Wawa kashaspallaraj Alemania, Leipzig llajtaj qayllanpi tiyakoj kani. Chaytaj Polonia suyumanta, República Checamantawan mana ancha karupichu. Sojta watitayoj kashaspataj, tataypa llankʼayninrayku Brasilman riporqayku, chantá Ecuadormanñataj.

Tatasneyqa 14 watasniyoj kashajtiy Alemaniaman watejmanta kachawarqanku, yachaywasipi estudiamunaypaj. Chaypitaj sapayman yachakaporqani. Chantá imatapis ruwallaj kani, wajkunaman mana allin rijchʼajtinpis.

Tatasneyqa 17 watayojña kashajtiy, Alemaniaman kutinporqanku. Ñaupajtaqa paykunawan tiyakusharqani, chaywanpis sapayman yachasqa kasqayrayku niwasqankuta ma kasukullajchu kani. Chayrayku 18 watayoj kashaspataj riporqani.

Kausaypis manaña allinmanchu rijchʼawasqanrayku, tukuy laya organizacionesta tapurarerqani, allin kausayta tarinaypaj. Nitaj allinchu rijchʼawarqanku. Chayrayku niraj kay kʼacha Jallpʼata runas phirishajtinku, tukuy lugaresninta rejsimuyta munarqani.

Uj motota rantiytawan, Alemaniamanta, Africaman riporqani. Chaywanpis pisi tiemponman motoy anchata fregakusqanrayku Europaman kutiporqani. Motoyta allinchaytawantaj, Portugalpa mama qocha kantunman rerqani. Chaypitaj Jallpʼantinta motollawanpuni rinaymantaqa, barcopiñataj riyman, nispa tʼukurerqani.

Ashkha jóvenes kay Atlántico mama qochanejta chimpanankupaj wakichikusharqanku, noqataj paykunawan rerqani. Chaypitaj Laurieta rejserqani, pichus aswan qhepaman warmiy karqa. Mama qochapi Caribej churusninkamataj barcopi rerqayku. Chantá Puerto Ricopi pisi tiempota qhepakuytawan, Europaman kutiporqayku. Chaypitaj uj barcota maskʼarqayku chaypi tiyakunaykupaj. Kinsa killataña maskʼarqayku, jinallapi Alemania ejercitonman wajyachiwarqanku.

 Maqanakunapaj barcosniyoj ejercitopi 15 killasta sirverqani, chay tiempopitaj Lauriewan casarakorqani. Tukuy lugarestataj khuska rejsimuyta munarqayku. Chayrayku niraj soldado kashajtiy uj boteta ranterqayku, ejercitopi kanaykamataj barcoman jina tukuchisharqayku. Ejercitomanta llojsipusqaytawantaj, barcota niraj tukuychashajtiyku Jehovaj testigosnin parlariwarqayku, Bibliamantataj yachakuyta qallarerqayku.

Ñaupajtaqa kausayniyta mana anchatachu tijrachinayta yuyarqani. Tiyakushallarqani chay warmiwanpis casarakorqaniña, cigarro pitaytapis qonqarqaniña (Efesios 5:5). Chantapis yuyarqani Jallpʼantinta viajaspa, Diospaj tukuy ruwasqasninta rejsispa allinta ruwashasqayta.

Jinapis kausayniyta tijrachinayraj karqa, imajtinchus mayta jatunchakoj kani, munasqallayta ruwaj kani, ruwasqasniymantapis mayta alabakoj kani. Noqallapi yuyaj kani.

Uj kuti, Jesús Orqopi yachachisqanta leerqani (Mateo 5-7 capitulosta). Jesús kusiy kausaymanta nisqan tʼukurichiwarqa. Pay nerqa kusiy kausayqa yarqhasqaspaj, chʼakichikojkunapajwan kasqanta (Mateo 5:6). Jinapis, ¿imaynatá uj yarqhasqa uj chʼakichikojwan kusisqa kankumanrí?, nispa nerqani. Bibliamanta yachakusqayman jinataj, tukuypis Diosmanta yachakuyta necesitasqanchejta repararqani. Chaypajtaj noqanchejraj Diosmanta yachakuyta necesitasqanchejta reparakuna tiyan. Jesuspis chaytapuni nerqa: “May cusiskas cancu sonkoncupi Diosmanta pisiskas caskancuta khawacojcunaka”, nispa (Mateo 5:3, Dios Parlapawanchej).

Alemaniapi warmiywan khuska Bibliamanta yachakuyta qallarerqayku, chaymanta Franciaman riporqayku, chantá Italiamanñataj. Mayllapipis Jehovaj testigosninta tarejpuni kayku. Maytataj tʼukuchiwaj ujchasqa kasqanku, munanakuyta rikuchinakusqanku ima. Jallpʼantinpi uj familia jina kasqankuta repararqani (Juan 13:34, 35). Aswan qhepamantaj bautizakorqayku.

Jehovaj testigonña kaspapis kausayniyta tijrachinallaypuni karqa. Barcopi warmiywan khuska, Africaj kantullantapuni rispa, Atlántico mama qochata chimpaytawan Estados Unidosman chayarqayku. Juchʼuy barquitoypi mama qochaj chaupinpi kashaspa, cuentata qokorqani Diospaj ladonpi ni imapis kasqanchejta. Mama qochapi mana imapis ancha ruwana karqachu, chayrayku Bibliata leeyman qokorqani. Jesuspa kausayninmanta yachakusqay sonqoyta kuyuricherqa. Pay mana juchayoj, sumaj kʼacha kaykunasniyojtaj kaspapis mana jatunchakorqachu. Jesusqa mana payllapichu yuyarqa, manaqa Tatanpi.

Jesuspa kausayninpi tʼukurispa munaynillayta ruwanaymantaqa Diospa Reinonta ñaupajman churanay kasqanta repararqani (Mateo 6:33). Estados Unidosman chayaytawantaj, Diosta sirvinaykupaj chaypi qhepakunaykuta ninakorqayku.

Noqallapi yuyaspaqa, mana yachajchu kani imaynachus rinawanta. Kunanqa Bibliapi sumaj yachayta tarini (Isaías 48:17, 18). Chantapis Diosta yupaychasqayrayku, runastapis Payta rejsinankupaj yanapasqayrayku, sonqo juntʼasqa kausakuni.

Bibliaj yuyaychaykunasnin yanapawasqaykurayku, warmiywanpis aswan allinta kausakuyku. Jehová Diostaj uj kʼacha warmi wawawan bendeciwayku, paypis Diosta munakullantaj.

Kausayniykupi ashkha chʼampaykuna rikhurejtinpis, Jehová ni jaykʼaj qonqarpariwarqaykuchu. Chayrayku mana llauchʼiyaspa ñaupajllamanpuni risqayku, Paypitaj atienekullasqaykupuni (Proverbios 3:5, 6).