“Imillitallaraj kashajtiy hermanoyqa sapa día maqawaj, millay imastataj niwaj. Casarakusqaytawantaj suegraypis mayta kʼumuykachachiwaj. Paywan suegroywanqa esclavankuta jinalla qhawawaj kanku. Chayrayku wañuchikuyta munarqani” (Madhu, a India).

 Organización Mundial de la Salud nisqaqa nin “warmistaqa mundo enteropi sufrichisqankuta”. Chantapis nillantaj sapa kinsa warmismanta ujta, maykʼajllapis kausayninkupi maqasqankuta chayri abusasqankuta.

 Sichus qanpis ajinapi rikukushanki chayqa, ichá mayman rispapis manchachikunki pipis maqasunanmanta, millay imasta nisunanmanta chayri abusasunanmanta. Warmis ajinapi rikukusqankurayku, ichapis yuyawaj warmismanta ni pi llakikusqanta. Diosninchejrí, ¿warmismanta llakikunchu?

 Bibliaj nisqan: “Qharitawan warmitawan ruwarqa” (Génesis 1:27).

 ¿Ima niytá munan? Diosqa qharitawan warmitawan ruwarqa, munantaj iskayninku respetasqa kanankuta. Chantapis Diosqa munan, qharisqa warminkuta paykuna kikinkuta jina munakunankuta. Nitaj munanchu ñawillankupi purichinankuta, sonqonta nanachinankupaj jina imatapis ninankuta chayri maqanankuta (Efesios 5:33; Colosenses 3:19). Arí, Diosninchejqa munan warmis ni imamanta manchachikuspa kausakunankuta.

 “Imillitallaraj kashajtiy, wakin familiaresniy abusawarqanku. 17 watasniyoj kashajtiytaj, jefeyqa niwarqa mana paywan puñuykojtin trabajomanta wijchʼunawanta. Casarakusqaytawantaj qosay, tatasniy, vecinosniypis, ni imapaj valesqayta yuyachiwaj kanku. Chaymantataj Ruwawajninchej Jehovata b rejserqani. Payqa warmista respetasqanta yachakorqani, chaytaj reparachiwarqa pay munakuwasqanta, may valorniyojpajtaj qhawawasqanta” (María, Argentina).

 Bibliaj nisqan: “Wakin amigosqa hermanonchejmantapis aswan munakuyniyoj kanku” (Proverbios 18:24).

 ¿Ima niytá munan? Uj sumaj amigaqa mayta yanapasunkiman. Chayrayku atikojtenqa de confianza amigaykiman imaynachus sientekusqaykita willariy.

 “20 watasta jinapuni ni piman willarqanichu abusawasqankuta. Chayrayku mana kusisqachu karqani, desesperación jina japʼiwaj, llakisqallataj kaj kani. Chay llakiyniyta willakojtiytaj, munakuywan uyariwasqanrayku sonqoy phaj nirerqa” (Elif, Turquía).

 Bibliaj nisqan: “Diosqa qankunamanta llakikun, chayrayku tukuy llakiyniykichejta makinman saqepuychej” (1 Pedro 5:7).

 ¿Ima niytá munan? Diosmanta mañakojtiyki payqa uyarisonqapuni (Salmo 55:22; 65:2). Diosqa mayta munakususqanrayku, yanapasunkiman may valorniyoj kasqaykita reparanaykipaj.

 “Jehovata rejsisqayqa yanapawarqa sonqoyta mayta nanachiwasqankuta pisimanta pisi qonqanaypaj. Kunanqa ima llakiyniytapis payman willakuni. Diosqa sumajta entiendewan imaynachus sientekusqayta. Payqa sumaj amigoy” (Ana, Belice).

 Bibliaj nisqan: “Qanmin justiciata ruwapunki wajcha wawaspaj, jinallataj kʼumuykachachisqa kajkunapajpis. Chaywanqa jallpʼallamanta ruwasqa runaqa manaña paykunata manchachenqachu” (Salmo 10:17, 18).

 ¿Ima niytá munan? Jehovaqa tumpamantawan justiciata ruwanqa. Manaña warmista kʼumuykachachenqankuchu, niñataj maqanqankuchu.

 “Jehovaqa warmis, imillitas sufrichisqa kasqankuta tumpamantawan qʼalata tukuchenqa. Chayta yachaytaj maytapuni kusichiwan. Manaña anchata llakikunichu” (Roberta, México).

 Ima suyakuytachus Biblia qowasqanchejta, imaraykuchus chay nisqanpi atienekuyta atisqanchejta, Jehovaj testigosnintaj imaynatachus Bibliawan yanapasqaykuta yachayta munanki chayqa, visitarisunaykuta mañakuy.

 Kay hojitata uraqachiy impriminaykipaj.