2 Samuel 17:1-29
17 Nirkurna Absalónta Ahitofel kayno nirqan: “Chunka ishkay waranqa (12,000) soldädukunata akrarkur kanan tsakay Davidta qatipäshaq.
2 Pasaypa utikashqa aywaykaqta taripaptïmi mantsarishpan paywan aywaqkunaqa qeshpir wakpa kaypa aywakärinqa. Tsawraqa kikilanta kachariykuptinmi rey Davidta wanuratsishaq.
3 Paywan aywaq runakunataqa manami juklaylatapis wanutsishaqtsu, sinöqa yarpashqaykino David japalantami wanutsishaq. Tsaynöpami makikicho kar jawkalana lapanpis kawapäkunqapaq”.
4 Ahitofel tsayno yätsiptinmi Absalón y Israel mayor runakuna kushikurqan.
5 Tsayno kaptinpis Arac aylu Husaitami Absalón qayatsirqan imata yarpashqantapis tapukunanpaq.
6 Chayaykuptinmi wilarqan Ahitofel yarpashqankunata. Nirkurmi kayno tapurqan: “Ahitofel yätsishqanta ¿rurämanku o manaku? ¿Ima ninkitaq, tayta?”
7 Tsawraqa Husai kayno nirqan: “Ahitofel yätsishushqaykiqa manami shumaqlatsu kaykan.
8 Qam musyankimi taytayki y soldädunkunapis ali chölu runakuna kashqanta. Wawanta qechuykuptin ösu rabyashqa kashqannömi David y yanapaqninkunapis rabyashqa karkaykan. Tsaynöpis taytaykiqa guërracho purikuq runa kar musyanmi contran runakuna wanutsinanpaq ashirkaykashqanta. Kananqa mananachari yanapaqnin runakuna punushqanchöpis pununqanataqtsu.
9 Tsaypa trukanqa may machaymanpis o may qaqamanpis maynachari pakakushqa. Guërra qalaykuykaptilan juk ishkay soldäduykikunata wanutsipäkuptinqa runakuna nipäkunqa soldäduykikunata vincishqantami.
10 Tsayno wanutsiptinqa leonno mayjina fiyu karpis soldäduykikuna mananami pelyayta munanqanatsu. Lapan runakunami musyan taytaykipis y soldädunkunapis mana mantsakuypa pelyaq kashqanta.
11 “Noqapa yarpaynïpitaqa mas alimi kanqa Danpita hasta Beersebayaq lapan Israel runakunata shuntatsimuptiki. Tsaynöpami lamar kuchuncho kaykaq aquyshanöraq yupaytapis mana atipaypaq tsaytsika kashunpaq. Nirkurna guërraman tsay runakunawan kikiki aywankipaq.
12 Tsaynöpami maycho kaptinpis taripaykur taytaykita atacashunpaq. Mikuykunata qasapa ushashqannömi paykunatapis lapanta ushakätsishunpaq.
13 May markaman amparakuptinpis marka murällata waskantsiwan tsutaykälarmi juchutsishunpaq. Nirkurmi rumikunata raqraman chipyaq jitarishun tsay markacho ni juklaylapis mana kananpaq”.
14 Tsayno niptinmi Ahitofel yätsishqanta chaskikunanpa trukanqa Absalón y lapan Israel runakunapis Husai yätsishqantana chaskikärirqan. Tsayno chaskikärirqan Absalón wanunanpaq TAYTA DIOS destinashqa kaptinmi.
Qeshpikunanpaq Davidta wilashqan
15 Nirkurmi Sadoc y Abiatar cürakunaman aywaykur Husai wilarqan Absalónta y mayor runakunata Ahitofel yätsishqankunata. Tsaynöpis wilarqan kikin yätsishqankunata.
16 Nirkur kayno nirqan: “Davidta jukla wilay kanan tsakay Jordán mayu väducho pununanpa trukanqa Jordán mayuta jukla tsimpananpaq. Mana aywakuptinqa payta y paywan kaykaq lapan yanapaqninkunatapis wanutsipäkunqami”.*
17 Jerusalénman yaykuykaqta pipis mana rikananpaqmi Jonatán y Ahimaas patsakärirqan Rogel pukyu kaqcho.* Tsaymanmi juk ashmay jipash aywarqan Husai nishqanta wilananpaq. Wilaptinmi Jonatán y Ahimaas jinan höra Davidta wilananpaq aywapäkurqan.
18 Tsayno pakaylapa aywaykashqanta juk mözu rikaykurmi Absalónta wilarqan. Qatipänanpaq kashqanta maliciarmi Jonatánwan Ahimaas apurayla aywar Bahurim markaman chayarqan.* Chayaykurmi juk runapa wayi patiuncho pözuman ishkan pakakärirqan.
19 Pipis mana tarinanpaqmi tsaycho taq warmi pözuta jakuwan tsaparkur jananman trïguta majarqan. Tsaymi pipis mana musyarqantsu tsaycho pakaraykashqanta.
20 Tsayman Absalón kachashqan runakuna chayaykurmi warmita tapukurqan kayno nir: “¿Manaku rikalashqanki Ahimaasta y Jonatánta?”
Tapuptinmi kayno nirqan: “Paykunaqa maynachari mayutapis pasapäkushqa”.
Tsayno niptinnami Absalón kachashqan runakuna ashiq aywapäkurqan. Mana tariparmi Jerusalénman kutikärirqan.
21 Kutikäriptinmi Ahimaas y Jonatán pözupita yarqurir aywapäkurqan rey Davidman wilakuq. Chayaykurnami kayno nipäkurqan: “Ahitofelshi Absalónta yätsishqa soldädukunawan shamur kanan tsakay wanutsishunaykipaq. Tsayshi kaypita jukla qeshpikärinki mayu tsimpanman”.
22 Tsayno wilaptinmi patsa manaraq waraptin David y paywan kaykaq lapan runakuna jukla mayuta tsimpapäkurqan.
23 Ahitofelnami yätsishqanta Absalón mana chaskiptin bürrunta karunakurkur markanpa kutikurqan. Tsaychömi testamentunta rurarkur jurkakurqan. Wanuykuptinmi papänin pamparashqan kaqman pampapäkurqan.
24 Tsaypitanami David chayarqan Mahanaim markaman.* Tsaycho kaykaptinmi Absalón y lapan Israel runakuna Davidta qatipar Jordán mayuta tsimpapäkurqan.
25 Absalónqa Joabpa trukan soldädunkunapa capitannin kananpaqmi Amasata churarqan. Amasapa papänin karqan Ismael aylu Itrami.* Mamannami karqan Nahaspa tsurin Abigail. Abigailmi karqan Sarviapa nanan. Sarvianami karqan Joabpa maman.
26 Absalónqa Israel runakunawan Jordán tsimpan Galaad partichömi campamentunta sharkatsipäkurqan.
27 Mahanaimman David chayaykuptinmi chaskikärirqan Nahaspa tsurin Sobi, Amielpa tsurin Maquir y Barzilai. Sobimi karqan amonita runakuna tashqan Rabá markapita. Amielmi karqan Lo-debar markapita. Barzilainami karqan Galaadcho kaq Rogelim markapita.
28 Tsay kimsa runakunami Davidpaq y soldädunkunapaq apapäkurqan cämakunata, tazonkunata, mitu mankakunata, trïguta, cebädata, harinata, kamtsata, häbasta y pushputa.
29 Tsaynöpis apapäkurqan abëjapa mishkinta, niknita, uyshata, cabrata y wäkakunapa lëchinpita rurashqa quësuta. Tsaykunata mikunanpaq aypushpanmi kayno nipäkurqan: “Chunyaq tsaki jirkapa aywaykämurqa yarqashqa, utikashqa y yakunashqachari karkaykanki, tayta”.
Ichic wilacuycuna
^ 17.16 David qeshpinanpaq Husai tsayno nirqan Absalón imata rurananpaq kashqanta shumaq mana musyarmi.
^ 17.17 2Sam. 15.27, 36.
^ 17.18 Bahurim markaqa Rogel pukyupita pulan lëwanölami karqan.
^ 17.24 Mahanaimqa Jordán mayuta David pasashqanpita chunka lëwanömi karqan.
^ 17.25 Itrapa jukaq jutinmi karqan Jeter. Tsaypita masta musyanaykipaq liyinki 1Rey. 2.5; 1Crón. 2.17.
