UJCHAKUYTA munaj religionesqa, mana jinachu kasqanta ninku. Kay Interfaith Youth Core nisqa organizacionta sayachej, Eboo Patel sutiyoj runa nerqa: “Tukuy religiones khuyakunata [...,] Jallpʼanchejta cuidanata [...,] wajkunata wajyarikunata ima yachachinku”, nispa.

Nisqantaj cheqapuni, imaraykuchus budistas, católicos, evangelistas, hindúes, musulmanes ima, wajchayayta chinkachinankupaj, runaspa derechosninkuta jarkʼanankupaj ima ujchaykukunku. Chantapis jallpʼapi dinamitasta jina pʼampasqata churakunanta chayri chʼichichakunanta mana munankuchu. Parlarinankupajtaj tantakunku, ajinamanta purajmanta yanapanakunankupaj, imatachus yuyasqankutapis parlarinku. Chantá velasta japʼichispa, takiykunata tocaspa chayri orakuspa fiestata jina ruwanku.

¿Atinkumanchu religiones ujchakuspa chʼampaykunasninkuta allinchayta? ¿Ajinamantachu Dios kay pachata allinchanqa?

Religionesta ujchayta munaj organizacionesmanta ujqa, Jallpʼantinpi rejsisqa. Chaymanta kajkunataj ninku 200 kuraj religionesta ujchasqankuta, 76 suyuspitaj kasqankuta. Chantapis paykunaqa religionespura sumaj ujchasqa, wiñaypajtaj kayta munanku. Chaywanpis chayta ruwaytaqa mana atillankuchu. Chay organizacionta qallarichej runas nisqankuman jinaqa, documentonkuta sumajta tʼukurispa wakichinanku karqa. ¿Imapaj? Chay waj religionesmanta kajkunata, waj qalluta parlajtinkupis mana phiñachinankupaj. Imaraykuchus mana tukuychu Diosmanta parlayta munanku. Ajinamantataj Diosta chinkachinku.

Diosmanta mana parlakojtenqa, qhasilla religionqa. Religionesta ujchayta munajkunaqa, runasta yanapayta munaj organizacioneswan kikillantaj. Chayrayku ñaupaj parrafospi parlakusqan organizacionqa, mana uj religionchu, manaqa runasllata ujchayta munan.

Religionta ujchayta munaj runa Dalai Lama sutiyoj nin: “Tukuy religiones munakuymanta, khuyakuymanta, perdonakuymanta ima parlanku”. Chantá nillantaj: “Chaykunatataj kausayninchejpi rikuchinanchejpuni tiyan”, nispa.

Munakuyta, khuyakuyta, perdonakuyta ima jatunpaj qhawanchej. Jesuspis jinata nerqa: “Imatachus munankichej runas qankunapaj ruwanankuta, ajinallatataj qankunapis paykunapaj ruwapuychej”,  nispa (Mateo 7:12). Chaywanpis, ¿cheqa religión allin kajllatachu ruwanan tiyan?

Apóstol Pablo nerqa, tiemponmanta ashkha runas, Diosta sirviyta munasqankuta, chaywanpis mana “cheqa yachayman jinachu”. Imajtinchus mana yacharqankuchu “Dios imaynatachus runata cheqampaj qhawasqanta”. Astawanqa “yuyasqankuman jinalla munarqanku cheqampaj qhawasqa kayta” (Romanos 10:2, 3). Chantapis imatapunichus Dios ruwanankuta munasqanta mana yachasqankurayku, munasqankuwan, creeyninkuwanqa qhasilla karqa (Mateo 7:21-23).

Jesús nerqa: “Kusikuyniyojmin kanku allinyachejkunaqa”, nispa (Mateo 5:9). Jesusqa yachachisqanman jina kausarqa, chantapis allin kausay kananpaj tanqarqa, waj religionesmanta kajkunatapis sonqo tiyasqa kanankupaj yanaparqa (Mateo 26:52). Payta uyarejkunataj munakuypi ujchasqa karqanku (Colosenses 3:14). ¿Imapajtaj Jesús chayta ruwarqa? ¿Runasta ujchanallanpajchu, allinpitaj kanallankupajchu? ¿Waj religionesmanta kajkunatapis ujchaykorqachu?

Jesustaqa fariseos, saduceos ima, wañuchiyta munaspa mayta qhatiykacharqanku. ¿Imatá Jesús ruwarqa? Discipulosninman nerqa: “Paykunata saqeychej, imaraykuchus ciegos kanku, ciegosta pusaykachajkunataj”, nispa (Mateo 15:14). Arí, Jesusqa mana munarqachu paykunawan ujchakuyta.

Aswan qhepamantaj Grecia suyupi Corinto llajtapi, cristianos tantakuyta qallarerqanku. Chay llajtapi runasqa tukuy laya costumbresniyoj karqanku, ashkha religionestaj karqa. ¿Imaynatá cristianos chay jina llajtapi kausakunkuman karqa? Apóstol Pablo paykunaman qhelqarqa: “Ama yananchakuychejchu [chayri ujchakuychejchu] Diospi mana creejkunawan”. Chantá nillarqataj: “Jinallataj Cristowan, Kuraj Supaywanqa mana kawsakunkumanchu, nillataj Cristopi creejqa mana creejwan ujchasqa kawsakunmanchu”. Chayrayku jinata yuyaycharqa: “Llojsiychej paykunaj chawpinkumanta, tʼaqakuychejtaj”, nispa (2 Corintios 6:14, 15, 17).

Rikunchej jina, Bibliaqa nin, cristianos waj religioneswan mana ujchakunankuta. Chayrayku ichá tapukunki: “Chantá, ¿imaynatá ujchasqa kausasunman?”, nispa.

Kay Estación Espacial Internacional nisqa, mayqenchus Jallpʼanchejpa jawanpi kashan. Chayta ruwaj runasqa 15 suyusmanta jina karqanku, uj yuyayllamantaj chayananku karqa. Chantapis chayta ruwanankupaj mana uj yuyayllaman chayaspaqa nichá atinkumanchu karqa.

Kay tiempomanta religionespis kikillanpitaj rikukunku. Ujchasqa kaymanta, respetanakuymanta parlaspapis, imaynatachus Diosta yupaychakunanmanta mana uj yuyayllaman chayayta atinkuchu. Chayrayku kamachiykunasninku, yachachisqankupis chʼampayllapuni.

Bibliaqa imaynatachus Diosta yupaychanata, kusisqa kausanapajtaj yanapawanchej. Chayman jina kausajkunaqa, mana religionrayku tʼaqanakunkuchu, nitaj wajkunata chejninkuchu, astawanpis khuska, ujchasqataj llankʼanku. Diosqa ajinapuni kananta nerqaña: “Chay pʼunchay chayamojtin, llimphuchasaj tukuy runaspa parlayninkuta, tukuyninku noqaj sutiyta oqharispa Diosninkupaj rejsikapunawankupaj, tukuy runastaj noqata uj sonqolla sirvinawankupaj”, nispa. Ujchasqa kasqankoqa ‘llimphu parlay’ kasqanrayku, chaytaj imaynatachus Dios yupaychanata munasqan (Sofonías 3:9; Isaías 2:2-4).

Jehovaj testigosnenqa Tantakunanku Wasiman rinaykipaj wajyarisunku. Qan kikiyki rikunaykipaj, paykunaqa sonqo tiyasqas, ujchasqataj kausakusqankuta (Salmo 133:1).