Amós 9:1-15
9 Tayta Diosta revelacioncho rikarqä *altarpa nawpanman ichiykur kayno nimuqta:“Numbralkunapis kuyunanyaq templuta tuknaraq columnakunata takay.Tsaynöpami runakuna jananman templu juchunqa.Tsaypita qeshpiqkunata espädawan wanutsiptï manami juklaylapis salvakunqatsu.
2 Patsa rurinman pakakuptinpis jorqamushaqmi.Jana patsaman witsaptinpis urätsimushaqmi.*
3 Carmelo puntaman pakakuptinpis ashi ashiykurmi tsarimushaq.Lamar rurinman pakakuptinpis jatun culebrawanmi picatsishaq.
4 Juk lädu markaman contrankuna prësu apakäriptinpis espädawanmi wanutsishaq.Israel runakunataqa maycho rikarpis yanapanäpa trukan castigashaqmi”.
5 Lapanta mandaq TAYTA DIOS kay patsata yataykuptinmi tsulukäkunqa.Tsaymi intëru Israel nacioncho taq runakuna waqapäkunqa.Nilo mayu bunyaypa bunyar aywashqannömi patsapis janapa y urapa kuyur siksikyanqa.
6 Tayta Diosqa jana patsachömi wayinta rurashqa.Patsa jananpa azulyaraykaqtapis paymi kamashqa.Paymi lamarpita pukutaytapis sharkarkatsir patsa jananman tamyatsimun.Jutinpis *Yahwehmi kaykan.
7 TAYTA DIOSMI kayno nin:“Israel runakuna, qamkunata kuyashqänölami Etiopía runakunatapis kuyä.Qamkunata Egiptupita jorqamushqänölami filisteo runakunatapis Caftor islapita jorqamurqä.Aram runakunatapis Kir partipitami jorqamurqä.
8 “Noqa rikaykämi Israel nacioncho taqkuna pasaypa jutsata rurarkaykashqanta.Tsayno kashqanpitami tsay nacionta ushakätsishaq.Ushakätsirpis Jacobpita miraqkunataqa wakintaqa manami ushakätsishaqtsu”.TAYTA DIOSMI tsayno nin.
9 “Trïguta shuyshushqannömi Israel runakunatapis lapan nación runakunatawan shuyshushaq.Gränu kaqkuna yarquptinpis gransa kaqkuna mana yarqushqanno manami juklaylapis mana cäsukamaqkuna castïgupita qeshpinqatsu.
10 Mana cäsukamaq kaqkunataqa lapantami espädawan wanutsishaq.‘Manami imapis pasamäshuntsu’ niqkunaqa lapanmi ushakanqapaq”.
Israel nación yapay ali kananpaq Tayta Dios nishqan
11 “Tsay witsanmi Davidpa wayin juchushqa kaptinpis yapay sharkatsishaq.*Unay kashqanno yapay kananpaqmi wakrankunata tsapashaq y juchushqa kaqkunata altsashaq.
12 Tsaynömi rurashaq kawaykar quëdaq edomita runakuna Israel runakunapa munaynincho kananpaq.Tsaynölami jutïta joqariq kaq wakin nacionkunapis munayninchöna kanqapaq”.TAYTA DIOSMI tsayno nin.Paymi tsaykunata ruranqapaq.*
13 TAYTA DIOSMI kayno nin:“Shamuq watakunacho trïgu cosëchata manaraq shuntayta ushaptinmi muruy tiempuna kanqa.Üva jaruyta manaraq ushaptinmi üva plantapakuy tiempu chayamunqa.Jirkakunapa y jirkankunapapis mayunöraqmi vïnu jichanqa.
14 Karu nacioncho kashqanpitami kuyashqä Israel runakunata kutitsimushaq.Kutiykamurmi juchushqa markakunata altsarkur tsaycho täpäkunqapaq.Yapay plantashqan üvapitami vïnutapis upupäkunqa.Murushqankuna ali wayuptinmi mikuyninpis tsaytsika kanqa.
15 Kikinkunapa nacionninman kutitsiptïmi imayyaqpis tsaycho täpäkunqa.Tsaypitaqa mananami pipis qarqunqanatsu.Noqa kuyashuqniki TAYTA DIOSMI tsayno kananpaq nï”.
Ichic wilacuycuna
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 9.2 Sal. 139.7-12; Jer. 23.23-24.
^ Yahweh Yahwehtami wakin traduccionkuna castellänucho traducin Jehová nir, wakinmi traducin Yavé nir, wakinmi traducin Yahweh nir y wakinnami traducin EL SEÑOR nir. Quechua Bibliachöpis Yahweh atska kutimi traduciraykan TAYTA DIOS nir.
^ 9.11 Davidpa wayinpita parlarqa Davidpita miraq reykunapitami parlaykan. Davidpa wayin juchushqa kashqanta nirqa Davidpita miraqkuna manana reykuna kashqanta niykan. Yapay sharkatsishaq nishqanqa Davidpa aylunpita rey kananpaq yapay churashaq ninanmi.
^ 9.11-12 Hech. 15.16-18.
