Moisés: Llampʼu sonqo runa
¿IMAYNATAJ LLAMPʼU SONQO RUNA?
Llampʼu sonqo runaqa, mana jatunchakunchu, nitaj runaykachanchu. Wajkunatapis aswan kurajta jina qhawan. Chantapis juchasapa kasqanta, wakin imasta mana ruwayta atisqantapis yachan.
¿IMAYNATÁ MOISÉS CHAYTA RIKUCHERQA?
Kamachinapaj atiyta japʼispapis, mana umata oqharerqachu. Runaqa autoridadta japʼispa, llampʼu sonqochus manachus kasqanta usqhayllata rikuchin. Robert G. Ingersoll, pichus 1801-1900 wataspi kausarqa, kayta nerqa: “Runasqa chʼampaykunata muchuyta atillanku. Chaywanpis uj runa imaynachus kasqanta yachanaykipajqa, atiyta qoy”, nispa. Moisesqa kamachinapaj atiyta japʼispapis, llampʼu sonqo karqa.
Jehovaqa, Moisesman Israel llajtata pusananpaj atiyta qorqa. Chaywanpis payqa, mana jatunchakorqachu. Sutʼincharinapaj, Zelofehadpa ususisnin herenciata mañakojtinku, imaynatachus llampʼu sonqo kayninta rikuchisqanta qhawarina (Números 27:1-11). Imaynatachus chay chʼampayta allinchasqanqa, aswan qhepamanpis kikinta ruwakunanpaj yanapanman karqa.
¿Imatá Moisés ruwarqa? Atiyta japʼisqanrayku, ¿imatachus ruwananta yachasqanta nerqachu? Ichapis yuyayninpi, kausayninpi yachakusqanpi, chayri Jehovata sumajtaña rejsisqanpi atienekuyta atinman karqa.
Jatunchakoj runaqa chayta ruwanman karqa. Chaywanpis Moisesqa mana. Biblia nin: “Moisesqa Tata Diosman willarqa chay warmispa mañakusqankuta”, nispa (Números 27:5). Tawa chunka watastaña kamachej jina kajtinpis, paypi atienekunanmantaqa, Jehovapi atienekorqa. Arí, ¡may llampʼu sonqo karqa!
Moisesqa mana yuyarqachu, paylla Israelta kamachinan kasqanta. Jehová waj israelitasmanpis sutʼinchanankupaj atiyta qojtenqa, mana phiñakorqachu, astawanqa kusikorqa (Números 11:24-29). Suegron llankʼayninpi wajkunawan yanapachikunanta yuyaychajtintaj, Moisesqa llampʼu sonqowan kasukorqa (Éxodo 18:13-24). Machituña kashaspataj, kallpayojraj kaspapis, Israel aylluta pusananpaj waj runata ajllananta Jehovamanta mañakorqa. Josueta ajllajtintaj, tukuy sonqo yanaparqa. Chantapis llajtaman nerqa: Josué Sumaj Jallpʼaman “pusasonqachej kurajniykichej jina”, nispa (Números 27:15-18; Deuteronomio 31:3-6; 34:7). Moisesqa, israelitasta Diosta yupaychaypi ñaupajman pusayta jatunpaj qhawaspapis, wajkunaj allinninkuta aswan ñaupajman churarqa.
¿IMATÁ YACHAKUNCHEJ?
Autoridadniyoj kaspa chayri imatapis allinta ruwayta yachaspapis, ni jaykʼaj umata oqharinachu. Jehovapaj sumajta llankʼanapajqa, aswan allin llampʼu sonqo kay, yachayniyoj kanamantaqa (1 Samuel 15:17). Cheqamantapuni llampʼu sonqos kaspaqa, kay yuyaychayta kasukusun: “Tukuy sonqoykiwan Tata Diospi atienekuy; ama qampa yachasqallaykipeqa”, nispa (Proverbios 3:5, 6).
¿Imatawan yachakunchej? Imata ruwanapaj kamachisqa kaspapis, chayri autoridadniyoj kaspapis, mana jatunchakunachu tiyan.
Moisés jina llampʼu sonqo kay, ¿imapipis yanapawanchejchu? Arí. Llampʼu sonqos kaspaqa, wajkuna noqanchejwan kaspa kusisqa kanankupaj kallpachakusun. Jinata ruwajtinchej, paykuna, Jehová ima astawan munakuwasunchej. Jehovaqa, tukuymanta nisqa aswan llampʼu sonqo (Salmo 18:35). Paytaj “jatunchakojkunaman sayaykun, kʼumuykukojmantaj qhasilla kʼacha yanapayninta qon” (1 Pedro 5:5). Chayrayku Moisés jina llampʼu sonqo kananchej tiyan.
