Éxodo 15:1-27
15 Tsayno salvaptinmi Moiséswan lapan Israel runakuna TAYTA DIOSTA alabarqan* kayno nir:TAYTA DIOSTAMI alabashaq.Paymi Egipto runakunata, cawallukunata y muntaraqkunatapis poderninwan lamarcho ushakätsishqa.Tsayta musyarmi pïmaypis tantiyakunqa munayniyuq kashqanta.
2 TAYTA DIOSMI imaypis valorta qoman.Paytami imaypis alabä*.Diosnï kaptinmi payta alabashaq.Paymi awkilükunapa Diosnin.Imaypis paylatami adorashaq.
3 TAYTA DIOSQA munayniyuq soldädumi.*Jutinpis *Yahwehmi kaykan.
4 TAYTA DIOSMI carrëtantinta Faraónpa soldädunkunata lamar rurinman talpukätsishqa.Alin chölu capitankunatapis Puka Lamarchömi shenqaypa wanutsishqa.
5 Hondu lamarmi ultakurkushqa.Ruminömi ruriyaq talpukashqa.
6 TAYTA DIOS, munayniyuq karmi alawqa kaq makikiwan chikimaqnïkunata elqätsishqanki.
7 Lapanpaq munayniyuq kashpaykimi contraykikunata ushakätsishqanki.Pasaypa rabyakuptikimi tsaki oqsha rupaqno paykuna ushakashqa.
8 Rabyashqa pükariptikimi ishkayman yaku rakikashqa.Yaku pulchaqyashpan tapianöraqmi ichirashqa.Lamar rurinchömi yakupis chukru rikakushqa.
9 Conträ runakunami kayno nipäkurqan:“Taripanäyaq qatipäshaq.Imaykantapis qechurkamurmi rakipänakushaq.Tsayno rurarkur pasaypami kushikushaq.Espädäwanmi wanutsir ushashaq”.
10 Jina kaqta pükariptikimi lamar ultakurkushqa.Bunyaypa bunyaykaq yaku rurinmanmi plömunöraq talpukashqa.
11 TAYTA DIOS, qamnöqa ima diospis manami kantsu.Qamnöqa manami pipis *santu kantsu.Espantaypaq kaqkunatami rurashqanki.
12 Podernikiwan castigaptikimi Egipto runakunata patsa ultakurkushqa.
13 Salvashqayki runakunatami itsanqa kuyapaylapa pushaykanki.Podernikiwanmi pushaykanki tashqayki *sagrädu wayikiman.
14 Tsayta mayarmi maytsay nacioncho taq runakuna mantsakur siksikyanqa.Filisteo runakunapis* mantsakashpanmi almatashqa rikakunqa.
15 Edomcho taq capitankunapis mantsakashpanmi pasaypa ukakanqa.Moabcho taq mandaqkunapis mantsarir siksikyanqami.*Canaáncho taq runakuna manami ima ruraytapis kamäpakunqatsu.
16 Paykuna pasaypa mantsakutsun.Munayniyuq kashqaykita rikar äyakashqa rikakutsun.Tsayno kaykulätsun salvashqayki runakuna pasashqanyaq.
17 TAYTA DIOS, tänaykipaq akrashqayki jirkaman pushapäkamay.Tsaycho tänaykipaq kikikimi kamarishqanki.
18 TAYTA DIOSMI imayyaqpis rey kaykan.
María cantashqan
19 Carrëtankunawan y cawallunkunawan lamar chawpinpa Faraón pasaykämuptinmi lamar yakuta kashqanman kutitsir TAYTA DIOS lapanta tsaparkurqan. Israel runakunami itsanqa tsakilapana pasarqan.
20 Tsaypitanami Aarónpa panin profetïsa María panderëtata tukayta qalaykurqan. Tsaymi lapan warmikunapis panderëtankunata tukar kushikushpan paywan danzaraykar aywapäkurqan.
21 Tsaychömi María cantarqan kayno nir:“TAYTA DIOSTA alabashun.Payqa lapantapis mantsariypaqmi ushakätsishqa.Muntaraqkunatapis cawalluntintami lamarman talpukätsishqa”.
Maracho asqaq yaku kashqan
22 Tsaypitanami Israel runakunata Moisés pusharqan Puka Lamarpita Shur nishqan chunyaq jirkaman. Kimsa junaq aywaykarpis yakuta manami tarirqantsu.
23 Mara partiman chayaykur yakuta tarirpis asqaq kaptinmi upuyta mana munapäkurqantsu. Yaku asqashqanpitami tsay partipa jutinta churaparqan Mara* jutin kananpaq.
24 Tsawraqa runakuna rabyakushpan Moiséspa contran sharkur kayno nipäkurqan: “Kananqa ¿ima yakutataq upushun?”
25 Tsawraqa TAYTA DIOSTA Moisés manakurqan yanapananpaq. Manakuptinmi TAYTA DIOS rikatsirqan qeruta. Tsay qeruta yakuman winarpuptin manami asqarqannatsu.
Israel runakunata tsayno probaykurmi leykunata y estatütukunata tantiyatsishpan
26 Tayta Dios kayno nirqan: “Nishqäkunata cäsukamaptiki, munashqäno kawaptiki, mandamientükunatapis cäsukur lapan estatütükunatapis cumpliptikiqa Egipto runakunata qeshyawan castigashqänöqa manami qamkunata castigashaykitsu. Noqami qamkunata aliyätsiq TAYTA DIOS kaykä”.
27 Tsaypita aywakurnami Israel runakuna chayarqan Elim partiman. Tsaycho karqan chunka ishkay pukyukuna y qanchis chunka (70) palmërakuna. Tsay pukyukuna nawpanchömi toldunkunata ichitsipäkurqan patsakärinanpaq.
Ichic wilacuycuna
^ 15.1 Apoc. 15.3.
^ 15.2 Éxo. 14.13-14; Sal. 118.14; Isa. 12.2.
^ Yahweh Yahwehtami wakin traduccionkuna castellänucho traducin Jehová nir, wakinmi traducin Yavé nir, wakinmi traducin Yahweh nir y wakinnami traducin EL SEÑOR nir. Quechua Bibliachöpis Yahweh atska kutimi traduciraykan TAYTA DIOS nir.
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
Runakuna santu kashqanta nirqa Tayta Dios akrashqan runakuna kashqanta (Deut. 7.6) y pay munashqanno jutsaynaq kawashqantami niykan (Lev. 20.7-8).
Sitiukuna y manëjukuna Tayta Diospaq kaptinqa sagrädu kashqantami niykan. Tsaymi Israel nacionpis (Zac. 2.12), Jerusalén markapis (Isa. 48.2) y templupis (Sal. 68.5) sagrädu kaykan. Tsaynölami jamay junaqpis (Éxo. 31.14) y fiestakunapis (Lev. 23.2) sagrädu kaykan.
^ sagrädu Liyinki santupita tantiyatsikuyta.
^ 15.14 Gén. 21.32-34; Éxo. 13.17.
^ Canaán Canaánchöqa atska markakunami karqan. Cada markachömi juk mandaq rey karqan. Tsaychömi tarqan ceneo runakuna, cenezeo runakuna, cadmoneo runakuna, heteo runakuna, ferezeo runakuna, refaíta runakuna, amorreo runakuna, cananeo runakuna, gergeseo runakuna y jebuseo runakunapis (Gén. 15.19-21). Abrahamtami Tayta Dios promitirqan paypita miraqkunata Canaánta qoykunanpaq (Gén. 17.8).
^ 15.23 Mara ninanqa asqaq ninanmi.
