¿Imastá yachachina?

“Diosmanta tukuy Qhelqasqaqa paypa yuyaychasqan kaspa, may sumaj kashan yachachinapaj, juchata reparachinapaj, cheqa kajman kutirichinapaj, cheqanta kawsayta yachachinapaj ima.” (2 TIMOTEO 3:16)

WAWASQA Diosmanta chiqa kaqta yachananku tiyan. ¿Maypitaq yachankuman? Bibliapi, may jatunpaq qhawasqa libropi.

Bibliaqa Diospa cartan apachimuwasunmanjina, chaypitaq imaynachus pay kasqanta willawanchik chantá waynasta, sipaskunata, wiñay tukusqa runasta ima imaynatachus kawsakunankuta yuyaychan. Kaypi Bibliamanta wakin yachachiykunata sutʼinchakunqa, wawaspis chaykunamanta yachakuyta atinku.

¿Imatá Dios paymanta yachananchikta munan?

▪ Bibliap yachachisqan: “Yachachunku qan [Jehová, NM] Tata Dioslla Patapi Kaj Dios kasqaykita tukuy kay pachapi” (Salmo 83:18).

¿Imatá yachachiwanchik? Diosqa mana rikukuq kallpachu, pay kanpuni, sutiyuqtaq.

▪ Bibliap yachachisqan: “Tata Diosqa tukuypa sonqonkuta rejsin, jinallataj ima yuyasqankutapis. Ajinatachus payta maskʼanki chayqa, pay tarichikusonqa” (1 Crónicas 28:9).

¿Imatá yachachiwanchik? Jehovaqa tukuy ñuqanchikmanta interesakun, wawastapis mana qunqanchu (Salmo 10:14; 146:9). Riqsinanchiktataq munan.

▪ Bibliap yachachisqan: “Ama ni mayqen [...] wajcha wawatapis llakichinkichejchu. Sichus qankunaqa paykunata llakichinkichej, noqamantaj qhaparikamuwanku chayqa, paykunata uyarisaj” (Éxodo 22:22-24).

¿Imatá yachachiwanchik? Jehovaqa tukuypa, wawaspa mañakuyninkuta ima uyarin. Yuyasqanchikta, sunqunchik ukhupi imatachus sientesqanchikta ima willayta atinchik.

▪ Bibliap yachachisqan: “Watejmanta Diosta pruebaman churallarqankutaj. Israelpa santo Diosnimpa sonqonta nanacherqanku” (Salmo 78:41).

¿Imatá yachachiwanchik? Nisqanchik, ruwasqanchik ima Jehovata llakichinman chayri kusichinman. Manaraq imatapis parlachkaspa, ruwachkaspa ima tʼukurinaraq tiyan.

 ¿Imaynatá mana ñuqanchikjina kaqkunata qhawana tiyan?

▪ Bibliap yachachisqan: “Diosqa mana wakillantachu allimpaj qhawan, manachayqa mayqen nacionllamantapis pichá Diosta manchachikoj, cheqa kajtataj ruwaj runatamin Diosqa allin ñawiwan qhawan” (Hechos 10:34, 35).

¿Imatá yachachiwanchik? Diosqa tukuyta munakuwanchik chayrayku wak laya runasta mana pisipaqchu qhawananchik tiyan.

▪ Bibliap yachachisqan: “Wakichisqapuni kaychej, Diospi atienekuspa imatachus suyakusqaykichejmanta sutʼita kutichinaykichejpaj. Yachayta munajkunaman kutichiychej tapusqankuman jina llampʼu sonqowan, paykunata sumajpaj qhawaspa” (1 Pedro 3:15).

¿Imatá yachachiwanchik? Religionmanta parlachkaspa mana iskaychakuspa llampʼu sunquwan sutʼinchana. Mana ñuqanchikjina creeqkunatapis jatunpaq qhawana.

¿Imaynatá familia ukhupi kawsakuna?

▪ Bibliap yachachisqan: “Wawas, tataykichejta, mamaykichejta kasuychej tukuy imapi, imaraykuchus chaymin Señorta kusichin” (Colosenses 3:20).

¿Imatá yachachiwanchik? Wawas tatasta kasukuptinku munakusqankuta rikuchinku, Diospa munayninta ruwayta munasqankutapis.

▪ Bibliap yachachisqan: “Ujkuna ujkunawan paciencianakuspa, purajmanta perdonanakuychej, sichus pipis wajpa contrampi imatapis ruwan chayqa. Imaynatachus [Jehová] juchasniykichejta perdonarqa, ajinallatataj qankunapis ujkunata perdonaychej” (Colosenses 3:13).

¿Imatá yachachiwanchik? Familianchik chayri wakkuna sunqunchikta nanachiwaptinchik, Dios perdonanawanchikta munanchik chayqa perdonaytaraq yachana (Mateo 6:14, 15).

 ¿Imaraykutaq chiqata parlana, kʼachastaq kana?

▪ Bibliap yachachisqan: “Chayrayku llullakuyta saqespa, sapa ujpis cheqa kajta parlaychej runa masisniykichejwan” (Efesios 4:25).

¿Imatá yachachiwanchik? Chiqata parlaspaqa Diosjina ruwachkanchik, sunquntataq kusichinchik. Llullakuyta yachaspaqa Supayta, “llullakuypa tatanta[...]” yachapayachkasunman (Juan 8:44; Tito 1:2).

▪ Bibliap yachachisqan: “Imatachus munankichej runas qankunapaj ruwanankuta, ajinallatataj qankunapis paykunapaj ruwapuychej” (Mateo 7:12).

¿Imatá yachachiwanchik? Familianchik, wakkuna ima, imatachus sientesqankuta, yuyasqankuta, necesitasqankuta ima reparana. Paykunata entiendespa kʼachamanta parlasun chayqa, kikillantaq ñuqanchikwan kanqanku (1 Pedro 3:8; Lucas 6:38).

Bibliamanta kay yuyaychaykunata qhawarisqanchik, wawas wiñaptinku kʼachas kanankupaq, wak runasta jatunpaq qhawanankupaq, entiendenankupaq ima yanapanqa. Chaywanpis, ¿pitaq yachachinan tiyan?