1 Crónicas 13:1-14
13 Tsaypitanami Tayta Diospa babulninta Jerusalénman apananpaq David wilanakurqan waranqa (1,000) soldädukunapa capitanninkunawan, pachak (100) soldädukunapa capitanninkunawan y wakin capitankunawanpis.
2 Nirkurmi lapan Israel autoridäkunata David kayno nirqan: “TAYTA DIOSNINTSI kachapämaptintsiqa y qamkuna munapäkuptikiqa maytsaycho taq Israel mayintsita wilakatsishun shamur yanapamänantsipaq. Tsaynöpis markakunacho y jalqakunacho taq cürakunaman y *levitakunaman wilakatsishun shamur yanapamänantsipaq.
3 Paykuna chayamuptin Tayta Diosnintsipa babulninta apamushun. Saúl mandaq kashqan witsanpita patsami mana shuntamuypa jitarätsikushqantsi”.
4 David nishqankuna ali kashqanta tantiyakurmi lapan runakuna awnipäkurqan shuntapäkamunanpaq.
Babulta Jerusalénman David apayta kamashqan
2 Samuel 6.1-11
5 Tsaypitami Tayta Diospa babulninta Quiriat-jearimpita apäshinanpaq Davidqa lapan Israel runakunata qayatsirqan Egipto kuchuncho kaykaq Sihor partipita hasta Hamat partiman yaykunayaq.*
6 Nirkurnami lapan Israel runakunawan Quiriat-jearimman David aywapäkurqan TAYTA DIOSPA babulninta shuntamunanpaq. Quiriat-jearimpa jukaq jutinmi karqan Judácho kaq Baala. Babul janancho ishkay *querubín chawpinchömi TAYTA DIOSPA trönun kaykan.*
7 Mushuq carrëtaman babulta churarkurmi Abinadabpa wayinpita apayta qalaykurqan. Tsayno apaptin Uza y Ahío cürakunami puntaparqan.
8 Davidpis y lapan Israel runakunapis Tayta Diospa nawpanta* qatswaraykar aywarmi lapan shonqunwan kushishqa alabapäkurqan arpankunata, *salteriunkunata, panderëtankunata, platïllunkunata y *cornëtankunata tukar.
9 Quidón Ëra nishqanman chayaykur törukuna trancakar upaksaptinmi Uzaqa babul ishkinaptin tuknarqan.
10 Tsayno tuknaptinmi TAYTA DIOS pasaypa rabyakushpan Uzata jinan höra wanutsirqan. Tsaymi Diospa nawpancho wanurqan.
11 Uzata TAYTA DIOS wanutsiptinmi David pasaypa rabyakurqan. Tsaypitami tsay ërapa jutinta churaparqan Pérez-uza* jutin kananpaq. Tsay jutilami hasta kananyaqpis kaykan.
12 Tsay junaqmi Tayta Diosta mantsakushpan David kayno nirqan: “¡Kakulätsun, tayta! Tayta Diospa babulninta ¡imapaqtaq apashaqpis!”
13 Tsayno nirmi tsay babulta *Davidpa Markanman mana aparqannatsu. Tsaypa trukanqa paytakurqan Gat markapita kaq Obed-edompa wayinmanmi.
14 Kimsa killayaqmi babul tsaycho paytakararqan. Tsaymi Obed-edomta y aylunkunata Tayta Dios lapanchöpis yanaparqan.*
Ichic wilacuycuna
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ 13.5 1Sam. 7.1-2.
^ querubín Querubinqa älayuq angilkunami karkaykan. Querubinkunatami Tayta Dios churarqan Edén huertata täpananpaq (Gén. 3.24). Tsaynölami Pactu Babulpa tsapanan jananchöpis qoripita rurashqa ishkay querubinkuna ichiraykarqan (Éxo. 25.18-22; Heb. 9.5). Salomón ruratsishqan templuchöpis ishkay querubinkunami qoriwan enchapashqa karqan. Tsay querubinkunapa altunmi karqan chusku metru pulan (1Rey. 6.23-29). Profëta Ezequielpis revelacionchömi querubinkunata rikarqan (Eze. 10.1-22; 41.18-19).
^ 13.8 Tayta Diospa nawpanta aywashqanta nirqa babulninpa nawpanta y qepanta aywashqantami niykan.
^ salteriu Salteriuqa taksha arpa niraqmi kaykan (1Sam. 10.5; 2Sam. 6.5; 1Rey. 10.12; 1Crón. 13.8; 15.28; 2Crón. 5.12; Sal. 33.2; 57.8; 81.2; Isa. 5.12).
^ cornëta Cornëtaqa carnipa waqranpita rurashqami karqan. Cornëtata cüra tukashqanta rikanaykipaq rikanki Lev. 25.9 versïculucho kaykaq dibüjuta. Qellaypita rurashqa cornëtapis karqanmi (Núm. 10.1-10).
^ 13.11 Pérez-uza ninanqa Uzapa contran yarqamushqa ninanmi.
^ Davidpa Markan Davidpa Markanqa manami David yurishqan Belén markatsu karqan, sinöqa Sión jirkancho kaykaq Jerusalén markami. Tsayno jutin karqan jebuseo runakunata tsaypita David qarqushqa kaptinmi (2Sam. 5.6-7). Tsaychömi reypa palaciunta y templuta sharkatsipäkurqan. Jerusalén marka jatunyaptinpis Sión jirkancho kaykaq partilatami Davidpa Markan kashqanta nipäkun.
^ 13.14 1Crón. 26.4-5.
