¿Imatá Biblia nin mikhuna pisiyasqanmanta?
Mundontinmanta gobiernos ninku, may chhika runas yarqhaymanta wañusqankuta. Chayrayku khuska trabajashanku tukuypaj mikhuna kananpaj. a Pero, ¿maykʼajllapis tukuypaj mikhuna kanmanchu? Imatachus Biblia nisqanta qhawariy.
Bibliaqa nerqaña kay tiempopi mikhuna pisiyananta
Bibliaqa willarqaña ‘qhepa p’unchaykunapi’ mikhuna pisiyananta. Kunantaj chay tiempopi kausakushanchej (2 Timoteo 3:1). Diosqa mana juchayojchu mikhuna pisiyasqanmanta. Pero willariwanchej kay tiempopi yarqhaykuna kananta (Santiago 1:13). Iskay profeciasmanta parlarina.
‘Kaynejpi jaqaynejpitaj yarqhaykuna kanqa’ (Mateo 24:7). Bibliaqa chaywan nisharqa mikhuna tukuynejpi pisiyananta. Mundontinpi mikhuna kasqantachus manachus estudiaj runas, kunallanraj jinata nerqanku: “Mundontinpeqa sapa kuti astawan yarqhay tiyan, mikhunas astawan pisiyashan, ashkha mikhunastaj manaña alimentochu kanku”, nispa. b Ashkha nacionespi may chhika runas niña mikhunata tarinkuchu. Chayrayku paykunamanta ashkhas yarqhaymanta wañupunku.
“Rikorqanitaj uj yana caballota, patanpi lloqʼasqa kajtaj makinpi uj balanzata japʼisharqa” (Apocalipsis 6:5). Chay versiculomanta caballowan caballopi lloqʼasqa kajwanqa, qhepa p’unchaykunapi yarqhaykuna kasqanwan ninakun. c Makinpi japʼisharqa chay balanzataj, mikhunata pesanapaj karqa. Caballopi lloqʼasqa kashaj purishajtintaj, uj parlay uyarikamorqa. Nerqataj mikhuna ashkha qolqe valenanta, kapusqanku mikhunatataj jallchʼanankuta (Apocalipsis 6:6). Chaytaj juntʼakushanpuni. Imaraykuchus mundontinpi may chhika runas mana mikhunata tarikuyta atinkuchu chayri mana qolqenku kapunchu mikhunata rantikunankupaj.
¿Maykʼajllapis yarqhaykuna chinkanqachu?
Yachayniyoj runasqa ninku, mikhunaqa mundontinmanta runaspaj kakushasqanta. Chanta, ¿imaraykutaj mikhuna mana tarikunchu? ¿Imatataj Jehová d Dios ruwanqa tukuypaj mikhuna kananpaj? Chayta Bibliapi qhawarina.
Problema: Ashkha runasqa pobres kasqankurayku chayri wakillanpaj qolqe kasqanrayku, mana mikhunayojchu kanku. Gobiernostaj mana chayta allinchayta atinkuchu.
¿Imatá Dios ruwanqa? Payqa uj Gobiernota sayarichinña. Chay Gobiernotaj kay jallpʼamanta tukuynin gobiernosta chinkarparichenqa (Daniel 2:44; Mateo 6:10). Kay tiempopi may chhika runas mayta trabajanku mikhunayoj kanankupaj. Jinapis Diospa Gobiernon kamachishajtenqa, manaña jinachu kanqa. Bibliaqa Diospa Gobiernonpi kamachej Jesucristomanta nin: “Pay pobresta salvanqa yanapata mañakuspa qhaparikojtinku. Salvallanqataj wajchasta, mana piniyojkunatapis. Jallpʼapeqa ashkha trigo poqonqa. Orqo puntaspi trigoqa mana oqhariy atinata poqonqa”, nispa (Salmo 72:12, 16).
Problema: Guerrasqa tukuy imata tukuchinku, qolqepis pisiyan. Chaynejtataj ashkha runaspaj mikhuna mana kanchu.
¿Imatá Dios ruwanqa? Jehovaqa “jallpʼantinpi guerrasta tukuchin. Diosqa flechana arcosta pʼakiran, tʼojsina lanzastapis tʼunata ruwan, soldadospa carretasninkutapis ninawan ruphaykuchin” (Salmo 46:9). Diosqa guerrapaj armasta tʼunarpanqa, guerrasta jatarichejkunatapis chinkarparichenqa. Chay kajtintaj manaña pipis yarqhaymanta ñakʼarenqachu. Biblia nin: “Pay kamachishajtenqa cheqan runas tʼikarenqanku. Allin kausaytaj wiñaypaj kanqa” nispa (Salmo 72:7).
Problema: Sinchʼita qhasasqanrayku, pisita chayri anchata parasqanrayku, chajras mana poqonkuchu, animalitospis wañuranku.
¿Imatá Dios ruwanqa? Payqa maychus tiemponpi parachimonqa. Chantapis niña anchata ruphanqachu, nitaj anchata qhasanqachu. Ajinamanta chajrasqa sumajta poqorenqanku. Biblia nin: “Diosqa chay sinchʼi wayrata chʼinyachin, marpi qhollchoqeyaj yakustaj tiyaykunku. Diosqa chʼaki jallpʼasta qochasman tukuchin [...]. Tʼajra jallpʼastapis juturisniyoj jallpʼasman tukuchin. Chaymantaj yarqhasqa runasta tiyakunankupaj pusan [...]. Chajrasta tarpunku, uvasta plantanku. Chay churasqankutaj sumajta poqorin”, nispa (Salmo 107:29, 35-37).
Problema: Qolqemanta wañurishaj sajra runasqa, mikhunata paykunallapaj japʼikapunku chayri mana saqenkuchu alimentoyoj mikhunas poqonanta.
¿Imatá Dios ruwanqa? Payqa Gobiernonnejta tukuy sajra runasta chinkarparichenqa (Salmo 37:10, 11; Isaías 61:8). Bibliaqa nin: Jehová “Diosmin sarurasqa runaspaj justiciata ruwapun. Payqa yarqhachikojkunaman mikhunata jaywarin”, nispa (Salmo 146:7).
Problema: Mundontinpi mikhunamanta casi khuskanpuni pierdekun chayri usun.
¿Imatá Dios ruwanqa? Paypa Gobiernon kamachishajtenqa, mana mikhuna usunqachu. Jesusqa kay jallpʼapi kashaspa mana mikhunata usucherqachu. Uj pacha, uj milagrota ruwaspa 5 mil runasmanta astawan mikhucherqa. Mikhuyta tukojtinkutaj discipulosninman kamacherqa: “Puchojta tantaychej ama usunanpaj”, nispa (Juan 6:5-13).
Jehová Diosqa yachan imaraykuchus yarqhaykuna kasqanta. Paypa Gobiernon kamachishajtintaj tukuy chaykunata chinkachenqa. Ajinamanta tukuy runaspaj sumaj alimentoyoj mikhunas kanqa, jinantintaj (Isaías 25:6). Maykʼajchus Diospa Gobiernon kamachiyta qallarinanta yachanaykipaj, “¿Maykʼajtaj kamachiyta qallarenqa?” nisqa yachaqanata leeriy.
a Naciones Unidas nisqamanta tukuynin naciones, 2015 watapi nerqanku 2030 watapaj yarqhayta chinkachinankuta.
b Chayta kay organizaciones nerqanku: Organización de las Naciones Unidas para la Agricultura y la Alimentación, Fondo Internacional de Desarrollo Agrícola, Fondo de las Naciones Unidas para la Infancia, Programa Mundial de Alimentos de las Naciones Unidas, Organización Mundial de la Salud ima.
c Apocalipsis libropi tawa caballospi lloqʼasqa kajkunamanta astawan yachakunaykipaj, “¿Ima niyta munan tawa caballospi lloqʼasqa kajkuna?” nisqa yachaqanata leeriy.
d Diospa sutenqa Jehová (Salmo 83:18). “¿Pitaj Jehová?” nisqa yachaqanata leeriy.
Kaykunatapis qhawaykurillawajtaj
BIBLIAMANTA TAPUYKUNA
¿Ima señaltaj rikuchin ‘qhepa pʼunchaykunapi’ kausashasqanchejta?
Bibliaqa willawanchej imaschus kananta niraj tukukuy chayamushajtin.
TORREMANTA QHAWAJ
¿Ima niyta munan tawa caballospi lloqʼasqa kajkuna?
Imachus chay mosqoy niyta munasqanmanta yachakuy.
BIBLIAMANTA SUMAJ YACHACHIYKUNA
¿Imastataj Diospa Gobiernon ruwanqa?
Jesusqa kay Jallpʼapi kashaspa Diospa Gobiernonmanta astawan parlarqa, ni imamantapis jinata parlarqachu. Jesuspa yachachisqasnenqa, chaymantapacha Diospa Gobiernon jamunanta mañakunku.
