2. Yarqhaykuna

“Manchay yarkhaycuna canka.” (MARCOS 13:8, Dios Parlapawanchej)

● Juk runa Quaratadji (Niger) nisqa ranchoman ripun. Primosnin, wawqisnin, panasnin ima, chayllamantaq yarqhaymanta ayqispa ripunku. Paytaq mastʼa pataman sapallan wikchʼukun. ¿Imaraykú? “Familianman mana mikhunata quyta atisqanrayku, paykunata mana qhawayta munanchu”, jinata chay ranchomanta kamachiq Sidi willawanchik.

¿IMATAQ YACHAKUN? Tukuy jallpʼantinpi 7 runamanta 1 yarqhachikullanpuni, astawanraq África subsaharianapi 3 runamanta 1 may pisi mikhuywan kawsakun. Tʼukurina juk familiapi, maypichus tata, mama, juk wawa imalla kanku. Mikhuna iskayllapaq kaptinqa, ¿pitaq mana mikhunqachu, mamachu chayri tatachu? Ajinapi achkha familias sapa pʼunchay rikukunku.

¿IMATÁ WAKIN YUYANKU? Jallpʼa tukuypaq achkha mikhunata puquchipuwanchik, allinta apaykachanallamanta kachkan.

YUYASQANKU, ¿CHIQACHU? Ni jaykʼaqjina kay tiempopi, tukuy imasta puquchikun, tukuyniqmantaq apakun. Kamachiqkunataq chaykunata allinta apaykachaspa jallpʼamanta yarqhayta chinkachinkuman. Achkha watasta yarqhayta tukuchiyta munaspapis mana atinkuchu.

¿IMATÁ YUYANKI? Marcos 13:8 nisqan, ¿juntʼakuchkanchu? Mikhuna kananpaq tukuy imata ruwaptinkupis, ¿manachu jallpʼantinpi yarqhay kallanpuni?

Jallpʼa ikhakuykuna, yarqhaykuna ima kasqanqa unquykunata rikhurichin, chaytaq qhipa pʼunchaykunapi kawsachkasqanchikta rikuchillawanchiktaq.

[5 paginapi sutʼinchaynin]

“Chʼujuwan, qʼichalirawan, wak unquykunawan ima, sapa 3 wawas wañusqankumanta 1 wawallapis allinta mikhunman chayqa mana wañunmanchu.” (ANN M. VENEMAN, UNICEF NISQAPI DIRECTORA KARQA)

[5 paginapi sutʼinchaynin]

© Paul Lowe/Panos Pictures