1 Reyes 5:1-18
5 (15) Tiro markapa mandaqnin rey Hiram mayarqan Davidpa tsurin Salomóntana rey kananpaq churashqanta. Tsaymi Davidwan yachanakushqa kar runakunata kacharqan Salomónta felicitananpaq.
2 (16) Chayaykur felicitaptinmi Salomónqa tsay kachakunawan Hiramta wilakatsirqan kayno nir:
3 (17) “Qam musyankimi contrankunawan pelyashpan papänï David TAYTA DIOSPAQ templuta ruratsiyta mana kamäpakushqanta. Payqa yarparqan contrankunata vincinanpaq TAYTA DIOS yanapaptinraq templuta ruratsiytami.
4 (18) Kananmi itsanqa TAYTA DIOSNÏ yanapamaptin lapan nacionkunawanpis jawkalana kawarkaykä. Conträ pipis mana sharkuptin guërrapis manami kannatsu.
5 (19) Tsaynöpami kananqa yarpashqä TAYTA DIOSNÏPA templunta sharkatsiyta. Templunta sharkatsinäpaqmi papänï Davidta TAYTA DIOS kayno nirqan: ‘Trukayki mandananpaq tsurikita churaptïraqmi templüta sharkatsinqa’.
6 (20) Tsayno kaptinqa templuta sharkatsinäpaq Líbano muntipita cedru qerukunata mututsipaykalämay. Qamqa musyankimi kaycho taq runakuna qeru mutuyta shumaq mana yachashqanta. Tsaymi ruwakulä minkaynikikuna minkaynïkunata yanapaykunanpaq. Ayka junaq aruptinpis jornalnintaqa pägaläshaykimi”.
7 (21) Salomón tsayno nishqanta wilaptinmi pasaypa kushikur Hiram kayno nirqan: “¡Tayta Dios alabashqa kaykulätsun! ¡Paymi Davidpa tsurinta shumaq yanapashqa yachaq kananpaq y Israel nacionta ali mandananpaq!”
8 (22) Nirkurnami Hiramqa Salomónta kayno wilakatsirqan:
“Kachamushqä runakunami ruwakamashqaykita wilamashqa. Kananqa cedru y ciprés qerukunata manakamashqaykitami jorqatsipäshayki.
9 (23) Tsaymi minkaynïkuna Líbanupita lamar kuchunyaq qerukunata jorqamunqa. Tsaypitanami shinrirkur balsatano yakulanpa apatsimushaq mayyaqpis nimashqaykiyaq. Tsaychönami qerukunata shuntatsinki. Apatsimushqä qerukunapa trukan mikuyta apatsimunki palaciücho taqkuna mikupäkunanpaq”.
10 (24) Tsawraqa Hiram apatsirqan Salomón munashqan cedru y ciprés qerukunata.
11 (25) Salomónnami Hirampa palaciuncho taqkuna mikupäkunanpaq cada wata apatsiq chusku millón chusku pachak waranqa (4’400,000) kïlu trïguta y chusku waranqa chusku pachak (4,400) läta olïvu aceitita.
12 (26) Tayta Diosqa Salomónta promitishqanta cumplirmi yanaparqan yachaq kananpaq. Tsawraqa Hiramwan Salomón *pactuta rurarqan imaypis mana chikinakuypa kawapäkunanpaq.
13 (27) Tsaypita rey Salomón intëru Israel nacionpita kimsa chunka waranqa (30,000) runakunata shuntarqan.
14 (28) Tsay runakunatami kimsa puntaman rakirkur cada killa juk puntata Líbanuman kacharqan arupäkunanpaq. Juk killa arurkurmi wayinkunaman kutipäkurqan ishkay killa jamananpaq. Faynacho aruqkunapa capatazninmi karqan Adoniram.
15 (29) Tsaynöpis Salomónpa aruqninkuna karqan qanchis chunka waranqa (70,000) ashtaqkuna y pusaq chunka waranqa (80,000) rumi laqlaqkuna.
16 (30) Runakunata arutsinanpaqnami karqan kimsa waranqa kimsa pachak (3,300) capatazkuna.
17 (31) Aruqkunatami rey Salomón kacharqan jatusaq alinnin rumikunata ashtamunanpaq. Nirkur tsay rumikunata laqlarqan templupa cimientunpaq.
18 (32) Tsaynölami Gebal marka runakunapis Salomónpa minkayninkunata y Hirampa minkayninkunata qeru mutuycho y rumi laqlaycho yanaparqan.
Ichic wilacuycuna
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
