1 Crónicas 19:1-19
19 Tsaypitanami amonita runakunapa mandaqnin rey Nahas wanurqan. Paypa trukannami tsurin Hanún rey karqan.
2 Tsawraqa David kayno nirqan: “Nahaswan kuyanakushqänömi tsurin Hanúnwanpis kuyanakushaq”.
Tsayno nirmi Hanún kaqman propiukunata kacharqan taytan wanushqanpita shakyätsinanpaq.
Kachashqan propiukuna chayaptinmi
3 soldädunkunapa capitanninkuna Hanúnta kayno nipäkurqan: “¿Criyinkiku taytayki wanushqanpita shakyätsishunaykipaq runakunata David kachamushqanta? ¿Manatsuraq niq tumpala shamushqa markantsita rikapakunanpaq y soldädunkunawan kutimurna ushakätsimänantsipaq?”
4 Tsayno nipäkuptinmi Hanúnqa David kachashqan runakunata prësu tsariykatsir shapranta ruturqan. Nirkurmi siki patan lädupa tünicanta rutuparir qarqurirqan.
5 Tsayno ruraptinmi tsay runakuna pasaypa penqaytukushqa kutikärirqan. Hanún tsayno rurashqanta mayaykurmi tsay runakunaman propiuta David kacharqan kayno nipäkunanpaq: “Jericó markalachöshi täkärinki shaprayki winananyaq. Nirkurraqshi kutipäkamunki”.
6 Davidta rabyanätsishqanta tantiyarmi guërra carrëtakunata y cawallu muntaraqkunata minkakunanpaq amonita runakuna kimsa chunka kimsa waranqa (33,000) kïlu qellayta apatsipäkurqan Aram-naharaimman, Aram-maacaman y Sobaman.
7 Tsaynölami minkakärirqan Maaca markapa mandaqnin reyta, soldädunkunata y kimsa chunka ishkay waranqa (32,000) guërra carrëtakunata. Tsay soldädukuna aywarmi campamentunta sharkatsirqan Medeba marka tsimpancho. Tsaymanmi amonita runakunapis aywapäkurqan pelyacho yanapananpaq.
8 Tsayta musyaykurmi lapan alinnin kaq soldädunkunata y capitannin Joabta David kacharqan pelyaq aywapäkunanpaq.
9 Tsaymi amonita soldädukuna kamarikurkur marka punkuman churanakurqan Israel runakunawan pelyapäkunanpaq. Siria nacionpita aywaq soldädunkunawan mandaq reykunanami pampaman churanakurqan Israel runakunawan pelyapäkunanpaq.
10 Tsaymi nawpanpa y qepanpa atacananpaq kashqanta musyashpan alinnin kaq soldädunkunata Joab akrarqan Siria soldädukunawan pelyaq aywananpaq.
11 Wakin soldädukunatanami wawqin Abisaitawan kacharqan amonita soldädukunawan pelyapäkunanpaq.
12 Tsaymi Abisaita kayno nirqan: “Siria soldädukuna vinciykämaqta rikarqa shapäkamunki yanapamänaykipaq. Tsaynölami amonita soldädukuna vinciykäshushqaykita rikarqa noqapis shamushaq soldädükunawan yanapanäpaq.
13 ¡Mana mantsakuypa pelyashun! ¡TAYTA DIOSNINTSI qomashqantsi nacionnintsi rayku y markantsi rayku pelyashun! ¡TAYTA DIOS munashqanno kaykulätsun!”
14 Tsaymi pelyananpaq soldädunkunawan Joab aywaptin Siria soldädukuna qeshpir aywakärirqan.
15 Siria soldädukuna qeshpishqanta rikaykurmi amonita soldädukunapis Joabpa wawqin Abisaipita qeshpir markaman yaykapäkurqan. Tsayno qeshpikäriptinmi Jerusalénpana soldädunkunawan Joab kutikurqan.
16 Israel runakuna tsayno vinciptinmi Siria runakuna Éufrates mayu tsimpancho taq Siria mayinkunata minkakärirqan yapay pelyäshinanpaq. Lapan soldädukunapa mandaqninmi Hadad-ezerpa capitannin Sofac karqan.
17 Pelyananpaq juntakashqanta wilaykuptinmi Davidqa lapan Israel soldädukunata pushakurkur Jordán mayuta tsimparir churanakurqan pelyapäkunanpaq. Tsaymi Siria soldädukuna atacayta qalaykurqan.
18 Davidpa soldädunkuna vinciptinmi pelyaykashqanpita Siria soldädukuna qeshpir aywakärirqan. Tsaychömi Davidwan kaykaq soldädukuna wanutsipäkurqan qanchis waranqa (7,000) carrëtawan puriq soldädukunata y chusku chunka waranqa (40,000) chakipa aywaq soldädukunata. Tsaynölami Siria soldädukunapa capitannin Sofactapis wanutsipäkurqan.
19 Tsayno vinciptinmi Hadad-ezerta yanapaq reykuna rindikushpan Davidpa munayninchöna kawapäkurqan. Tsaypita patsa Siria soldädukuna mananami amonita soldädukunata yanaparqannatsu.
