Génesis 7:1-24
7 Tsaypitanami Noéta TAYTA DIOS kayno nirqan: “Lapan runakunapita qam japalaykimi noqa munashqäno kawaykanki. Tsayno kawashqaykipitami *arcaman yaykapäkunki qam, warmiki, tsurikikuna y lumtsuynikikuna.
2 *Püru kaq uywakunataqa* qanchis chinata qanchis orquta arcaman yaykatsinki. Impüru kaqtami itsanqa chinan orqulata yaykatsinki.
3 Tsaynöla yaykatsinki lapan casta päriqkunata qanchis chinata y qanchis orquta. Tsaynöpami päriqkuna kay patsacho mana ushakanqatsu.
4 Kananpita qanchis junaqtami chusku chunka (40) junaq y chusku chunka paqas mana chawaypa tamyatsimushaq. Tsay tamyawanmi kay patsacho lapan kawaq kaqtaqa ushakätsishaq”.
5 Tsaymi Noéqa TAYTA DIOS nishqannöla lapanta rurarqan.
6 Diluviu kanan witsan Noé kaykarqan soqta pachak (600) watayuqmi.
7 Diluviupita salvakunanpaqmi arcaman Noé yaykurqan warminwan, tsurinkunawan y lumtsuyninkunawan.*
8 Tsaynömi arcaman yaykurqan püru kaq y impüru kaq lapan casta uywakuna, päriqkuna y pachalanpa, lätaypa puriqkunapis.
9 Tayta Dios nishqannölami tsay uywakunata Noé yaykatsirqan chinan orquta.
10 Tayta Dios nishqannölami qanchis junaqta diluviu qalaykurqan.
11 Tsay karqan mushuq wata qalaykushqanpita juk killa usharkur chunka qanchis junaqmi. Tsay witsan Noé kaykarqan soqta pachak (600) watayuqmi. Patsa rurinpitami yaku atska pashtamurqan. Ciëlucho yakuta tsaparaykaq punkupis kichakäkurqan.*
12 Tsaymi chusku chunka (40) tsakay y chusku chunka junaq mana chawaypa tamyamurqan.
13 Tamya qalaykushqan junaqmi Noé kimsan tsurinkunawan arcaman yaykurqan. Tsurinkunapa jutinmi karqan Sem, Cam y Jafet. Tsaynölami kimsa lumtsuyninkunawan Noépa warminpis yaykurqan.
14 Paykunawanmi yaykurqan lapan casta ashmana kaq y mana ashmana kaq uywakuna, pachalanpa, lätaypa puriqkuna y tukuy casta päriqkunapis.
15 Lapan casta uywakunatami ishkay kamata arcaman Noé yaykatsirqan.
16 TAYTA DIOS nishqannölami cada casta uywakunata chinan orquta yaykatsirqan. Yaykatsiyta usharkuptinnami arca punkuta TAYTA DIOS wichqarkurqan.
17 Tsaypitanami mana chawaypa tamyarqan chusku chunka (40) junaq y chusku chunka (40) paqas. Tsayno tamyarmi patsaman yaku juntashpan arcata awnatsiyta qalaykurqan.
18 Tsayno tamyaptin waranlanta waranlanta yaku juntaptinmi arcaqa awnayta qalaykurqan.
19 Kay patsaman pasaypa yaku juntarmi altunnin puntakunatapis tsaparqan.
20 Tsay puntakunata tsaparkurpis chunka pitsqa kuchustaraqmi pasarqan.
21 Tsaychömi lapan runakunapis, päriqkunapis, ashmana kaq y mana ashmana kaq uywakunapis y pachalanpa, lätaypa puriqkunapis shenqaypa wanur ushakarqan.
22 Kay patsacho kawaqkunaqa lapanpis shenqaypa wanurmi ushakarqan.
23 Arcaman Noéwan yaykuqkunalami salvakärirqan. Mana yaykuq kaqmi itsanqa runakunapis, uywakunapis, päriqkunapis y pachalanpa, lätaypa puriqkunapis lapan wanur ushakarqan.
24 Tsay yaku pachak pitsqa chunka (150) junaqyaqmi kay patsata tsapararqan.
Ichic wilacuycuna
^ arca Arcaqa jatunkaray atska cuartuyuq büquimi karqan. Pelötawan puklakuna pampapitapis mas jatunmi karqan. Tayta Dios niptinmi arcata Noé rurarqan. Tsay arcamanmi diluviupita salvakärinanpaq Tayta Dios nishqanno Noé, warmin, tsurinkuna, lumtsuyninkuna y tukuy casta uywakunapis yaykurqan (Gén. 6.9–9.17).
^ püru, impüru Püru ninanqa ima qanrapis mana kashqan ninanmi. Tsaymi Tayta Dios munashqanno jutsaynaq kawaq runapis püru kashqanta Bibliacho nin (1Juan 3.3).
^ 7.2 Püru kaq uywakunaqa Diosta adorar altarcho rupatsinanpaq uywakunami karqan. Mayqan uywakuna püru kashqanta y impüru kashqanta musyanaykipaq liyinki Lev. 11.1-47; Deut. 14.3-20.
^ 7.7 Mat. 24.38-39; Luc. 17.27.
