2 Crónicas 24:1-27
24 Mandayta qalaykushqan witsan qanchis watayuqlaraqmi Joás kaykarqan. Payqa chusku chunka (40) watami Jerusaléncho rey karqan. Mamanmi karqan Beerseba markapita kaq Sibia.
2 Cüra Joiada kawashqanyaqqa TAYTA DIOS munashqannömi lapanta Joás rurarqan.
3 Joásta ishkay warmiwanmi Joiada tätsirqan. Joáspa tsurinkuna olqupis warmipis karqanmi.
4 Atska watana rey kaykarmi Joás yarpachakurqan TAYTA DIOSPA templunta altsatsinanpaq.
5 Tsaymi cürakunata y yanapaqnin *levitakunata shuntaykur kayno nirqan: “Jukla aywapäkuy nacionnintsicho kaykaq markakunaman. Tayta Diosnintsipa templunta altsatsinäpaq tsay markakunacho taq runakuna cada wata ofrendata shuntashqanta apapäkamuy”.
Tsayno niptinpis levitakuna manami aywarqantsu.
6 Tsawraqa mandaq cüra Joiadata qayaykatsir rey kayno nirqan: “*Pactu Toldupa gastunkunapaq ofrendata shuntanantsipaq TAYTA DIOSPA sirviqnin Moiséspis y Israel mayor runakunapis nirqanmi.* Tsayno niykaptinqa ¿imanirtaq Judá nacionnintsiman y Jerusalénman levitakunata kachashqankitsu ofrendata apamunanpaq?
7 Musyashqaykinöpis supaypa wawan Atalía wawankunawan Diospa templunman yaykuykur tsaycho kaykaq *sagrädu manëjukunata utilizapäkushqa *Baal dioskunata adorapäkunanpaq. Tsaymi tsay ofrendata nistantsi templuta altsatsinantsipaq”.
8 Tsayno nirkushpanmi juk taksha babulta rurarkatsir ofrendakunata winapäkunanpaq rey churatsirqan TAYTA DIOSPA templun yaykuna punku waqta läduman.
9 Nirkurmi Jerusaléncho taq runakunaman y Judá nacioncho taq runakunaman wilakatsirqan lapan runakuna ofrendata apamunanpaq. Tsay ofrendata shuntananpaqmi TAYTA DIOSPA sirviqnin Moisés chunyaq jirkacho kaykar nirqan.
10 Tsawraqa lapan autoridäkuna y lapan runakuna templuman qellayta kushishqa apar babulman juntaqpaq winapäkurqan.
11 Cürakunapa yanapaqnin levitakunami tsay babulta apapäkuq reypa yanapaqninkuna rikananpaq. Babul juntana kaptinqa reypa secretariunta y mandaq cürapa yanapaqninta wilapäkuq jäkatsinanpaq. Babulta jäkaratsirnami kashqanman kutitsipäkuq. Waran waran tsayno rurashpanmi atska qellayta shuntapäkurqan.
12 Tsay qellaytami rey y cüra Joiada TAYTA DIOSPA templunta altsatsiqkunata kamaripaq. Paykunami rumi laqlaqkunata, carpintërukunata, herrërukunata y bronci takaqkunata pägapäkuq templuta altsananpaq.
13 Tsayno maki maki arurmi templuta jukla altsapäkurqan. Tsaynöpami punta kashqanno templu yapay kuyaylapaq karqan.
14 Altsayta usharkurnami putsuq qellayta entregapäkurqan reyta y cüra Joiadata. Paykunami tsay qellaypita manëjukunata ruratsirqan. Tsay manëjukuna wakin karqan templucho Tayta Diosta adorar manijananpaq y wakinna karqan sacrificiukunata rupatsir manijananpaq. Tsaykuna karqan cucharonkuna, qoripita väsukuna y qellaypita väsukunapis. Mandaq cüra Joiada kawashqanyaqqa TAYTA DIOSPA templuncho rupatsina sacrificiukunata imaypis rupatsipäkuq.
15 Cüra Joiadaqa pachak kimsa chunka (130) watayuq kaykarmi wanurqan.
16 Payqa Tayta Dios munashqanno kawarmi Israel runakunatapis y templutapis ali rikarqan. Tsaymi wanuykuptin *Davidpa Markancho reykuna pamparashqanman pampapäkurqan.
17 Joiada wanuykuptinnami Judá nacionpa autoridäninkuna rey Joásta ali shimilanpa parlapar lutanta yätsiyta qalaykärirqan.
18 Tsaymi unay aylunkuna adorashqan TAYTA DIOSTA templucho adorapäkunanpa trukan *Asera diösapaq jawishqan raku qerukunata y ïdulukunata adorapäkurqan. Tsayno adorapäkuptinmi Tayta Dios pasaypa rabyakurqan.
19 Rabyashqa karpis profëtankunata TAYTA DIOS kacharqan wilakushqanta chaskikur pay munashqanno kawapäkunanpaq. Tsayno wilakuptinpis paykunaqa manami chaskikärirqantsu.
20 Tsawraqa Tayta Diospa Espïritun tantiyatsiptinmi cüra Joiadapa tsurin Zacarías juk patakman witsarkur runakunata kayno nirqan: “Tayta Dios kaynömi nin: ‘¡Imanirtaq mandamientükunata mana cumplipäkunkitsu! ¡Imanirtaq desgracia pasashunaykita munarkaykanki! ¡Noqata kacharimashqaykinömi qamkunatapis kacharishayki!’ ”
21 Tsayno niptinmi Zacaríaspa contran sharkapäkurqan. Rey mandaptinmi TAYTA DIOSPA templun patiucho saqmaypa wanutsipäkurqan.*
22 Tsayno wanutsinanpaq mandarmi rey Joás mana yarparqantsu Zacaríaspa taytan Joiada imano kuyapashqanta. Tsayno mal agradecïdu kaptinmi Zacarías päsarpunanpaq kaykashqancho kayno nirqan: “¡Kayno ruramashqanpita castigaykulay, TAYTA DIOS!”
23 Tsaypita juk wata pasarkuptinmi Siria soldädukuna Jerusalénta y Judácho kaykaq wakin markakunata atacarqan. Judá nacionpa lapan autoridäninkunata wanurkatsirmi ima tarishqankunatapis Damascucho taq mandaqnin reyman apatsipäkurqan.
24 Siria soldädukunaqa walkala kaykarpis TAYTA DIOS yanapaptinmi Judá nacionpa tsaytsika soldädunkunata vincipäkurqan. Tsayno vincipäkurqan Judá runakuna unay aylunkuna yärakushqan TAYTA DIOSTA manana cäsukärishqanpitami. Tsaynöpami Joásta Tayta Dios castigarqan.
25 Judá soldädukunata vincirkurmi Siria soldädukuna aywakärirqan. Tsay guërrapita kutiykamur rey Joás antsa jitaraykaqtami kikinpa yanapaqninkunala wanutsipäkurqan. Tsayno wanutsipäkurqan cüra Joiadapa tsurin Zacaríasta wanutsishqanpitami. Tsaypitanami Joásta pampapäkurqan Davidpa Markanman. Itsanqa manami reykuna pampakushqan panteonmanqa pamparqantsu.
26 Joásta wanutsiqkunaqa karqan amonita warmi Simeatpa wawan Zabad y moabita warmi Simritpa wawan Jozabadmi.
27 Joáspa tsurinkuna rurashqan, Joáspa contran profëtakuna atska kuti wilakushqan y templuta imano altsatsishqanpis lapanmi qelqaraykan reykunapa acta libruncho. Joáspa trukanmi tsurin Amasíasna rey karqan.
Ichic wilacuycuna
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ Pactu Toldu Pactu Tolduqa Tayta Dioswan Tinkuna Toldumi karqan. Tsayno jutin karqan Israel runakunawan pactuta rurar paykunawan imaypis kananpaq Tayta Dios promitishqa kaptinmi. Tsay tolducho Tayta Dios kaptinmi Pactu Toldu kashqanta y Tayta Dioswan Tinkuna Toldu kashqanta nipäkurqan (Éxo. 38.21; Núm. 1.50; 2Crón. 24.6; Hech. 7.44; Apoc. 15.5). Tsaynöla Tinkuna Toldupita tantiyatsikuyta liyinki.
^ 24.6 Éxo. 25.1-9; 30.11-16; Neh. 10.33.
^ sagrädu Liyinki santupita tantiyatsikuyta.
^ Baal Baalqa cananeo runakuna adorashqan diosmi karqan. Juk dios kashqanta yarpaptinpis manami rasunpatsu dios karqan. Cananeo runakuna yarpapäkurqan tsay diosta adoraptin uywankuna mirananpaq kashqanta y chakrankuna ali wayunanpaq kashqantami. Tsaynöpis yarpapäkurqan löcu tamyata y ali tamyatapis kachamushqantami.
^ Davidpa Markan Davidpa Markanqa manami David yurishqan Belén markatsu karqan, sinöqa Sión jirkancho kaykaq Jerusalén markami. Tsayno jutin karqan jebuseo runakunata tsaypita David qarqushqa kaptinmi (2Sam. 5.6-7). Tsaychömi reypa palaciunta y templuta sharkatsipäkurqan. Jerusalén marka jatunyaptinpis Sión jirkancho kaykaq partilatami Davidpa Markan kashqanta nipäkun.
^ Asera Aseraqa cananeo runakuna adorashqan diösami karqan. Paykunaqa yarpapäkurqan tsay diösa imatapis miratsiq kashqantami. Aserata adorananpaqmi raku qerukunata jawipäkuq. Cananeo runakunaqa yarpapäkurqan tsay jawishqan qerukunacho Asera kashqantami (Éxo. 34.13; Deut. 7.5; 12.3; 16.21; 1Rey. 16.33; 18.19; 2Rey. 13.6).
^ 24.20-21 Mat. 23.35; Luc. 11.51.
