¿CHAY cheqachu? Arí. Jehová Diosllataj kamachisninman jinata nerqa: “Sajra ruwasqankuta pampachasaj, manañataj jaykʼajpis juchasninkumanta yuyarikusajchu”, nispa (Jeremías 31:34). Chayta nispaqa, pesachikojpa juchanta manaña yuyarikunanta nisharqa. Chaywanpis tukuy imata Ruwaj Jehová Dios, ¿mana yuyarikuyta atisqantachu nisharqa? Profeta Ezequielqa, Dios imaynamantachus juchanchejta perdonaspa, qonqayman churasqanta rikuchiwanchej. (Ezequiel 18:19-22 leey.)

Jehovaqa, profeta Ezequielnejta Judata, capitalnin Jerusalentawan juchacharqa. Imaraykuchus chay llajtaspi tiyakojkuna cheqa yupaychaymanta karunchakorqanku, sajra ruwaymantaj urmarqanku. Jehovaqa, Jerusalenta babilonios chinkachinanta nishaspa, sapa uj runata imatachus ruwasqanman jina juzgananta nillarqataj (19, 20 versículos).

Chantapis pillapis sajra ruwasqasninmanta pesachikojtin, ¿imataj paywan kanman karqa? Iskay chunka ujniyoj versiculopi Dios nerqa: “Sajra kawsayniyoj runachus tukuy juchallikuyninmanta tʼaqakuspa kutirimpun, kamachisqasniyta juntʼaspataj, cheqan kajta, maychus kajtataj ruwan chayqa, cheqamanta kawsanqa, manataj chay juchanrayku wañonqachu”, nispa. Rikunchej jina Jehová Diosqa, sajra ruwayninmanta kutirikojta “perdonana[n]paj wakichisqa” kashan (Salmo 86:5).

¿Chantá juchachakusqasninrí? Chaymanta iskay chunka iskayniyoj versiculopi nillanpuni: “Noqataj tukuy juchallikusqanmanta mana yuyarikusajchu”, nispa. ¿Ima ninayantaj “mana yuyarikusajchu” rimay?

Uj yachayniyoj runa nisqanman jina hebreo qallupi Bibliapi “yuyarikusajchu” rimayqa, mana juchanmanta watejmanta yuyarikuyllachu niyta munan, manaqa yuyarikuytawankama chayman jina ruway niyta munallantaj. Chayrayku nisunman ‘yuyarikuy’ rimayqa ruway rimaywan khuskachasqa jina kasqanta. Jehová Diosqa, juchallikoj pesachikojtin manaña juchanta yuyarikonqachu, nitaj imatapis contranpi ruwanqachu, nisunman manaña castiganqachu. *

Ezequiel 18:21, 22 versiculospi Jehovaj perdonnin imaynapunichus kasqanta sutʼinchan. Jehová Dios, pillatapis juchanmanta pesachikojtin perdonan chayqa, manaña yuyarikunchu. Astawanqa, qonqayman churan (Isaías 38:17). Chay juchamantaqa, mana ni jaykʼajpis yuyarikonqañachu (Hechos 3:19, 20).

Juchasapa runas kasqanchejrayku, sapa kuti pantanchej chayraykutaj Diospa khuyakuyninta necesitanchej (Romanos 3:23). Chaywanpis Jehová Diosqa, tukuy sonqo pesachikojkunata perdonananpaj wakichisqa kashasqanta yachananchejta munan. Chantapis juchanchejta perdonaspaqa, manaña yuyarikullanpunichu, chay juchamanta castiganawanchejpaj. ¡Chaymá may sumajqa! ¿Manachu chay jina khuyakuyniyoj Diosman qayllaykuyta munawaj?

[Sutʼinchaynin]