1 Timoteo 5:1-25
5 Awkinkunata ama olqüpaytsu. Tsaypa trukanqa taytaykitano ali shimilaykipa tantiyatsiy. Mözukunatapis wawqikitano ali shimilaykipa tantiyatsiy.
2 Chakwankunatapis mamaykitano ali shimilaykipa tantiyatsiy. Tsaynöla jipashkunatapis panikitano respitay.
Viüdakunata yanapananpaq yätsishqan
3 Waktsa viüdakunata imalawanpis yanapay.
4 Itsanqa mayqan viüdapapis wawankuna o wilkankuna karqa paykuna yanapatsun. Kuyar ashmashqanta ama qonqapäkutsuntsu. Tsayno yanapaptinmi Tayta Dios kushikun.
5 Waktsa viüdakunanami Tayta Diosman yärakur paqasta junaqta manakärin.
6 Jutsa rurayman churakashqa viüdakunami itsanqa wanushqano karkaykan.
7 Wawqi panikunata yachatsiy aylunkunacho viüdakuna kaptinqa yanapananpaq. Yanapaptinqa manami pipis jamurpanqatsu.
8 Mamanta, awilanta y wayincho taqkunata mana kamaripaptinqa Tayta Diosman yärakushqanpis manakaqlapaqmi kaykan. Tayta Diosta mana cäsukuq runapitapis mas penqapaypaqmi kaykan.
9 Viüdakunapa jutinkunata listaman apuntanki soqta chunka (60) watayuq kaptinraq. Tsaynöpis kanman juk runalawan tashqa kaqkuna,
10 alita rurashqanpita shumaq respitashqa kaqkuna, wamrankunata shumaq ashmashqa kaqkuna, wayinman chayaqkunata patsatsiq kaqkuna, Diosman yärakuqkunata ali shonqunwan yanapaq kaqkuna, waktsakunata kuyapaq kaqkuna y alita ruraq kaqkuna.
11 Manaraq soqta chunka (60) watayuq kaq viüdakunata itsanqa ama apuntankitsu. Paykunaqa mana yapapakuypa Jesucristuta sirvinanpaq promitirkurpis yapay runayuq kaytami munapäkun.
12 Yapapakurmi Jesucristuta promitishqantapis mana cumplir jutsayuq rikakärin.
13 Qela kayta yachakurmi wayin wayin purikärin. Tsaynöpis runapa wasanta rimar y pïmaypa vïdanta ashirmi manakaqkunata parlar purikärin.
14 Tsayno mana kananpaq jipashlaraq viüdakunaqa runawan yapay tätsun, wawankunata ashmatsun y wayincho rurayninkunata ruratsun. Tsayno kawaptinqa contrantsi kaqkuna manami jamurpämäshuntsu.
15 Wakin viüdakunaqa Jesucristuman yärakuykashqanpita qepaman kutikushpanmi *Satanás munashqantana rurarkaykan.
16 Mayqan [wawqipapis o] mayqan panipapis ayluncho viüda kaptinqa paykuna ashmatsun. Tsaynöpami wawqi panikuna shuntashqan aypanqa ayluynaq viüdakunata yanapananpaq.
Mayor wawqikuna shumaq rikashqa kananpaq yätsishqan
17 *Mayor wawqikuna Diospa wilakuyninta wilakäriptin y yachatsipäkuptin shumaq respitar ali pägapäkutsun. Tsaynöla lapanpis mayor wawqikunata ali mandaptin respitar pägapäkutsun.
18 Tayta Diospa palabranpis kaynömi niykan: “Ëracho arutsir töruta ama shenqalwankitsu”.* Tsaynöpis kaynömi niykan: “Arupakuq runata mana pägaylapaqa ama arutsinkitsu”.*
19 Mayor wawqi jutsa rurashqanta ishkay o kimsa runakuna nishuptikiraq cäsupanki. Juk runala niptinqa ama cäsupankitsu.*
20 Jutsa rurayta mana kachariptinqa lapanpa nawpancho anyapanki. Tsayno anyapaptikimi wakinkunapis tantiyakunqa jutsata mana rurapäkunanpaq.
21 Tayta Diospa, Señor Jesucristupa y sirviqnin *angilkunapa nawpanchömi kayno niykä: Pipapis favornin mana sharkuylapa kay nishqäkunata cumplinki.
22 Mayor wawqi kananpaq churayta munar pipa umanmanpis makikita lutalaqa ama churankitsu. Jutsa rurashqa kaykaptin makikita umanman churarqa qampis jutsayuqmi kankipaq. Kikikipis Tayta Dios munashqanno kaway.
23 Pacha nanaywan tsaynöla qeshyarqa yakulata upunaykipa trukanqa vïnuta ichiklata upurkunki.
24 Wakin runakuna jutsa rurashqanqa manaraq tapuptikipis juklami musyakan. Wakin runakuna jutsa rurashqanmi itsanqa nirkurraq musyakan.
25 Tsaynölami wakin runakuna alita rurashqanpis jukla musyakan. Wakinpanami itsanqa nirkurraq musyakan.
Ichic wilacuycuna
^ Satanás Satanásqa supaykunapa mandaqninmi kaykan. Payqa manami Diosnötsu maytsaychöpis kaykan. Satanáspa wakin jutinkunami kaykan diablu y Beelzebú (Mar. 1.13; Hech. 13.10).
^ mayor wawqi Mayor wawqikunaqa iglesiacho yachatsiqkunami kaykan (1Tim. 3.2). Bernabéwan apóstol Pablumi mushuq iglesiakunacho mayor wawqikunata churapäkurqan (Hech. 14.23). Apóstol Pedrumi wilamantsi wawqi panikunata imano rikananpaq kashqantapis (1Ped. 5.1-4). Wawqi panikunata imano rikashqanpitami mayor wawqikuna Tayta Diosta cuentata qonqa (Heb. 13.17). Mayor wawqikuna imano kawananpaq kashqantapis Bibliachömi wilamantsi (1Tim. 3.2-7; Tito 1.5-9). Mayor wawqi kananpaq pitapis manaraq churar imano kawashqantapis shumaq musyashun (1Tim. 5.22).
^ 5.18a Deut. 25.4.
^ 5.18b Mat. 10.10; Luc. 10.7.
^ 5.19 Deut. 17.6; 19.15.
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
