1 Crónicas 23:1-32
23 David pasaypa awkinna kashpanmi tsurin Salomónta churarqan Israel runakunapa mandaqnin rey kananpaq.*
2 Tsaypaqmi David shuntatsirqan Israel runakunapa lapan mandaqninkunata, cürakunata y *levitakunata.
3 Juntakaykuptinnami levitakunata kimsa chunka (30) watayuqpita janaman olqu kaqkunata yupatsirqan. Tsayno yupaptinmi karqan kimsa chunka pusaq waranqa (38,000) runakuna.
4 Paykunapitami churarqan ishkay chunka chusku waranqa runakunata (24,000) templucho arupäkunanpaq. Soqta waranqa runakunatana (6,000) churarqan mandäshiqninkuna y juezkuna kananpaq.
5 Chusku waranqa runakunata (4,000) churarqan templu punkuta täpananpaq. Tsaynöpis chusku waranqa runakunata (4,000) churarqan David ruratsishqan instrumentuta tukar TAYTA DIOSTA alabananpaq.
6 Trukanakuypa templucho arunanpaqmi levitakunata David rakirqan kimsa puntaman. Cada puntapa jutintami churaparqan Levípa tsurinkunapa jutinkunata. Tsaymi juk puntapa jutin karqan Gersón, juk puntapa jutin karqan Coat y juk puntapa jutinna karqan Merari.
Gersónpita miraqkuna
7 Gersónpa tsurinkunami karqan Laadán y Simei.
8 Laadánpa tsurinkunami karqan kimsa. Qechpa kaqpa jutinmi karqan Jehiel. Paypa qepanman yurirqan Zetam. Zetampa qepanmannami yurirqan Joel.
9 Simeipa kimsan tsurinkunapa jutinkunami karqan Selomit, Haziel y Harán. Paykunami karqan Laadán aylupa mandaqninkuna.
10 Simeipa tsurinkunami karqan chusku. Paykunapa jutinkunami karqan Jahat, Zina, Jeús y Bería.
11 Jahatmi karqan qechpa. Paypa qepanmanmi yurirqan Zina. Jeúspa y Beríapa tsurinkuna walkala kaptinmi paykunapita miraq runakuna juk aylula karqan.
Coatpita miraqkuna
12 Coatpa tsurinkunami karqan chusku. Jutinkunami karqan Amram, Izhar, Hebrón y Uziel.
13 Amrampa tsurinkunami karqan Aarón y Moisés. Aarónta y paypita miraqkunatami Tayta Dios akrarqan nawpancho *sagrädu sacrificiukunata imaypis rupatsinanpaq, inciensuwan imaypis qoshtatsinanpaq y Tayta Diospa jutincho runakunata imaypis bendicionta qonanpaq.*
14 Tayta Diosta sirviq Moiséspita miraqkunapis karqan *levitakunami.
15 Moiséspa tsurinkunami karqan Gersón y Eliezer.
16 Gersónpa qechpa tsurinpa jutinmi karqan Sebuel.
17 Eliezerpa qechpa tsurinpa jutinmi karqan Rehabías. Tsaypita masqa Eliezerpa tsurin manami karqannatsu. Rehabíaspami itsanqa tsurinkuna atska karqan.
18 Izharpa qechpa tsurinpa jutinmi karqan Selomit.
19 Hebrónpa qechpa tsurinpa jutinmi karqan Jerías. Jeríaspa qepanmanmi yurirqan Amarías. Amaríaspa qepanmanmi yurirqan Jahaziel. Jahazielpa qepanmannami yurirqan Jecamán.
20 Uzielpa qechpa tsurinpa jutinmi karqan Micaías. Paypa qepanmanmi yurirqan Isías.
Meraripita miraqkuna
21 Meraripa tsurinkunami karqan Mahli y Musi. Mahlipa tsurinkunami karqan Eleazar y Cis.
22 Eleazar wanurqan olqu tsurin manaraq kaptinmi. Paypa warmi tsurinkunami tiyun Cispa tsurinkunawan tarqan.
23 Meraripa tsurin Musipami tsurinkuna karqan Mahli, Edar y Jeremot.
24 Tsaynömi *levita runakuna karqan.
Levitakuna templucho imata rurashqanpis
Levitakunata censarmi mayqan aylupita kashqantapis jutinpa jutinpa apuntarqan. TAYTA DIOSPA templuncho arunanpaqmi paykunata censarqan ishkay chunka (20) watayuqpita janaman. Cada ünunmi aylunkunapa mandaqnin karqan.
25 Davidmi kayno nirqan: “Kuyamaqnintsi TAYTA DIOSMI yanapamashqantsi jawkala kawanantsipaq. Paymi Jerusaléncho imayyaqpis tanqa.
26 Tsaymi levitakuna Tinkuna Tolduta y tsaycho kaqkunata maypapis manana puritsinqanatsu”.*
27 David wanunanpaqna kaykar nishqannölami Tayta Diospa templuncho arupäkunanpaq levitakunata ishkay chunka (20) watayuqpita janaman censapäkurqan.
28 Levitakunaqa TAYTA DIOSPA templunchömi Aarónpita miraq cürakunata yanaparqan. Tsaymi encargädu karqan templupa patiunta y tsaycho kaykaq cuartukunata täpananpaq. Tsaynöpis paykunami *sagrädu manëjukunata maylashpan purificapäkurqan. Templucho kaqkunata y wakin ruraytapis paykunami rurapäkurqan.
29 Tsaynöpis paykunami encargädu karqan qaqaylanpa churashqan sagrädu tantapaq, tsaki mikuy ofrenda harinapaq, levadüraynaq lapsha tantapaq y sartinwan ankashqa ofrendakunapaqpis. Tsaynöpis encargädu karqan templucho imatapis tupunanpaq y pësananpaq.
30 Paykunami tutapapis tardipapis waran waran TAYTA DIOSTA agradëcikunanpaq y alabananpaq templucho karqan.
31 Jamay junaqcho, lulu killa fiestacho y jatun fiestakunachöpis paykunami TAYTA DIOSPAQ sacrificiukunata rupatsiptin cürakunata yanapaq. Paykunami TAYTA DIOSPA nawpancho imatapis cürakuna nishqanta rurapäkuq.
32 Levitakunami encargädu karqan Tinkuna Tolduta y templuta täpananpaq. Aarónpita miraq cürakunapa makincho karmi TAYTA DIOSPA templuncho lapanta rurapäkurqan.*
Ichic wilacuycuna
^ 23.1 1Rey. 1.28-40.
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ sagrädu Liyinki santupita tantiyatsikuyta.
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ 23.26 Deut. 10.8.
^ sagrädu Liyinki santupita tantiyatsikuyta.
^ 23.28-32 Núm. 3.5-9.
