Amós 1:1-15
1 Kay libruchömi qelqaraykan Amós wilakushqan. Payqa Tecoa markacho taq uysha mitsiq runami karqan. Amós wilakushqan witsanmi Judá nacioncho Uzías rey kaykarqan* y Israel nacionchönami Joáspa tsurin Jeroboam rey kaykarqan.* Amós wilakushqanpita ishkay wata pasarkuptinraqmi fiyupa temblor karqan.
2 Wilakurmi Amós kayno nirqan:“TAYTA DIOSMI Sión jirkanpita patsa leonno qaparämun.Jerusalénpita patsa qayakamushqanmi räyu bunruruqnöraq mayakämun.*Parlamuptinmi jirkacho qewakunapis elaqpita qawqanqa.Carmelo jirkachöpis qewakuna tsakinqami”.
Siria nación runakunata Tayta Dios juzgananpaq nishqan
3 TAYTA DIOSMI kayno nin:“Damasco markacho* taq runakunapa jutsankunaqa aypämushqanami kaykan.*Paykunaqa ëracho trïgupa gransanta ñutquqpaq wirushqannömi Galaad runakunata ushakätsishqa.*Tsayno rurashqanpitami fiyupa castigashaq.
4 Tsaymi imaykatapis nina rupar ushashqanno rey Hazaelpa aylunkunata y rey Ben-adad sharkatsishqan palaciuta ushakätsishaq.
5 Damasco markaman yaykuna punkukunatapis lapantami pakir ushashaq.Bicat-avéncho y Bet-edéncho mandaqkunatapis tsaynölami ushakätsishaq.Nirkurmi contran runakuna shamur Siria runakunata prësu apakärinqa Kir partiman”.*TAYTA DIOSMI tsayno nin.
Filisteo runakunata Tayta Dios juzgananpaq nishqan
6 TAYTA DIOSMI kayno nin:“Gaza markacho taq runakunapa jutsankunaqa aypämushqanami kaykan.Paykunami juk marka intëru runakunata edomita runakunaman rantikärirqan.Tsayno rurashqanpitami fiyupa castigashaq.
7 Tsaymi imaykatapis nina rupar ushashqanno Gaza markapa murällanta y palaciunkunata ushakätsishaq.
8 Asdod markacho y Ascalón markacho reykunatapis ushakätsishaqmi.Mana kuyapaypami Ecrón markacho taq runakunatapis ushakätsishaq.Tsaynöpami filisteo runakuna* lapanpis wanunqapaq”.*TAYTA DIOSMI tsayno nin.
Tiro runakunata Tayta Dios juzgananpaq nishqan
9 TAYTA DIOSMI kaynömi nin:“Tiro markacho taq runakunapa jutsankunaqa aypämushqanami kaykan.*Paykunami aylunkunawan ali kawapäkunanpaq *pactuta rurashqa kaykarpis juk marka intëruta edomita runakunaman tsay aylun runakunata rantikärirqan.Tsayno rurashqanpitami fiyupa castigashaq.
10 Tsaymi imaykatapis nina rupar ushashqanno Tiro markapa murällanta y palaciunkunata ushakätsishaq”.
Edomita runakunata Tayta Dios juzgananpaq nishqan
11 TAYTA DIOSMI kayno nin:“Edom nacioncho taq runakunapa jutsankunaqa aypämushqanami kaykan.*Paykunaqa pasaypa rabyarmi aylun kaykaptin Israel runakunata mana kuyapaypa espädanwan wanutsipäkurqan.Tsayno rurapäkushqanpitami fiyupa castigashaq.
12 Tsaymi imaykatapis nina rupar ushashqanno Temán markata y Bosracho palaciukunata ushakätsishaq”.
Amón nación runakunata Tayta Dios juzgananpaq nishqan
13 TAYTA DIOSMI kayno nin:“Amón nacioncho taq runakunapa jutsankunaqa aypämushqanami kaykan.*Paykunaqa chakrankunata qechunan kashqami Galaadcho taq chichu warmikunata espädawan pachanta kutsuypa wanutsipäkurqan.Tsayno rurashqanpitami fiyupa castigashaq.
14 Tsaymi imaykatapis nina rupar ushashqanno Rabá markapa murällanta y palaciunkunata ushakätsishaq.Pasaypa qaparar löcu tamyanöraqmi tsay markata ushapäkunqa.
15 Mandaqnin reytapis y mandäshiqninkunatapis juk lädu nacionmanmi prësu apakärinqa”.TAYTA DIOSMI tsayno nin.
Ichic wilacuycuna
^ 1.1b 2Rey. 14.23-29.
^ 1.1a 2Rey. 15.1-7; 2Crón. 26.1-23.
^ 1.2 Jer. 25.30; Joel 3.16.
^ 1.3 Damasco markaqa Siria nacionpa capitalninmi karqan.
^ 1.3-5 Isa. 17.1-3; Jer. 49.23-27; Zac. 9.1.
^ 1.3 2Rey. 10.32-33.
^ 1.5 2Rey. 16.9.
^ 1.8 Filisteo runakunaqa Gaza, Asdod, Ascalón y Ecrón markakunachömi tarqan.
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ 1.13-15 Jer. 49.1-6; Eze. 21.28-32; 25.1-7; Sof. 2.8-11.
