MAYKʼAJLLAPIS llakiypi kashaspa, ¿wajpa yanapayninta maskʼarqankichu? Ichapis entiendeyta atisunanpaj, kikin llakiyta atipaj amigota maskʼakorqanki. Arí, khuyakuyniyoj, kikin llakiytataj atipaj amigoqa, chay kutispi mayta yanapasunkiman.

Ashkha runas, Diosmanta mañakuyta necesitajtinku, kikillantataj ruwanku. Chaywanpis Diospa yanapayninta mañakunankumantaqa, santosman rezanku. ¿Imaraykú? Diosta ancha karupi qhawasqankurayku. Chantapis santos, paykuna jinallataj llakiykunapi rikukusqankurayku, entiendeyta atinankuta yuyanku. Sutʼinchanapaj, qolqeyoj kayta chayri uj onqoymanta sanoyakuyta munajkunaqa, tata Santiagoman rezakunku. Onqosqa animalniyoj kajkunataj, tata san Francisco de Asisman. Parata munajkunataj, tata san Pedromanta mañakunku.

Chaywanpis, ¿Biblia santosman rezanata ninchu? Chay mañakuykuna, ¿Diosman chayanchu? ¿Imatá Pay santosman rezanamanta nin?

Santosman rezayqa, catolicospa ujnin yachachiyninkumanta jamun. Nisqankuman jina, “santosqa runaspa mañakuyninkuta Diosman chayachiyta atinku, paymanta atiyta japʼisqankurayku” (New Catholic Encyclopedia). Chayrayku santosman rezajqa, chay santosta Dios may allinpaj qhawasqanta yuyasqanrayku, imatachus paykunanejta mañakusqanta japʼinantapuni yuyan.

¿Chaytachu Biblia yachachin? Wakinkuna apóstol Pabloj qhelqasqasninmanta japʼikuspa, “arí” nispa ninku. Chaykunamanta ujqa, Pablo Romapi cristianosman qhelqasqan, maypichus nerqa: “Hermanos, mañakuykichej Señorninchej Jesucristonejta, Espíritu Santoj munakuynimpi ima, Diosmanta mañapunawaykichejta”, nispa (Romanos 15:30, 31). Pablo, ¿paykunanejtachu mañakuyninta Diosman chayachiyta munasharqa? Mana. Payqa, cristiano masinchejman Diosmanta mañapunawanchejta niyta atisqanchejta rikuchisharqa. Chaytaj, uj santonejta Diosmanta mañakuywan mana kikinchu, nitaj chayta ruwananchejchu tiyan. ¿Imaraykú?

Imaraykuchus Juanpa qhelqasqan Evangeliopi, Jesús nerqa: “Noqa ñan kani, cheqa kajtaj, kawsaytaj; mana pipis Dios Tataman chayayta atinchu, mana noqanejta rispaqa”, nispa (Juan 14:6). Chantá nillarqataj: “Tukuy imata sutiypi Dios Tatamanta mañakusqaykichejta  payqa qosonqachej”, nispa (Juan 15:16). Jesusqa mana paymanta mañakunanchejtachu nerqa, pay Tatanman parlapunawanchejpaj. Chayrayku Dios mañakuyninchejta uyarinanpajqa, payllamanta mañakunanchej tiyan, Jesuspa sutinpitaj.

Uj kutipi, Jesuspa yachachisqasnin Diosmanta mañakuyta yachachinanta nerqanku. Paytaj kuticherqa: “Diosmanta mañakuspaqa, niychej: Tatayku, sutiyki jatunchasqa kachun”, nispa (Lucas 11:2). Chayrayku maykʼajllapis Diosllamanta mañakunanchej tiyan, nitaj Jesusmantachu, ni waj runasmantapis. Jesús sutʼita yachachisqanman jina, Diosmantapuni mañakunanchej tiyan, Jesucristoj sutinpitaj, nitaj ima santomanpis rezananchejchu tiyan.

Chantapis Diosmanta mañakoyqa, yupaychayninchejwan khuskachasqa kashan. Biblia yachachisqanman jinataj, Diosllata yupaychana tiyan (Juan 4:23, 24; Apocalipsis 19:9, 10).

Jesusqa Orqopi Yachachishaspa, mikhunata tatanmanta mañakoj wawamanta parlarqa. Nerqataj: “Pi runataj qankunamanta kanman, wawan tʼantata mañakojtin, rumita qojri? Challwata mañakojtimpis, kataritachu qonman?”, nispa (Mateo 7:9, 10). Wawasninta munakoj tataqa, ni jaykʼaj chayta ruwanmanchu.

Kunanqa qan tata kasqaykipi tʼukuriy. Wawayki qayllaykusunanpaj tukuy imata ruwanki, parlasusqantapis uyarinkipuni. Chaywanpis qhasillamanta manchachikususqanrayku, imata munaspapis, waj runanejta mañasunki. ¿Imayná chay rijchʼasunkiman? Chay runanejllatapuni parlapayasojtin, chayllatapunitaj ruwananta rikuchejtin, ¿nichu sonqoyki nanasunkiman? Arí, nanasunkiman. Imajtinchus uj tataqa, wawasnin mana manchachikuspa paywan parlanankuta munan, necesitasqankutataj mañakunankuta.

Tatanmanta mikhunata mañakoj wawamanta parlarinallapuni. Jesusqa nillarqapuni: “Sichus qankuna sajra runas kaspa, allin imasta wawasniykichejman qoyta yachankichej chayqa, imaraykutaj janaj pachapi kashaj Tataykichej aswan allin imastaraj mana qonmanchu paymanta mañakojkunaman?”, nispa (Mateo 7:11). Uj kʼacha tata, wawasninman allin imastapuni qoyta munan chayqa, ¿manachu cielopi Tatanchej astawanraj mañakusqanchejta uyariyta, qoyta ima munawasunman?

Diosqa, pantasqanchejrayku may phutisqas kashajtinchejpis, payman qayllaykunanchejta munan. Mana wajtachu kamachin, mañakuykunasninchejta uyarinanpaj. Biblia niwanchej: “Llakiyniykita Tata Diosman saqey. Payqa sinchʼita sayachisonqa. Payqa cheqan runata ni jaykʼaj urmajta saqenqachu”, nispa (Salmo 55:22). Arí, mana mayqen santomanpis rezanachu, nitaj pi runanejtapis Diosmanta mañakunachu. Astawanpis, mana manchachikuspa Jehová Diosmanta mañakuna.

Cielopi Tatanchej Jehovaqa, sapa ujta munakuwanchej. Llakiyninchejpi yanapayta munawanchej, Payman qayllaykunanchejpajtaj wajyariwanchej (Santiago 4:8). Mañakuykunata Uyarej Tata Diosninchejman qayllaykuyta atisqanchejmanta, ¡may agradecesqas kanchej! (Salmo 65:2.)