Génesis 25:1-34
25 Abrahampa juk warminpa jutinmi karqan Cetura*.
2 Tsay warmichömi Abrahampa tsurinkuna karqan Zimram, Jocsán, Medán, Madián, Isbac y Súa.
3 Jocsánpa tsurinkunami karqan Seba y Dedán. Dedánpita miraq runakunapitami karqan Asur, Letus y Leum runakuna.
4 Madiánpa tsurinkunanami karqan Efa, Efer, Hanoc, Abida y Elda. Paykunami Ceturapita miraqkuna karqan.
5 Abrahampa lapan imaykanpis tsurin Isaaclapaqmi karqan.
6 *Concubïna warminkunacho* kaq tsurinkunataqa walka walkalami imaykatapis aypurqan. Manaraq wanur aypurkurmi paykunata nirqan inti jeqamunan läduman aywakärinanpaq. Tsaynöpami Isaacpita karuchöna tarqan.
Abraham wanushqan
7 Abraham kawarqan pachak qanchis chunka pitsqa (175) watayuq kashqanyaqmi.
8 Payqa awkinna kaykar wanukushpanmi unay aylunkuna kaqman aywakurqan.
9 Ayantanami pampapäkurqan tsurinkuna Isaac y Ismael Macpela machayman. Tsayqa kaykan Mamripita inti jeqamunan läducho y Zoarpa tsurin Efrónpa chakran kaqchömi. Efrón aylu runakunaqa heteo runakunami karqan.
10 Tsay chakraqa karqan heteo runakunapita Abraham rantishqanmi.* Tsaymanmi Abrahamta pampapäkurqan warmin Sara pamparaykashqan nawpanman.
11 Abraham wanuptin tsurin Isaactanami Tayta Dios bendicionninta qorqan. Payqa tarqan Beer Lahai-Roí nishqan pözu nawpanchömi.*
Ismaelpita miraqkuna
1 Crónicas 1.28-31
12 Kaychömi qelqaraykan Abrahampa tsurin Ismaelpa tsurinkunapita y paykunapita miraqkunapitapis.
Ismaelpa mamanmi karqan Agar. Pay karqan Sarapa ashmaynin Egipto warmimi.
13 Ismaelpa tsurinkunapa jutinkunami qechpapita qalaykur hasta nunushyaq karqan Nebaiot, Cedar, Adbeel, Mibsam,
14 Misma, Duma, Massa,
15 Hadar, Tema, Jetur, Nafis y Cedema.
16 Ismaelpa tsurinkuna chunka ishkaymi karqan. Paykunami tsaytsikaman mirar chunka ishkay trïbu rikakurqan. Tsay tsurinkunapa jutinkuna kashqannölami trïbunkunapa markankunapa jutinkunapis karqan. Paykunami cada ünun mandaq karqan trïbunkunacho.
17 Ismael kawarqan pachak kimsa chunka qanchis (137) watami. Wanushpannami unay aylunkuna kaqman aywakurqan.
18 Ismaelpita miraqkuna mashtakashqa tarqan Havilapita hasta Shuryaqmi. Tsayqa kaykan Egipto nación lädupami. Tsaypami Asurman aywaq näni pasaykan. Kikinpura chikinakuykarpis tsaychömi paykuna tarqan.*
Jacob y Esaú yurishqan
19 Kaychömi qelqaraykan Isaacpa tsurinkunapita y paykunapita miraqkunapitapis. Isaacqa Abrahampa tsurinmi karqan.
20 Chusku chunka (40) watayuq kaykarmi Rebecawan Isaac tarqan. Rebecaqa karqan Betuelpa tsurin y Labánpa paninmi. Paykunaqa Padan-aramcho taq arameo runakunami karqan.
21 Warmin Rebeca qoluq kaptinmi qeshyaq rikakunanpaq TAYTA DIOSTA Isaac manakurqan. Manakushqanta TAYTA DIOS mayaptinmi Rebecaqa qeshyaq rikakurqan.
22 Milïshu kashpanmi pelyar mamanpa pachanta fiyupa nanätsirqan. Tsawraqa Rebeca yarpachakurqan kayno nir: “Tsayno kaykaptinqa wanukümanpis”.
Tsaymi imanir pachanwan nakashqantapis musyananpaq TAYTA DIOSTA manakurqan.
23 Tsayno manakuptinmi TAYTA DIOS kayno nirqan:“Pachaykicho wawaykikuna atskaman mirar ishkay nacionkunami kanqa.Pachalaykichönami chikinakur pelyarkaykan.Punta yuriq kaqmi qepa yuriq kaqpa munaynincho kanqa”.*
24 Killan chayamuptinnami Rebecaqa wachakurqan milïshuta.
25 Punta yuriq kaqpa aqtsan karqan puka y intëru cuerpunnami shapra karqan. Paypa jutintami churaparqan Esaú* jutin kananpaq.
26 Esaúpa talonninta* aptashqami qepanta yurirqan wawqin. Tsayno yurishqanpitami jutinta churaparqan Jacob* jutin kananpaq. Rebeca wachakunan witsan Isaac kaykarqan soqta chunka (60) watayuqnami.
Qechpa kay derëchunta Esaú rantikushqan
27 Tsaypitanami Esaúwan Jacob mözuyarqanna. Esaúqa jirkapa purirmi jirka uywakunata wanutsiyta yachakurqan. Jacobmi itsanqa maypapis mana yarquypa täkuq.
28 Esaú tsarimushqan uywakunapa aytsanta mikurmi Isaac payta mas kuyarqan. Rebecami itsanqa Jacobta mas kuyarqan.
29 Juk junaqchömi Jacob yanukuykaptin Esaú chayarqan jirkapa aywashqanpita pasaypa utikashqa.
30 Tsaychömi Jacobta kayno nirqan: “Wawqi, tsay yanukushqayki pukay pukay mikuyta manakushayki. Pasaypami yarqaypita wanuykäna”.
(Pukay pukay kaq mikuyta munapashqanpitami Esaúta reqipäkurqan Edom jutiwan.*)
31 Niptin Jacob kayno nirqan: “Qaranäpaqqa qechpa kay derëchuykita kanan höra qoykamay”.
32 Jacob tsayno niptin Esaú kayno nirqan: “Yarqaypita wanuykaptïqa ¿imapaqnataq väliman qechpa kay derëchüpis?”
33 Esaú tsayno niptinmi Jacob kayno nirqan: “Kanan höra Diospa jutincho jurar promitimay qechpa kay derëchuykita trukanantsipaq”.
Tsawraqa jurashpanmi Esaú qechpa kay derëchunta tsay mikuywan trukarqan.*
34 Tsaymi Jacob qararqan tantatawan pushpu picantita. Mikuyta usharkurnami Esaúqa aywakurqan. Manami imapis qokurqantsu qechpa kay derëchun.
Ichic wilacuycuna
^ 25.1 Ceturaqa Abrahampa concubïnanmi karqan (1Crón. 1.32).
^ concubïna Concubïnaqa manami runapa legïtimu warmintsu karqan. Concubïnanwanqa manami pakaylapatsu purikurqan, sinöqa warminwannömi tarqan (Jue. 8.31; 19.1-4; 2Sam. 5.13; 15.16; 16.21-22; 20.3; Est. 2.9).
^ 25.6 Abrahampa concubïnankunaqa Agar y Ceturami karqan.
^ 25.10 Gén. 23.3-18.
^ 25.11 Gén. 16.1-14.
^ 25.18 Gén. 16.12.
^ 25.23 Rom. 9.11-12.
^ 25.25 Esaú ninanqa shaprasapa ninanmi.
^ 25.26a Wakin runakunaqa chunchuqninta nipäkun.
^ 25.26b Jacob ninanqa talunta aptan ninan y engañakuq ninanmi.
^ 25.30 Edom ninanqa puka ninanmi.
^ 25.33 Heb. 12.16-17.
