Isaías 49:1-26
49 Costacho kaykaq nación runakuna, mayapäkamay.Karu nacionkunacho taq runakuna, nishqäta shumaq tantiyakäriy.Manaraqpis yuriptïmi TAYTA DIOS qayamarqan.Mamäpa pachancho kaykaptilämi jutïta churapämarqan.*
2 Rimashqäpis ali afilashqa espädano kananpaqmi kamakätsishqa.*Makinwanmi ima desgraciapitapis tsapämashqa.Lawchi punta flëchano kanäpaqmi churamashqa.Flëchanta puritsikunanman winashqanömi kaykä.
3 Paymi kayno nimarqan:“Sirvimaqnï Israelmi kaykanki.Sirvimaptikimi maytsaychöpis alabashqa kashaq”.
4 Tsayno niykämaptinpis mana tantiyakuypami kayno nirqä:“Manakaqlapaqmi Diostapis sirvishqä.Manakaqlapaqmi kalpätapis ushashqä.Tsayno yarparpis TAYTA DIOSPA makinchömi kaykä.Paymi sirvishqäpita yanapamanqa”.
5 Mamäpa pachancho kaykaptilänami sirviqnin kanäpaq TAYTA DIOS akramashqa.Nirkurmi churamashqa Israel runakunata paywan amistatsinäpaq.TAYTA DIOSNÏ kuyamarmi yanapaykäman.
6 Paymi kayno nimashqa:“Manami Jacobpita miraq runakunawan amistatsimänalaykipaqtsu akrashqä.Maytsay nacionkunapaqpis atski kanaykipaqmi churashqä.*Tsaynöpami maytsaychöpis runakuna salvakärinqa”.*
7 Lapan nación runakunami chikipäkaman.Mandaq runakunami munaynincho tsararäman.Tsayno kaptinpis Israel runakunata salvaq *santu TAYTA DIOSMI kayno niman:“Reykunapis y mandäshiqninkunapis nawpaykimanmi qonqurpakamunqa.Tsayno qonqurpakamunqa qamta akrashqa kaptï y promitishqäta imaypis cumpliptïmi.Israel runakunapa santu TAYTA DIOSNIN karmi tsayno kamakätsishaq”.
Jerusalén altsakänanpaq nishqan
8 Sirviqninta TAYTA DIOS kaynömi nin:“Kuyapashqä hörami manakamashqaykita mayashqä.*Salvanäpaq kaq junaqmi qamta salvashqä.Noqami imaypis tsapäshayki.Runakunawan *pactuta ruranäpaqmi churashayki.Tsaynöpami Israel nacionta unay kashqanmannöna kutitsinkipaq.Kacharishqa chakrakunatapis duëñunkunatami kutitsinkipaq.
9 “Tsaymi prësu kaykaqkunatapis yarqapäkunanpaq ninkipaq.Tsakäpakushqano kaykaqkunatapis atsikyaqman yarqapäkunanpaq ninkipaq.Paykunaqa uyshänömi kanqa.May nänipa aywaptinpis alimi rikashaq.Tsaki jirkakunapa pasaptinpis atskami qewa kanqa.
10 Intipis manami paykunata rupanqatsu.Paykunata kuyapar chuya yaku pashtashqanpami pushashaq.Manami yarqananqatsu ni yakunanqatsu.*
11 Jirkakunapapis ali nänitami rurashaq.Uchku uchku nänikunatapis pampatsashaqmi.
12 Kuyashqä runakunaqa karupitami shapäkamunqa.Norti kaq lädupita, inti jeqanan kaq lädupita y Sinim partipitami shapäkamunqa”.
13 ¡Jana patsa, kushikushpayki cantay!¡Kay patsa, fiyupa kushikuy!¡Jirkakuna, kushikur alabapäkuy!¡TAYTA DIOS kuyashqan runakunata salvashqanpita kushikäriy!¡Waktsakunata kuyapashqanpita kushikäriy!
14 *Siónmi* kayno nishqa:“TAYTA DIOS kachariykamashpan qonqaykamashqa”.
15 Tsawraqa Siónta Tayta Dios kaynömi nin:“¿Wawanta warmi qonqaykunmantsuraq?¿Wawanta manatsuraq kuyapanman?Wawanta qonqaptinpis noqaqa manami imaypis qonqashaykitsu.
16 Maki paltämanmi jutikitapis qelqashqä.Marka murällaykikunatapis yarparaykämi.
17 Altsashunaykipaq runakuna apurädumi shapäkamunqa.Ushakätsishuqniki runakunapis aywakurkaykannami.
18 “Maski intërupa shumaq rikachakuy.Maytsaypitami wawaykikuna* juntakaykämun.Noqa TAYTA DIOSMI jurar kayno nï:Wawaykikuna kutimurmi jipash casarananpaq röpano kanqa.Qamnami tsay kuyaylapaq röpata jatikuqno kushikunkipaq.
19 “Atska runakuna kutimuptin nacionniki pasaypa kichkimi rikakunqa.Raqäkunamanpis chunyaqkunamanpis juntanqami.Ushakätsishuqniki runakunaqa karupami aywakärinqa.
20 Ushakashqantana yarpaptikipis wawaykikuna tsaytsika kutimurmi kayno nishunkipaq:‘Tayta Diospa bendicionninwan mirarmi kay nacionman juntapäkushqä.Juk partitana ashipaykalämay tsaycho täkunäpaq’.
21 “Tsaymi pasaypa kushikur yarpaynilaykicho kayno ninkipaq:‘Wawäkunata wanutsir ushashqa kaykaptinqa ¿pipa wawankunataq kay wamrakuna kaykan?Wakin wawäkunata juk läduman qarqushqa kaykaptinqa ¿maypitataq kay wamrakuna yurimushqa?Wawaynaq kaykaptïqa ¿maypitataq shamushqa?’ ”
22 Siónta TAYTA DIOS kaynömi nin:“Maytsay nacioncho taq runakunata kachaptïmi wawaykikunata warmita olqutapis marqashqa y aparishqa apamunqa.
23 Tsay wawaykikunatami reykuna wamranpaq legitimakunqa.Reypa jipash tsurinkunami ashmanqa.Paykunami respitashushpayki qonqurpakamunqa.Tsaymi musyankipaq noqa TAYTA DIOS kashqäta.Noqaman yärakamaqkunaqa manami penqakärinqatsu”.
24 Kalpayuq runa guërracho vincir imatapis apakuptin ¿pilaqa qechunmantsuraq?Fiyu runa prësu apaptin ¿pilaqa qechunmantsuraq?
25 TAYTA DIOSMI kayno nin:“Noqami itsanqa kalpayuq runa imatapis apashqanta qechushaq.Fiyu runa prësu apashqan runakunatapis qechushaqmi.Favorniki sharkurmi chikishuqnikipa makinpita wamraykikunata shuntamushaq.
26 “Nakatsishuqnikikuna kikinpura wanutsinakunanpaqmi kamakätsishaq.Aläpa wanutsinakuy kaptinmi runa mayinpa aytsanta mikuqno kanqa.Mayunöraq yawar aywaptinmi runa mayinpa yawarninta upuqno kanqa.Tsaynöpami lapan runakuna musyanqa noqa TAYTA DIOS salvashuqniki kashqäta.Tsaynöpis musyanqa Jacobpa munayniyuq Diosnin kar qamkunata tsapashqäta”.
Ichic wilacuycuna
^ 49.2 Heb. 4.12; Apoc. 1.16.
^ 49.6b Hech. 13.47.
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ 49.10 Apoc. 7.16-17.
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
^ 49.14 Kay versïculukunacho Siónpaq parlarqa Israel runakunapaqmi parlan. Tsaynöpis wawayuq warmimanmi tinkutsirqan.
^ 49.18 Kay versïculukunacho Siónpa wawankunaqa Israel runakunami karqan.
