Gálatas 2:1-21
2 Tsaypita chunka chusku watataraqmi Tituta pushakurkur Bernabéwan* Jerusalénman yapay kutirqä.
2 Tsayman kutirqä Tayta Dios revelacioncho aywanäpaq tantiyatsimaptinmi. Jerusaléncho kaq apostolkunawan kikiläkuna juntakaykurmi wilaparqä mana Israel runakunata imata yachatsishqätapis. Lutanta yachatsishqäta yarpaptinqa tsayjinanpa nakar wilakushqäpis manakaqlapaqmi kanman karqan.
3 Wilakushqäta tantiyatsiptïmi ali kashqanta nipäkamarqan. Tsaynöpami mana Israel runa kashqanta musyarpis “Tito *señalakutsun” nipäkurqantsu.
4 Wilakushqä ali kashqanta nipäkuptinpis juk ishkay runakuna Jesucristuman yärakuq tumpala wawqi panikunata yachatsipäkurqan *Moisés qelqashqan leykunata cumplinanpaq. Tsayno yachatsiptinpis Jesucristuta chaskikushqana kaykarqa manami tsay leykunata cumplinantsipaqnatsu kaykantsi. Paykuna nishqanta chaskikurqa manami libriraqtsu kaykantsi, sinöqa tsay leykunapa munaynincho kar ashmaynölami kaykantsi.
5 Tsaymi noqakuna tsay lutan yachatsikuyta mana chaskiparqätsu. Chaskipaptïqa Jesucristupa ali wilakuyninpita witikärinkimanmi karqan.
6 Jerusaléncho kaq apostolkunaqa wilakuptï manami michämarqantsu (Jesucristuwan juntu paykuna purishqa kaptinpis Tayta Diospaqqa lapantsipis iwalmi kantsi),*
7 sinöqa tantiyakärirqan Israel runakunata wilapänanpaq Pedruta churashqanno noqatapis mana Israel runakunata wilapänäpaq Tayta Dios churamashqanta.
8 Israel runakunapa apostolnin kananpaq Pedruta Tayta Dios churashqannömi mana Israel runakunapa apostolnin kanäpaq noqatapis churamashqa.
9 Tsawraqa Santiago, Pedro y Juan tantiyapäkurqan wilakuyninta wilakur purinäpaq Tayta Dios churamashqanta. (Paykunapaqqa *iglesiacho columna kashqantami nipäkun.) Tsaypitanami paykuna kayno nipäkamarqan: “Bernabéwan qam ayway mana Israel runakunaman y noqakunana Israel runakunaman aywapäkushaq”.
Tsayno nirkurmi makinta qopäkamarqan.
10 Tsaynöpis nipäkamarqan waktsa wawqi panikunata mana qonqaypa yanapanäpaqmi. Tsaytaqa imaypis ruraykämi.*
Pedruta Pablo olqüpashqan
11 Tsaypita Antioquíaman Pedro chaykamur mana alita ruraptinmi olqüparqä.
12 Puntataqa mana Israel wawqi panikunawan juntakaykurmi mikupäkuq.* Santiaguwan puriq runakuna chayamuptinmi itsanqa jamurpänanta mantsakushpan mana Israel wawqi panikunawan juntakaqnatsu.
13 Pedruta rikakurmi wakin wawqi panikunapis y hasta Bernabépis mana Israel wawqi panikunawan mikunanpaq mana juntakarqannatsu.
14 Tsayno rurashqan mana ali kaptinmi wawqi panikunapa nawpancho Pedruta olqüpar kayno nirqä: “Kikikipis mana Israel runano *Moisés qelqashqan leykunata mana cumpliykarqa ¿imanirtaq munaykanki mana Israel runakuna tsay leykunataraq cumplinanta?
15 Noqantsiqa manami mana Israel runatsu kaykantsi, sinöqa yurishqantsipita patsa Israel runami.
16 Musyantsimi Tayta Dios imano perdonamashqantsita. Manami Moisés qelqashqan leykunata cumpliptintsitsu perdonamantsi,* sinöqa Jesucristuman yärakuptintsimi. Tsaymi Jesucristuman yärakuykantsi Tayta Dios perdonamänantsipaq.* Tsay leykunaman yärakushqanpitaqa manami pitapis Tayta Dios salvantsu”.
17 Moisés qelqashqan leykunaman yärakunantsipa trukan Jesucristuman yärakuptintsimi wakin runakuna yarpapäkun jutsata ruraykashqantsita. ¿Paykuna yarpashqannötsuraq Jesucristo jutsata ruraykätsimantsi? ¡Manami!
18 Tsaypa trukanqa jutsayuq rikakuntsi Moisés qelqashqan leykunaman yapay yärakurmi.
19 Moisés qelqashqan leykunapa munaynincho karmi tsay leykunapaq wanushqanöna rikakurqä.* Kananqa librinami kaykä* Tayta Dios munashqanno kawanäpaq.
20 Noqaqa Jesucristuwan cruzcho wanushqanömi kaykä.* Manami noqanatsu kawä, sinöqa Jesucristumi noqacho kawan. Tsaymi Tayta Diospa Tsurinman yärakur kawaykä.* Paymi kuyamashpantsi noqantsi rayku wanurqan.
21 Manami manakaqmantsu Tayta Dios kuyapämashqantsita churaykä. Wakin runakuna nishqanno leykunata cumpliptintsiraq Tayta Dios salvamaptintsiqa Jesucristo wanushqanpis manakaqlapaqmi kanman karqan.
Ichic wilacuycuna
^ 2.1 Hech. 11.29-30; 15.2.
^ señalakushqan Señalakuyqa chiwlakunanpa punta qaranta kutsurir jorqushqanmi kaykan. Abrahamwan Tayta Dios pactuta rurashqanta yarpashpanmi Israel runakunaqa tsayno señalakärin. Tsaymi olqu wamrakunata yurishqanpita pusaq junaqniyuq kaykaptin señalapäkun. Tsaytami castellänucho “circuncisión” nipäkun (Gén. 17.9-14; Col. 2.11; 1Cor. 7.18-20).
^ Moisés qelqashqan leykuna Moisés qelqashqan leykunaqa kaykan Sinaí jirkacho Tayta Dios tantiyatsishqan mandamientukuna y leykunami. Tsay leykunatami Moisés qelqarqan Éxodo, Levítico, Números y Deuteronomio librukunacho.
^ 2.6 Deut. 10.17.
^ iglesia Iglesiaqa manami Diosta alabana wayilatsu, sinöqa Jesucristuta chaskikuqkunami kaykan (Hech. 13.1; 14.23; 20.28; Rom. 16.1; Efe. 1.22; 5.23).
^ 2.10 Hech. 11.29-30; 24.17.
^ 2.12 Hech. 11.2.
^ Moisés qelqashqan leykuna Moisés qelqashqan leykunaqa kaykan Sinaí jirkacho Tayta Dios tantiyatsishqan mandamientukuna y leykunami. Tsay leykunatami Moisés qelqarqan Éxodo, Levítico, Números y Deuteronomio librukunacho.
^ 2.16a Sal. 143.2; Rom. 3.20.
^ 2.19b Gál. 3.19, 24.
^ 2.20a Rom. 6.6-8; Gál. 5.24; 6.14; Col. 2.20.
