Génesis 17:1-27
17 Abram isqun chunka isqun (99) watayuq kaykaptinmi TAYTA DIOS yuriparkur kayno nirqan: “Noqami kaykä El-Shaddai.* Nishqäkunata cäsukur jutsata mana ruraypa imaypis kaway.
2 Qamwan *pactuta rurashqäta cumplishaqmi.* Tsaymi qampita miraqkuna atskaman mirapäkunanpaq bendicionnïta churashaq”.
3 Tsayno niptinmi Abram jukla lätakuykurqan. Tsaychömi Tayta Dios kayno nirqan:
4 “Pactu rurashqäta cumplirmi churashayki atska nación runakunapa taytan kanaykipaq.
5 Kananpitaqa manami Abramnatsu jutiki kanqa, sinöqa Abrahamnami.* Tsayno jutiki kanqa atska nación runakunapa taytan kanaykipaq churashqa kaptïmi.*
6 Qampita miraqkuna tsaytsikaman mirananpaq bendicionnïta churaptïmi atska nacionkunapis y reykunapis paykunapita kanqapaq.
7 “Kay pactuqa manami qamlapaqtsu kanqa, sinöqa tsurikikunapaq, wilkaykikunapaq, wilkaykikunapa tsurinkunapaq y paykunapita mas miraqkunapaqwanmi. Kay pactutaqa imayyaqpis cumplishaqmi. Qampa Diosniki kashqänömi qampita miraqkunapapis Diosnin kashaq.
8 Qorpanöla taykashqayki *Canaáncho kaq markakunatami qoykushayki. Tsaynölami qampita miraqkunata qoykushaq imayyaqpis tsaycho tänanpaq.* Qampita miraqkunapa Diosninmi imayyaqpis kaykäshaq”.
9 Mastapis Abrahamta Tayta Dios kayno nirqan: “Pactu rurashqäta chaskipäkunaykipaq qampis y qamwan kaykaq lapan olqu kaqkuna cuerpuykita *señalakäriy. Tsaynöla señalakärinqa qampita miraqkunapis.*
10 -
11 Señalakushpayki pishqu puntaykipa qaranta kutsukärinki. Tsayno señalakurmi pactu rurashqäta chaskipäkunki.
12 Kananpitaqa olqu yuriq kaqta pusaq junaqniyuqlata pishquncho señalapäkunki. Makikicho yuriqkunata y juk lädu nacionpita ashmaynikipaq rantishqayki runakunatapis tsaynöla señalapäkunki.
13 Pactu rurashqäta imaypis yarpänaykipaq lapayki mana qonqaypa señalakärinki.
14 Mayqanpis mana señalakurqa pactu rurashqäta manakaqmanmi churaykan. Tsayno kaqtaqa qamkunapita qarqunki”.
15 Tsaypitanami Tayta Dios Abrahamta kayno nirqan: “Kananpitaqa warmikipa jutin manami Sarainatsu kanqa, sinöqa Saranami.*
16 Paytami bendicionnïta qoshaq tsuriki yurinanpaq. Tsaymi warmiki kanqa atska nacionkunapa mamanno. Paypa wawankunapita miraqkunami reykunapis kanqapaq”.
17 Tayta Dios tsayno niptinmi Abraham yapay lätakuykur shonqulancho asikushpan kayno nirqan: “Pachak (100) watayuq kaykarnaqa ¿imanöpataq tsuriyuq käman? Warmï Sarapis isqun chunka (90) watayuqna kaykarqa ¡imanöpanataq wawayuq kanman!”
18 Tsaymi Tayta Diosta Abraham kayno nirqan: “Tsurï Ismaelta bendicionnikita qoptiki alimi kanman, Tayta”.
19 Tsayno niptinmi Tayta Dios kayno nirqan: “Manami Ismaelpaqtsu niykä, sinöqa warmiki Saracho yurinanpaq kaq tsurikipaqmi. Tsay tsurikipa jutinmi kanqa Isaac.* Pactu rurashqäqa Isaacpaq y paypita miraqkunapaqmi imayyaqpis kanqa.
20 Manakamashqaykinölami Ismaeltapis bendicionnïta qoshaq paypita miraqkuna jatun nación rikakunanpaq. Paypa tsurinkunapis chunka ishkay mandaqkunami kanqa.*
21 Pactu rurashqämi itsanqa Saracho yuriq tsuriki Isaacpaq kanqa. Watan kananno witsanqa wawayuqnami Sara kaykanqa”.
22 Tsayno nirkushpanmi tsaypita Tayta Dios aywakurqan.
23 Tsay junaqmi Tayta Dios nishqannöla makincho kaykaq lapan olqukunapa pishqunta Abraham señalarqan. Tsaymi tsurin Ismaelta, makincho yuriq runakunata y ashmayninpaq rantishqan runakunatapis señalarqan.
24 Tsay señalakunan junaq Abraham kaykarqan isqun chunka isqun (99) watayuqmi.
25 Tsurin Ismaelnami kaykarqan chunka kimsa watayuq.
26 Tsay junaqlami Abraham y tsurin Ismaelpis señalakurqan.
27 Tsaynöpis tsay junaqlami Abraham señalarqan makincho yuriq olqu ashmayninkunata y rantishqan jäpa runakunatapis.
Ichic wilacuycuna
^ 17.1 El-Shaddai ninanqa lapanpaq munayniyuq Dios ninanmi.
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ 17.2 Gén. 12.2-3.
^ 17.5 Abraham ninanqa atska runakunapa taytan ninanmi.
^ 17.5 Rom. 4.17-18.
^ Canaán Canaánchöqa atska markakunami karqan. Cada markachömi juk mandaq rey karqan. Tsaychömi tarqan ceneo runakuna, cenezeo runakuna, cadmoneo runakuna, heteo runakuna, ferezeo runakuna, refaíta runakuna, amorreo runakuna, cananeo runakuna, gergeseo runakuna y jebuseo runakunapis (Gén. 15.19-21). Abrahamtami Tayta Dios promitirqan paypita miraqkunata Canaánta qoykunanpaq (Gén. 17.8).
^ 17.8 Hech. 7.5-6.
^ señalakushqan Señalakuyqa chiwlakunanpa punta qaranta kutsurir jorqushqanmi kaykan. Abrahamwan Tayta Dios pactuta rurashqanta yarpashpanmi Israel runakunaqa tsayno señalakärin. Tsaymi olqu wamrakunata yurishqanpita pusaq junaqniyuq kaykaptin señalapäkun. Tsaytami castellänucho “circuncisión” nipäkun (Gén. 17.9-14; Col. 2.11; 1Cor. 7.18-20).
^ 17.9-10 Hech. 7.8; Rom. 4.11.
^ 17.15 Sara ninanqa princesa ninanmi.
^ 17.19 Isaac ninanqa asin ninanmi.
^ 17.20 Gén. 25.12-18.
