Isaías 6:1-13
6 Rey Uzías wanushqan watami Tayta Diosta rikarqä jana patsacho kuyaylapaq trönuncho jamaraykämuqta. Tsay trönunpita patsami röpanpa kuchun templu junta kaykarqan.
2 Jamaraykämushqan jananpami serafín *angilkuna kaykarqan. Tsay serafín angilkuna soqta älayuqmi karqan. Ishkay älankunawanmi qaqlanta tsapakurqan. Ishkaywanmi chakinkunata tsapakurqan. Ishkay kaqwannami pärirqan.
3 Paykunami juknin juknin kayno nirqan:“¡*Santu, santu, santu!*¡Lapanta mandaq TAYTA DIOSQA santumi kaykan!¡Payqa maytsaychöpis munayniyuqmi kaykan!”
4 Tsayno nishqan mayakämuptinmi templupa punkunkunapis siksikyarqan y qoshtaynami templuman juntarqan.*
5 Tsawraqa pasaypa mantsakashqami kayno nirqä:“¡Kananchi kananqa! ¡Kananqa wanushaqchari!¡Lutankunata rimaq kaykarpis y manakaqkunata rimaq runakunawan qoturaq kaykarmi mandaq Reyta rikaykushqä!¡Payqa kaykan lapanta mandaq TAYTA DIOSMI!”*
6 Tsayno parlaykaptïmi juk serafín ángel pärimurqan. Paymi *altarpita jorqamushqan rawraykaq shanshata tenäzawan apamurqan.
7 Tsay shanshata shimïman töpaykatsirmi kayno nimarqan: “Kay shanshata shimikiman töpatsiptïmi lapan jutsa rurashqaykipita perdonashqana kaykanki”.
8 Tsaypitanami TAYTA DIOS kayno parlamuqta mayarqä: “Wilakuq aywananpaq ¿pilataraq kachashaq? ¿Pilaraq wilakuqnintsi kanqa?”
Tsaymi kayno nirqä: “Kaychömi kaykä, Tayta. Noqa aywashaq”.
9 Tsayno niptïmi kayno nimarqan:“Aywar tsay runakunata niy:‘Mayjina mayashpaykipis manami tantiyapäkunkitsu.Mayjina rikashpaykipis manami cuentata qokärinkitsu’.
10 “Tsay runakunapa shonqunta chukruyätsiy.Rinrinkunatapis upayätsiy.Nawinkunatapis qaprayätsiy.Tsaynöpami mana rikar, mana wiyar, mana tantiyakur jutsankunata mana kacharinqatsu.*Tsayno kaptinmi noqapis mana aliyätsishaqtsu”.* *
11 Tsayno nimaptinmi kayno tapurqä: “Tayta Dios, ¿imayyaqtaq tsayno wilakushaq?”
Tapuptïmi kayno nimarqan: “Tsayno wilakunki markakuna ushakaptin ni juk runalapis wayincho mana tashqanyaq y chakrakunapis pasaypa chunyaq rikakushqanyaq.
12 Tsaynöpis wilakunki runakunata juk läduman prësu apatsishqäyaq y kay nación chipyaq ushakashqanyaq.
13 “Kay nacioncho cada chunka runakunapita juklaylapis putsuptinqa yapaymi ushakätsishaq. Tsayno kaptinpis roble yörata y encina yörata mutuptin troncun quëdashqannölami noqa akrashqä runakuna walkala quëdanqa. Troncunpita tsintsimuqnömi juk ishkay kawaykar quëdaqkunapita yapay miranqa. Tsay runakunaqa shumaqmi cäsukamanqa”.
Ichic wilacuycuna
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ 6.4 Apoc. 15.8.
^ 6.5 Éxo. 33.20.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 6.10a Tsay nishqanqa kay niqnömi kaykan: Wilakuptikimi runakunapa yarpayninpis pantakanqa. Rinrinkunapis upayashqano kanqa. Nawinkunapis qaprayashqano kanqa. Tsaynöpami mana rikaqno y mana mayaqno kashpan mana tantiyakunqatsu jutsankunata kacharinanpaq.
^ 6.10b Manami qeshyalapita aliyätsinanpaqtsu niykan, sinöqa nakaykunapita, lakikuykunapita y jutsa ruraykunapita salvananpaqmi niykan.
