Génesis 9:1-29
9 Nirkurmi Noéta y tsurinkunata Tayta Dios bendicionninta qoshpan kayno nirqan: “Mirapäkuy kay patsaman juntananyaq.*
2 Lapan casta uywakuna, päriqkuna, pachalanpa, lätaypa puriqkuna y lamarcho kawaqkuna mantsakushunkipaq. Tsawraqa lapanpis qamkunapa munaynikichömi kanqa.
3 Tukuy casta kawaqkuna, mikuykuna y verdürakunapis mikupäkunaykipaqmi kaykan.
4 Itsanqa ama mikunkitsu yawartashqa aytsataqa. Yawarninchömi kawaynin kaykan.*
5 “Runa mayinta wanutsiq kaqqa wanutsishqami kanqa. Tsaynölami runata wanutsiq kaq uywapis wanutsishqa kanqa.
6 Kikï niraqtami runata kamashqä.* Tsaymi pipis runa mayinta wanutsiptinqa kikintapis wanutsinqa.*
7 “Qamkuna atskaman mirapäkuy. Tsaynöla qampita miraqkunapis kay patsaman juntananyaq mirapäkutsun”.
8 Nirkurmi Noéta y tsurinkunata Tayta Dios kayno nirqan:
9 “Diluviuwan yapay mana ushakätsinäpaqmi qamkunawan y qamkunapita miraqkunawan *pactuta ruraykä.
10 Tsaynölami pactüta ruraykä *arcapita yarquq lapan casta päriqkunawan, ashmana kaq uywakunawan, mana ashmana kaq uywakunawan y maytsaychöpis kaykaq uywakunawan.
11 Kay pactuta cumplirmi imaypis diluviuwan mana ushakätsishaqnatsu kay patsata, runakunata ni ima kawaqkunatapis. Kanan kashqan diluviunöqa manami imaypis kanqatsu.
12 “Tukuy casta uywakunawan y lapan runakunawan pactu rurashqäta imaypis yarparänäpaqmi
13 pukutaycho turmanyuyta rikakätsimushaq. Tsay turmanyuymi imaypis señal kanqa kay patsawan pactuta rurashqäta yarpänäpaq.
14 Tsaymi patsa jananpa pukutay shamuptin turmanyuyta rikakätsimushaq.
15 Tsay turmanyuyta rikarmi yarpäshaq qamkunawan y kay patsacho lapan casta uywakunawan pactuta rurashqäta. Tsaymi kay patsata yakuwan imaypis mana ushakätsishaqnatsu.
16 Pukutaycho turmanyuyta rikarmi yarpäshaq lapan runakunawan y uywakunawanpis pactuta rurashqäta. Tsay pactutaqa imayyaqpis cumplishaqmi.
17 Tsaymi turmanyuyta señalpaq churashqä qamkunawan y uywakunawan pactuta rurashqäta yarpänäpaq”.
Tsaynömi Noéwan Tayta Dios parlarqan.
Tsurinkuna imano kananpaq kashqantapis Noé nishqan
18 Noépa tsurinkunami karqan Sem, Cam y Jafet. Tsay kimsan tsurinkunawanmi *arcapita Noé yarqamurqan. Cam karqan Canaánpa papäninmi.
19 Noépa kimsan tsurinkunapitami kay patsacho lapan runakuna mirapäkushqa.
20 Purun chakrata kicharkurmi Noéqa üvakunata plantarqan.
21 Tsaypitanami üva poqurkuptin vïnuta upyarkur Noé shinkarqan. Shinkarkurnami qarapächula toldun rurincho jitaraykarqan.
22 Papänin qarapächula jitaraykaqta rikaykurmi Canaánpa taytan Cam aywarqan ishkay kaq wawqinkunata wilananpaq.
23 Tsawraqa Semwan Jafet jinan höra capötita aylukurkur papänin kaqman qepapaylapa yaykur tsapaparkurqan. Tsayno tsapaparqan papänin qarapächula kaykaqta mana rikapäkunanpaqmi.
24 Kachakashqana rikcharkamurmi Noé musyarqan shulka kaq tsurin wawqinkunata wilashqanta.
25 Tsaymi kayno nirqan:“¡Maldicionädu katsun Canaán!¡Payqa wawqinkunapa ashmaynilanmi kanqa!”
26 Nirkurnami yapay kayno nirqan:“Semtaqa TAYTA DIOS lapanchöpis yanapaykulätsun.Canaánpita miraqkuna itsanqa Sempita miraqkunapa ashmaynin katsun.
27 Jafetta Tayta Dios yanapaykutsun atskaman mirananpaq.Sempita miraqkunawanpis juntu tätsun.Tsaynöpis Jafetpa miraqninkunapa ashmaynin katsun Canaánpa miraqninkuna”.
28 Diluviu kashqanpita Noé kawarqan kimsa pachak pitsqa chunka (350) wataraqmi.
29 Noé wanurqan isqun pachak pitsqa chunka (950) watayuq kaykarmi.
Ichic wilacuycuna
^ 9.6b Éxo. 20.13.
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ arca Arcaqa jatunkaray atska cuartuyuq büquimi karqan. Pelötawan puklakuna pampapitapis mas jatunmi karqan. Tayta Dios niptinmi arcata Noé rurarqan. Tsay arcamanmi diluviupita salvakärinanpaq Tayta Dios nishqanno Noé, warmin, tsurinkuna, lumtsuyninkuna y tukuy casta uywakunapis yaykurqan (Gén. 6.9–9.17).
^ arca Arcaqa jatunkaray atska cuartuyuq büquimi karqan. Pelötawan puklakuna pampapitapis mas jatunmi karqan. Tayta Dios niptinmi arcata Noé rurarqan. Tsay arcamanmi diluviupita salvakärinanpaq Tayta Dios nishqanno Noé, warmin, tsurinkuna, lumtsuyninkuna y tukuy casta uywakunapis yaykurqan (Gén. 6.9–9.17).
