Éxodo 27:1-21
27 “Tsaynöpis acacia qerupita cuadrädu *altarta ruratsinki. Tsay altarpa anchunpis largunpis kanqa ishkay metru ishkay chunka pitsqa centïmetru (2.25). Altunnami kanqa juk metru ishkay chunka pitsqa centïmetru (1.25).
2 Chuskun esquïnankunacho waqratano ruratsinki. Tsay waqrakuna kanqa altarwan tsay piëzalami. Altarpa jananta y rurinta bronciwan enchapatsinki.
3 Altarpa lapan manëjunkuna kanqa broncipitami. Tsay manëjukuna kanqa uchpa shuntakuna, tenäzakuna, trinchikuna, tazonkuna y kanalakuna.
4 Tsaynöla rejïllantapis ruratsinki broncipita. Nirkur rejïllapa chuskun esquïnaman tanatsinki broncipita rurashqa argöllakunata.
5 Tsay rejïllata altar rurinman churatsinki. Tsayno churatsiptikimi altar pulancho tsakraranqa.
6 Tsaynöpis acaciapita ishkay largu qerukunata rurarkatsir bronciwan enchapatsinki.
7 Tsay qerukunata altarpa ishkan läducho kaykaq argöllankunapa pasatsinki wintupäkunanpaq.
8 Tsay altarta tablapita ruratsinki tsapanaynaqta. Lapanta ruratsinki jirka puntacho rikatsishqätanöla.
Sagrädu Toldupa patiunta ruratsinanpaq tantiyatsishqan
Éxodo 38.9-20
9 “*Sagrädu Tolduqa patiuyuq kanqa. Tsay patiuta jiruruypa tsaparänanpaq cortïnata awatsinki llanula putskashqa lïnu hïlupita. Sur kaq lädunpami largun kanqa chusku chunka pitsqa (45) metru.
10 Cortïnata churatsinanpaq ishkay chunka (20) tushakunata broncipita ruratsinki. Tushakunapa jawiräkunanta broncipita ishkay chunkata ruratsinki. Cortïnata tsararänanpaq ganchukunata y argöllakunatapis qellaypita ruratsinki.
11 Norti kaq lädunpapis patiupa cortïnan kanqa chusku chunka pitsqa (45) metru. Tushankunatapis y jawiräkunantapis broncipita ishkay chunkata (20) ruratsinki. Ganchunkunata y argöllankunatapis qellaypita ruratsinki.
12 “Inti jeqanan kaq lädupa cortïnapa largun kanqa ishkay chunka ishkay metru pulan (22.5). Tsay largun kanqa jukaq esquïnapita jukaq esquïnayaq. Tushankunata y jawiräkunantapis chunkata ruratsinki.
13 “Inti jeqamunan kaq lädupapis cortïnapa largun kanqa ishkay chunka ishkay metru pulan (22.5).
14 Tsay lädupami punku kanqa. Punkupita itsuq kaq lädupa kanqa qanchis metru cortïna. Cortïnata tsararänanpaq ichitsinki kimsa tushakunata cada ünunta jawiräkunanman.
15 Tsaynöla punkupita alawqa kaq lädumanpis churatsinki qanchis metru cortïnata. Tsay cortïnata tsararänanpaq ichitsinki kimsa tushakunata cada ünunta jawiräkunanman.
16 “Patiuman yaykuna punkupaq ruratsinki isqun metru largu cortïnata. Tsayta awatsinki azul, granäti y puka milwa hïlukunapita y llanula putskashqa lïnu hïlupitapis. Tsay cortïnata shumaq bordatsinki. Cortïnata tsararänanpaq ichitsinki chusku tushakunata cada ünunta jawiräkunanman.
17 Patiucho kaykaq lapan tushakuna qellaypita rurashqa argöllayuq y ganchuyuq kanqa. Tsay tushakunapa jawiräkunanpis broncipita kanqa.
18 Tinkunantsi Sagrädu Toldupa patiun kanqa chusku chunka pitsqa (45) metru largu. Anchunna kanqa ishkay chunka ishkay metru pulan (22.5). Altunnami kanqa ishkay metru ishkay chunka pitsqa centïmetru (2.25). Cortïnanta ruratsinki llanula putskashqa lïnu hïlupita. Tushakuna jawiräkunan kanqa broncipita.
19 Sagrädu Toldupa lapan manëjunkunapis kanqa broncipita. Tsaynölami Sagrädu Tolduta ichitsinaykipaq ruri kaq y waqta kaq estäcankunapis broncipita kanqa.
Candelabrupaq aceitita rurananpaq tantiyatsishqan
Levítico 24.1-3
20 “Israel runakunata ninki olïvupita aceitita rurarkur apapäkamunanpaq. Tsay aceiti kanqa candelabru imaypis ratananpaq.
21 Tsay candelabrutami Tinkunantsi Tolducho warayta nawpächo ratananpaq cada tardi Aarón y tsurinkuna ratatsinqa. Tsayno ratanqa *Pactu Babulta tsaparaq cortïna waqtanchömi. Tsay nishqäkunaqa imayyaqpis leymi kanqa qamkunapaq y qamkunapita miraqkunapaqpis.
Ichic wilacuycuna
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ Sagrädu Toldu Liyinki Tinkuna Toldupita tantiyatsikuyta.
^ Pactu Babul Pactu Babulqa jananpa y rurinpa qoriwan enchapashqa cajonmi karqan. Tsay babulpa jananchönami qoripita rurashqa ishkay angilkuna kaykarqan. Tsay babulchömi churaraykarqan ishkay läjaman Tayta Dios qelqashqan chunka mandamientukuna, Aarónpa tukrun y Tayta Dios kamaripashqan maná mikuypis. Pactu Babultami Tayta Dioswan Tinkuna Toldu ruriman churarqan. Castellänuchöqa Pactu Babultami “arca del pacto” nipäkuq (Éxo. 25.10-22; 37.1-9).
