqunta llampʼuyachirqa

JUK runa imatachus juchʼuymantapacha Bibliamanta yachakusqanta qhisacharqa, chayta ruwasqanmatataq jinata nirqa: “Diosqa mana ñuqataqa perdonawanmanchu”, nispa. Saqra ruwaymanta kawsayninta tikraspapis, ni jaykʼaq Dios perdonananta yuyarqa. Kamachiq Manasespa kawsayninmanta kay 2 Crónicas 33:1-17 pʼitista ñawirispa sunquchakurqa, suyakuytataq tarirqa. Qampis ñawpaqpi juchachakusqaykirayku ñakʼarichkanki chayqa, Manasespa kawsayninmanta ñawiriy.

Jehová, kamachiq Ezequiaspa milagroniqta kawsayninta yapasqanmanta, kimsa watasninmanraq wawan Manasés nacekurqa. Ezequiasqa Judá suyumanta sumaq kamachiq karqa (2 Reyes 20:1-11). Chiqa sunqu Ezequiaspaqqa, Manasés nacekusqanqa Jehovap khuyakuyninrayku regalon kasqanta yuyarqa. Chayraykuchá wawanta juchʼuymantapacha Diospa kamachiykunasninta jatumpaq qhawananta yachachirqa. Chaywanpis wawasqa mana tatas yachachisqankumanjinapunichu ruwanku. Jinataq karqa Manaseswan.

Manases 12 watasninyuq kachkaptin, tatan Ezequiasqa wañupurqa. Chaymantapacha “Tata Diospa ñawpaqempi saqra imasta ruwarqa” (1, 2 pʼitis). ¿Mana Diosta kasukuq runaswanchu yuyaychachikurqa? Bibliaqa mana sutʼinchawanchikchu. Chaywanpis lantista yupaychaqman, runa wañuchiman ima tukusqanta willawanchik. Lantispaq altaresta sayarichirqa, chaypitaq churisninta jaywanata jina qʼulachirqa, layqiriyustapis ruwallarqataq, Jerusalempi Diospa templonta chʼichicharqa millay lantita churaspa. Jehovaqa Manasesman kawsayta qurqa, saqrata ruwasqanmanta sapa kuti kʼamirqa, paytaqri mana kasukurqachu (3-10 pʼitis).

Jehovaqa Manasesta Babiloniaman presochasqata apakapunankuta saqirqa. Babiloniapitaq kawsayninpi tʼukurirqa. Presochasqankumanta lantisnin mana ni imata jarkʼanankupaq ruwasqankuqa, ichá qhasi mana kaqpaq kasqanta reparachirqa. Wawa kachkaspa imatachus tatan yachachisqanmanta ichá yuyarikullarqataq. Chaymantapacha saqra yuyayninta tikrarqa. Biblia nisqanmanjina Manasesqa “Jehová Diosninpa uyanta llampʼuyachirqa”, “mayta kʼumuykukuspa”, “qhapari[kuspa]”, ima (12, 13 pʼitis). “Qhaparikuy” rimayqa hebreo qallupi, “uyata llampʼuyachiy” chayri sunquta llampʼuyachiy niyta munan. Jehová chayjina millay juchachakuq runata, ¿perdonanmanchu karqa?

Manasés juchasninmanta mayta pesachikusqanqa Jehovap sunqunta llampʼuyachirqa. Sunqumantapacha mañakusqantataq uyarirqa, “Jerusalenman kutichimporqa, rey jina kamachinallampaqpuni” (13 pʼiti). Chaymantapacha Manasesqa, juchasninmanta pesachikusqanta rikuchinanpaq: lantista, altaresta ima chinkachirqa, Jehovata yupaychanankupaq llaqtata kallpacharqa (15-17 pʼitis).

Ichá qampis juchasniykita Dios mana perdonasunanta yuyawaq, chayrayku allin kanman Manasesmanta yuyarikunayki. Jehovaqa Manasespa kawsayninmanta Bibliapi qillqakunanpaq yuyaycharqa, kallpachanawanchikpaq, “perdonanapaj wakichisqa” kasqanta ima yachachinawanchikpaq (Salmo 86:5; Romanos 15:4). Jehovaqa, imayna juchachus kasqanta mana qhawanchu, manaqa imaynatachus juchachakuq juchanta qhawan chayta, sunqumantapacha pesachikuptin, Jehovamanta perdonta mañakuptin, imatachus ruwasqanta kawsayninpi allinchaptin ima, Manasesjina Jehovap sunqunta llampʼuyachinqa (Isaías 1:18; 55:6, 7).