Janet nin: “Tatay wañupusqantawan pisi tiemponman, qosay niwarqa waj warmiyoj kasqanta. Chantá chʼinllamanta pʼachanta apakapuspa iskay wawitasniytawan saqerpariwarqa”, nispa. Janet llankʼayta tarejtinpis, ganakusqan qolqeqa mana alcanzarqachu. Jinapis mana chayllachu karqa. Janet nin: “Mayta llakikorqani sapallay tukuy imata ruwanay kasqanta yachaspa. Mana waj tatas jina wawasniyman qoyta atisqaymanta juchachakoj kani. Kunanpis, runa imaynatachus qhawawasqaykumanta llakikullanipuni. Ichá yuyanku, qosaymanta mana tʼaqanakunaypaj mana kallpachakusqayta”.

Janettaqa Diosmanta mañakuy yanapan llakiyninta atipananpaj, Diosman qayllaykunanpaj, amigonta jina qhawananpajtaj. Janet nin: “Chʼisinpi astawan llakikuni. Chʼinpacha kasqanraykutaj llakiykunalla yuyayniyman jamuwan. Sumajta puñunaypajqa Bibliata leey, Diosmanta mañakuy ima yanapawan. Filipenses 4:6, 7 nin: ‘Ama imamantapis phutikuychejchu, astawanqa Diosmanta mañakuspaqa, imatachus munasqaykichejta mañakuychej, tukuy imamanta graciasta qospallapuni. Chantá Diosqa chay mana unanchay atina sonqo tiyaykuyninta sonqosniykichejman churanqa, chaytaj sonqoykichejta, yuyayniykichejtawan waqaychanqa’. Chaytaj mayta yanapawan. Wakin kuteqa tutantin Diosmanta mañakuni, reparanitaj Dios sonqo tiyaykuyninta qowasqanta.”

Jesús Orqopi yachachisqanqa, llakiypi rikukojtinchej yanapawanchej. Pay nerqa: “Tataykichejqa yachanña imaykichejchus pisisqanta, manaraj paymanta mañakushajtiykichej”, nispa (Mateo 6:8). Jinapis Diosqa mañakunanchejtapuni munan. Imaraykuchus chaynejta Diosman qayllaykunchej. Biblia nin: “Diosman astawan qayllaykuychej;  paypis qayllamusonqachej”, nispa (Santiago 4:8).

Diosmanta mañakoyqa tukuy imapi yanapawasunman. Jehovaqa runaspa “mañakusqankuta” uyarin, paypi atienekojkunatataj jarkʼan (Salmo 65:2). Chayrayku Jesusqa discipulosninman yachacherqa “Diosmantaqa mana saykʼuspa mañakunapuni kasqanta” (Lucas 18:1). Yachachinawanchejta, yanapanawanchejtataj mañakunallapuni, imajtinchus payqa uyariwasunpuni. Pay yanapanawanchejmanta ni jaykʼaj iskayrayanachu. Diosmanta mana saykʼuspa mañakuspaqa paypi atienekusqanchejta rikuchinchej (1 Tesalonicenses 5:17).

Diospi creenapajqa allinta rejsina tiyan (Juan 17:3). Bibliata estudiaspaqa Dios imaynachus kasqanta, imatachus yuyasqanta ima yachakunchej. Chantapis sapa ujninchejmanta Dios llakikusqanta yachanchej. Jinapis Diostaqa allinta rejsina uj sumaj amigota jina. Pillawanpis sumaj amigos kanapajqa mana rejsiytawanpachachu amigos kanchej, manaqa tiempowanraj. Ajinallatataj Diospi creenanchejpaj, atienekunanchejpaj ima allintaraj rejsinchej. Paypa munaynillanta ruwanchej, yanapawasqanchejtataj reparanchej (2 Corintios 10:15; Juan 8:29). Ajinamanta Janetqa llakiyninta atipan.

Janet nin: “Chay llakiy tiempopi kashajtiy, Jehová mana saqerpariwasqan mayta yanapawarqa. Contraypi mana allin ruwaykuna rikhurerqa, chaytaj mana atipanaypaj jina karqa. Diosmanta sinchʼita mañakusqaymanta Jehová chʼampaykunasniyta allincharqa. Sapa kuti Diosman agradecekushaspa imaspichus yanapawasqanta yuyarikuni. Payqa necesitashajtiypuni yanapawan. Chantapis sumaj amigoswan bendeciwan, pikunachus yanapariwanku, wawasniypis paykunamanta mayta yachakunku. *

”Kunan entiendeni imaraykuchus Jehová, Malaquías 2:16 versiculopi divorciakuyta chejnisqanta nin. Qhenchachakojqa qosanta chayri warminta mayta ñakʼarichin. Qosay saqerpariwasqanmanta unayña kajtinpis, wakin kuteqa llakikullanipuni. Ajina kashaspaqa wajkunata yanaparini, jinamanta llakiyniymanta qonqapuni.” Janetqa ajinamanta Bibliaj nisqanman jina ruwan wajkunamanta mana karunchakuspa * (Proverbios 18:1).

Janet nillanpuni: “Diosqa ‘wajcha wawaspa Tatanku, viudasmantaj kutikun’ chayta yachayqa mayta sonqochawan. Diosqa ni jaykʼaj qosay jinaqa saqerpariwasqaykuchu” (Salmo 68:5). Janetqa yachan mana Dioschu juchaman urmanapaj tanqawasqanchejta. Astawanqa llakiyta atipanapaj “mana michʼakuspa” may sumaj atiyninta qowanchej (Santiago 1:5, 13; 2 Corintios 4:7).

Chaywanpis, ¿imatá ruwasunman wañuy patapi rikukusqanchejmanta llakikuspa?