Kay tiempopi tarisqanku evangelios: ¿Diosmantachu jamun?

KAY “Judaspa qhelqasqan Evangeliota” (patapi foto) tarisqankumanta, uj yachayniyoj runa nerqa: “Kay tarikusqanqa ashkhasta phiñachenqa”, nispa. Uj yachachej nillarqataj: “Cristianos imaynatachus qallarisqankumanta yachakusqanta tijrachenqa”, nispa. Chay qhelqasqaqa, 1600 watasmanta rikhurimun.

Kay tiempopi runasqa, chay evangeliosmanta astawan yachayta munanku. Wakenqa, chay libros Jesuspa kausayninmanta pakasqa imasta, unaymanta sutʼinchasqanta ninku. Chaywanpis, ¿Dioschu chay libros qhelqakunanpaj yuyaycharqa? Jesuspa kausayninmanta, cristianospa qallariyninkumanta ima nisqanku, ¿cheqapunichu?

¿Ima Evangeliostá Dios yuyaycharqa?

Kay 41 watamanta 98 watakama, Mateo, Marcos, Lucas, Juan ima, “Jesucristoj” kausayninmanta qhelqarqanku (Mateo 1:1). Chay qhelqasqastaj, “Jesucristoj evangelio[n]” nispa sutikun (Marcos 1:1).

Ichá Jesusmanta waj qhelqasqas chayri runaspa cuentasqanku tiyan. Chaywanpis, chay tawa Evangelioslla Diospa yuyaychasqan kanku, chayrayku Bibliaj librosninwan khuska kashanku. Arí, chay Evangelioslla, Jesuspa kausayninmanta, yachachiykunasninmanta ima, “aswan allinta yachana[paj]” yanapawasunman (Lucas 1:1-4; Hechos 1:1, 2; 2 Timoteo 3:16, 17). Chantá chay Evangeliosqa, Bibliaj Griegopi Qhelqasqaswan khuska rikhurin. Chayrayku Diospa yuyaychasqanpuni kasqanmanta, ni iskaychakusunmanchu.

Chaywanpis aswan qhepaman, waj qhelqasqas rikhurillarqataj. Chaykunatataj evangelios nispa sutichallarqankutaj. Kunantaj chay librosqa, Diospa mana yuyaychasqan evangelios nispa sutikun.

Iskay pachaj wata qayllata, Ireneo de Lyon qhelqarqa: Cristianosta wasanchajkunaqa, “may chhika librosta cristianospa umankuta muyuchinankupaj orqhonku, chaykunataj mana Diospa yuyaychasqanchu, manataj cheqachu kanku”, nispa. Chayrayku mana chay librosta leenankuta, nitaj japʼikunankuta nikorqa.

Jinapis ñaupa tiempomanta monjes, qhelqheris ima, chay librosta jallchʼarqanku. Kay 1801 watamanta ñaupajmantaj, ashkha runas chay librosmanta yachayta munarqanku. Jinamanta, Diospa mana yuyaychasqan libros, chaymanta orqhosqa qhelqasqas ima, ashkha rikhurerqanku. Chaykunawan khuskataj, ashkha evangelios kallarqataj. Kunanqa ashkha qalluspi chay libros tiyan.

Mana creenapaj jina cuentos

Diospa yuyaychasqan Evangeliospi wakin runasmanta pisita chayri ni imata parlakunchu.  Diospa mana yuyaychasqan evangeliostaj, chaykunamanta parlan. Wakenqa, Jesús wawa kashaspa imastachus ruwasqanmanta cuentanku. Chaykunata qhawarina.

▪ Santiagoj ñaupaj qhelqasqan evangelioqa (“Mariaj nacekusqan” sutikullantaj), María nacekusqanmanta, wiñakusqanmanta, Josewan casarasqanmanta ima parlan. Ashkha runas, chay libroj nisqan uj cuentolla kasqanta ninku, jinapunitaj. Imajtinchus chay libroqa, Mariata jatunchan, virgenllapuni kasqanta yachachin (Mateo 1:24, 25; 13:55, 56).

▪ Tomaspa qhelqasqan evangelioqa, Jesús wawallaraj (5-12 watasniyoj) kashasqanmanta parlan, mana creenapaj jina milagrostataj ruwasqanta nin (Juan 2:11 kikinchay). Chay libro nisqanman jina, Jesusqa munayninta ruwan, imamantapis phiñarikullan, atiynintapis vengakunanpaj apaykachan. Chantapis yachachejkunata, vecinosta, wawasta ima ciegoyachin, suchuyachin, wañuchin ima.

▪ Waj librostaj, Pedroj qhelqasqan evangelio jina, Jesús juzgasqa, wañuchisqa kasqanmanta, kausarisqanmanta ima parlanku. Waj librostaj, “Pilatoj actasnin” (“Nicodemoj qhelqasqan evangeliomanta” ujnin) nisqa libro jina, pi runaschus chaypi kasqankumanta parlanku. Chaywanpis imachus kasqanmanta, runasmanta ima, yapasqata parlasqankurayku, mana creenapaj jinachu. “Pedroj qhelqasqan evangeliotaj”, Poncio Pilatota kʼacha runata jina qhawachiyta munan. Jesús kausarimusqanmantapis, ancha yapasqata parlan.

Diospa mana yuyaychasqan evangelios, Diospa llajtanta wasanchajkuna

Kay 1945 diciembre killapi, (Egiptoj patanejnin) Nag Hammadi llajta qayllapi, campo runas, mana maskʼaspalla papiromanta 13 librosta, 52 qhelqasniyojta tarerqanku. Chay qhelqasqasta, gnósticos nisqa 301-400 wataspi qhelqasqankuta ninku. Paykunaqa griegospa, judiospa, cristianospa yachachiyninkuta ima, lanti yupaychaywan chajrorqanku. Jinamantataj ashkha cristianosta pantacherqanku (1 Timoteo 6:20, 21).

Nag Hammandipi tarikusqan qhelqasqasmanta wakenqa, kaykuna kanku: “Tomaspa qhelqasqan evangelio”, “Felipej qhelqasqan evangelio”, “Cheqa kajmanta evangelio” ima. Chay qhelqasqaspeqa, gnosticospa yachachiyninku, Jesusmantapis jamushanman jina rikhurin. Chaykunamanta ujqa, “Judaspa qhelqasqan evangelio”, chaytataj kunallanraj tarikun. Chay libroqa, Judas Iscarioteta allinpaj qhawachin, paylla Jesusmanta allinta yachasqantataj nin. Uj yachayniyoj runa nisqanman jina, chay libroqa Jesusta “uj yachachejta jina, yachayta rejsichejta jina ima rikuchin; nitaj juchamanta salvajta jinachu”. Mana chayman jinataj, Diospa yuyaychasqan Evangeliosqa, Jesús juchamanta salvanawanchejpaj kausayninta qosqanta nin (Mateo 20:28; 26:28; 1 Juan 2:1, 2). Arí, chay evangeliosqa, Bibliapi creeyninchejta iskaychachiytapuni munanku (Hechos 20:30).

Diospa yuyaychasqan Evangeliosqa cheqa

Diospa yuyaychasqan Evangeliosta, chay waj evangelioswan kikinchaspa, sutʼi rikunchej, chay libros mana Diosmantachu jamusqanta (2 Timoteo 1:13). Chay librosta qhelqajkunaqa, ni Jesusta, ni apostolesnintapis rejserqankuchu. Chayrayku mana imatapis paykunamanta sutʼinchayta atinkumanchu. Astawanpis chay librosqa, yapasqata, qʼewisqata, nitaj cheqantachu parlanku. Chayrayku ni Jesusta, nitaj yachachiykunasninta rejsinapaj yanapawasunmanchu (1 Timoteo 4:1, 2).

Mana chayman jinataj, Mateo, Juanpis, 12 apostolesmanta karqanku. Marcosqa apóstol Pedroj yanapajnin karqa, Lucastaj apóstol Pabloj yanapajnin. Paykunaqa, Diospa espíritu santonnejta Evengeliosninkuta qhelqarqanku (2 Timoteo 3:14-17). Chayrayku chay tawa evangelioslla, Jesús, Diospa Churin, Cristotaj kasqanta creenapaj yanapawasunman (Juan 20:31).

[18 paginapi maymantachus foto urqhukusqan]

Kenneth Garrett/National Geographic Stock