Hungría suyoj ujnin llajtitanpi (Székesfehérvár) nacekorqani, chay llajtaqa unayña karqa, waranqa wata kurajña. Jinapis nipuni qonqayta atinichu imaschus Iskay Kaj Guerra Mundialpi pasasqanmanta.

Abuelitosniy uywawarqanku. Paykunamanta yuyarikullanipuni, astawanqa abuelay Elisabethmanta. Pay, Diospi creenaypaj yanapawarqa. Kinsa wataymantapacha paywan sapa chʼisi Padrenuestrota rezaj kani. Chaywanpis, 30 watasniyman jinaraj imachus niyta munasqanta entienderqani.

Juchʼuy kashajteyqa abuelitosniy qhawawaj kanku. Imajtinchus tatasneyqa tuta pʼunchay llankʼaj kanku sumaj wasita rantinankupaj. Chantapis, sapa iskay semana sabadospi tukuy familia tantakoj kayku khuska mikhunaykupaj. Chaymanta yuyarikuspaqa mayta kusikuni.

Kay 1958 watapi tatasniy sumaj wasita ranterqanku. Jinamantataj tatasniywan tiyakorqani. ¡Kusisqa kasharqani! Chaytaj mana unaypajchu karqa, imaraykuchus sojta killasnillanman tatay cancerwan wañuporqa.

May llakisqa kasharqani. Diosmantataj jinata mañakoj kani: “Dios, tatayta salvanaykita mañakorqayki. ¡Maytapuni faltachani! ¿Imaraykutaj mana uyariwarqankichu?”, nispa. Maypichus tatay kashasqantataj mayta yachayta munarqani. Tapukojtaj kani: “¿Cielomanchu ripun, niñachu jaykʼajpis rikusaj?”, nispa. Tatayoj wawastapis envidiawan qhawaj kani.

Ashkha watasta sapa pʼunchay panteonman rej kani. Tatay pʼampasqa kasharqa chaypi qonqoriykukuspa jinata Diosmanta mañakoj kani: “Dios, ¿maypitaj tatay kashanri?”, nispa. Chantapis imapajchus runasta ruwasqanta entiendeyta yanapanawanta mañakoj kani.

Chunka kinsayoj kashaspa Alemán parlayta yachakorqani, librosninkupi yachayta munasqayta tarinayta yuyaspa.  Kay 1967 watapi Jena llajtaman chayta yachakoj riporqani, chay llajtaqa Alemania oriental japʼiypi kasharqa. Chay suyumanta kaj yachayniyoj runas librosta qhelqasqankuta, kantumanta leerqani, astawanqa imapajchus runa kausasqanmanta parlaj librosta. Wakin imasta tarispapis, tapukusqayman kutichiykunata nipuni tarerqanichu. Chayrayku Diosmanta mañakullarqanipuni.

Kay 1970 watapi Hungría suyuman kutiporqani, chaypitaj Roseta rejserqani, piwanchus casarakorqani. Chay tiempopeqa Hungría suyu mana allinchu kasharqa, chayrayku casarakuytawan Austria suyuman ayqekorqayku. Noqaykoqa Sydney llajtaman (Australia) rinayku karqa, maypichus ujnin tioy tiyakorqa.

Pisi tiemponmanqa Austria suyupi llankʼayta tarerqani. Uj pʼunchay, ujnin llankʼaj masiy niwarqa Bibliapi tapuykunasniypa kutichiykunasninta tarinayta. Bibliamanta parlaj iskay librostataj qowarqa. Uj rato leerparqani, astawantaj yachayta munarqani. Chayrayku chay librota orqhojkunaman qhelqarqani, Jehovaj testigosninman, waj librostawan mañakunaypaj.

Casarakusqaykumanta watata juntʼasqayku pʼunchaypi, uj Testigo joven visitawarqayku. Payqa mañakusqay librosta apanpuwarqa, Bibliamanta yachachinawantataj niwarqa. Chay rato yachakuyta munasqayta nerqani. Maytapuni yachakuyta munarqani, chayrayku semanapi 2 kutita yachachiwaj, ¡sapa kutitaj 4 horasta!

Jehovaj testigosnin Bibliawan yachachiwasqankumanta kusisqa kasharqani. Húngaro parlaypi Bibliaypi Diospa sutin Jehová kasqanta rikuchiwasqankuta mana creeyta aterqanichu. Misamanqa 27 watataña rerqani, chaypitaj ni uj kutillatapis Diospa sutinta uyarerqanichu. Biblia sutʼita, maychus kajtataj nisqanqa tʼukuchiwarqa. Chaypeqa wañusqas puñusqas jina mana imatapis yachasqankuta yachakorqani (Eclesiastés 9:5, 10; Juan 11:11-15). Yachakullarqanitaj mosoj pacha kananta maypichus “manaña[...] wañuy kanqachu” (Apocalipsis 21:3, 4). Tatayta rikuyta suyakushani, imajtinchus “tukuy runas wañuymanta kawsarimpunanku[pi]” atienekuni (Hechos 24:15).

Warmiypis Bibliamanta yachakullarqataj. Usqhayllata ñauparerqayku, 2 killapitaj uj publicacionmanta yachakuyta tukorqayku. Jehovaj testigosninpa tukuy tantakuykunasninman rej kayku. Chaypi kʼachas kasqanku, wajyarikuyta yachasqanku, ujchasqataj kasqanku tʼukuchiwarqayku (Juan 13:34, 35).

Kay 1976 watapi Australiaman riyta atisqaykutaña niwarqayku. Chay suyuman chayaspaqa Jehovaj testigosninta maskʼarqayku, paykunataj kʼachamanta yanapawarqayku. Kay 1978 watapitaj Jehovaj testigosninña karqayku.

Chay chhika unayta tapukusqayman kutichiykunata tarerqani. Chantapis aswan sumaj tatata tarerqani, Jehová Diosman qayllaykuspa (Santiago 4:8). Astawanqa Diospa nisqan paraisopi, tataywan tinkukuyta suyakushani (Juan 5:28, 29).

Kay 1989 watapi Hungría suyuman kutiporqayku, Diosmanta familiaresniykuman, amigosniykuman, waj runasmanpis parlarinaykupaj. Ashkha runasman Bibliamanta yachacherqayku. Qanchis chunka kurajtaj Jehovaj testigosnin kanku, mamaypis.

Diosmantaqa 17 watata mañakorqani, tapukusqayman kutichinawanta suyaspa. Uyariwasqanmantataj 39 wataña pasan. Kunankamapis mañakushallanipuni. Jinapis kunanqa nini: “Agradeceyki, munasqa Tatáy, joven kashajtiy mañakusqayta uyariwasqaykimanta”.