2 Crónicas 36:1-23
36 Tsaypitanami taytanpa trukan Jerusaléncho rey kananpaq Judá runakuna Joacazta churapäkurqan.
2 Joacazqa ishkay chunka kimsa (23) watayuq kaykarmi rey kayta qalaykurqan. Payqa kimsa killalami Jerusalénpita mandarqan.
3 Egipto nacionpa mandaqnin rey Jerusalénman chayaykurmi mandaq kashqanpita Joacazta jorqurqan. Nirkurmi Judá runakunata nirqan kimsa waranqa kimsa pachak (3,300) kïlu yoraq qellayta y kimsa chunka kimsa (33) kïlu qorita impuestuta pägananpaq.
4 Rey kaykashqanpita jorqurirmi Joacazpa wawqin Eliaquimta churarqan Jerusaléncho y Judácho rey kananpaq. Tsaynöpis Eliaquimpa jutintami trukatsirqan Joacim jutin kananpaq. Joacaztanami Egiptupa prësu apakurqan.*
Judá nacioncho Joacim rey kashqan
2 Reyes 23.36—24.7
5 Joacimqa* ishkay chunka pitsqa (25) watayuq kaykarmi Judá nacioncho rey kayta qalaykurqan. Payqa chunka juk watami Jerusalénpita mandarqan. Itsanqa TAYTA DIOSTA mana cäsukurmi jutsata rurarqan.
6 Tsay witsanmi Babilonia nacionpa mandaqnin rey Nabucodonosor Jerusalénman shamur soldädunkunawan atacarqan.* Tsaycho Joacimta prësu tsarirkurmi bronci cadinawan liyarkur Babiloniaman apakärirqan.
7 Tsaynölami TAYTA DIOSPA templunpita wakin manëjukunatapis Babiloniaman apakärirqan. Tsay apakärishqan manëjukunatami Babiloniacho taq runakuna adorashqan diospa templunman churapäkurqan.
8 Rey Joacim imano kawashqan, jutsata rurashqan y desgracia pasashqanpis qelqaraykan Israel nacionpa y Judá nacionpa mandaqnin reykunapa acta libruncho. Paypa trukannami tsurin Joaquínna rey karqan.
Judá nacioncho Joaquín rey kashqan
2 Reyes 24.8-17
9 Joaquínqa chunka pusaq watayuq kaykarmi* rey kayta qalaykurqan. Payqa kimsa killa chunka junaqlami Jerusalénpita mandarqan. Itsanqa TAYTA DIOSTA mana cäsukurmi jutsata rurarqan.
10 Mushuq wata qalaykuptinmi* Babiloniapa mandaqnin rey Nabucodonosor Joaquínta Babiloniaman prësu apatsirqan.* Tsaynölami TAYTA DIOSPA templunpita mas chanin cuestaq manëjukunatapis apatsirqan. Nirkurnami Judá nacionpa y Jerusalénpa mandaqnin rey kananpaq Joaquínpa tiyun Sedequíasta churarqan.*
Judá nacioncho Sedequías rey kashqan
2 Reyes 24.18-20; Jeremías 52.1-3
11 Sedequías ishkay chunka juk (21) watayuq kaykarmi rey kayta qalaykurqan. Payqa chunka juk watami Jerusalénpita mandarqan.
12 Sedequíasqa TAYTA DIOS nishqanta profëta Jeremías wilapaptinpis mana cäsukurmi jutsata rurarqan.*
13 Yanapanakunanpaq Tayta Diospa jutincho promitishqa kaykarpis rey Nabucodonosorpa contranmi sharkurqan.* Pasaypa mana cäsukuq karmi Israel runakunata kuyaq TAYTA DIOSTA cäsukuyta mana munarqantsu.
14 Tsaynölami Sedequías mandashqan witsan mandaq cürakunapis y wakin runakunapis jutsa rurayman churakarqan. Paykunaqa jäpa nacionkunacho taq runakunano jutsata rurarmi templuman ïdulukunata apaykur adorapäkurqan. Tsayno rurarqan Jerusalén templucho tänanpaq TAYTA DIOS akrashqa kaykaptinpis.
15 Paykuna tsayno ruraptinpis akrashqan Israel runakunata kuyar y tänan templunpaq lakikurmi unay aylunkuna yärakushqan TAYTA DIOS profëtankunawan imaypis wilakatsirqan.
16 Tsayno wilakaykatsiptinpis runakunaqa profëtakunata manakaqman churarmi asiparqan. Tsaymi TAYTA DIOS fiyupa rabyakushpan kuyashqan Israel runakunata castigarqan.
Templuta juchurkatsir Judá nación runakunata prësu apashqan
2 Reyes 25.8-21; Jeremías 39.8-10; 52.12-30
17 Tsayno kaptinmi Babilonia* nacionpa mandaqnin rey soldädunkunawan Israel runakunata ushakätsinanpaq Tayta Dios kamakätsirqan.* Tsay soldädukuna chayaykurmi templu rurincho kaykaq mözukunata espädawan wanutsipäkurqan. Tsaynölami cällikunachöpis mözukunata, jipashkunata, awkinkunata, chakwankunata y weqrukunata mana kuyapaypa wanutsipäkurqan. Lapantami paykunapa munayninman TAYTA DIOS kachaykurqan.
18 Tsaypitanami templupita lapan manëjukunata jatuntapis takshatapis apakärirqan. Tsaynölami templupita, reypa palaciunpita y reypa mandäshiqninkunapa wayinkunapitapis chanin cuestaqkunata apakärirqan. Lapan tsaykunatami Babiloniaman apakärirqan.
19 Tayta Diospa templuntapis kanaykurmi* Jerusalén markapa murällanta lapanta juchuratsir reypa palaciunkunatapis rupatsir ushapäkurqan. Mas chanin cuestaq kaqkunataqa lapantami rupatsir usharqan.
20 Kawaykar quëdaqkunatana prësu apakärirqan Babiloniaman. Tsaychömi Babilonia runakunapa y tsurinkunapa ashmayninkuna karqan hasta Persia nacionpa mandaqnin rey Babilonia nacionta vincishqanyaq.
21 Tsaynöpami profëta Jeremías wilakushqannöla cumplikarqan. Runakunata Jerusalénpita apakushqanpita patsami Judá nacioncho chakrakuna qanchis chunka (70) wata jamaräkurqan.*
Israel runakuna nacionninman kutishqan
Esdras 1.1-4
22 Persia nacioncho Ciro rey kayta qalaykushqan watami Ciruta TAYTA DIOS yarpayta qorqan Israel runakunata nacionninman kutitsinanpaq. Tsayno kutitsiptinmi profëta Jeremías wilakushqanno cumplikarqan.* Tsaymi Ciruqa mandashqan intëru nacionpa shimipapis y cartawanpis wilakatsirqan kayno nir:
23 “Noqa Ciro, Persia nacionpa mandaqnin rey karmi, kayno nï: ‘Jana patsacho kaykaq TAYTA DIOSMI lapan nacionkunata makïman churamushqa. Paymi nimashqa Judácho kaykaq Jerusaléncho templuta sharkatsipänäpaq.* Mayqaykipis Israel aylu kaqtaqa TAYTA DIOS yanapaykuläshunki markaykiman kutinaykipaq’ ”.
Ichic wilacuycuna
^ 36.4 Jer. 22.11-12.
^ 36.5 Jer. 22.18-19; 26.1-6; 35.1-19.
^ 36.6 Jer. 25.1-11; 36.27-31; Dan. 1.1-2.
^ 36.9 Tsaynömi nin 2 Reyes 24.8-cho, Septuaginta nishqan unay griego traduccioncho, juk hebreo copiacho y wakin castellänu traduccionkunapis. Wakin hebreo copiakunacho y wakin castellänu traduccionkunachöqa pusaq watayuqla kashqantami niykan.
^ 36.10 Tsayqa karqan 22 de abril, 597 a. C.
^ 36.10a Jer. 22.24-30; 24.1-10; 29.1-2; Eze. 17.12.
^ 36.10b Jer. 37.1; Eze. 17.13.
^ 36.12 Jer. 37—39.
^ 36.13 Eze. 17.15.
^ 36.17 Hebreo idiömachöqa Caldea ninmi. Caldeaqa Babiloniapa jukaq jutinmi kaykan.
^ 36.17 Jer. 21.4-10.
^ 36.21 Jer. 25.11; 29.10.
^ 36.22 2Crón. 36.21; Jer. 25.11; 29.10.
^ 36.23 Isa. 44.28; 45.1-4.
