Jeremías 21:1-14
21 Kaychömi qelqaraykan Jeremíasta TAYTA DIOS wilakatsishqan. Tsay junaqmi rey Sedequíasqa Jeremías kaqman kacharqan Malquíaspa tsurin Pasurta y Maasíaspa tsurin cüra Sofoníasta. Chayaykurmi Jeremíasta kayno nipäkurqan:
2 “Babilonia nacionpa mandaqnin rey Nabucodonosor atacaykämaptintsi* TAYTA DIOS salvamänantsipaq ruwakuykulay. Ruwakuptikiqa capazchari qarqunqa markanman kutikärinanpaq”.
3 Tsayno niptinmi Jeremías kayno nirqan: “Qamkuna kutiykur rey Sedequíasta wilapäkuy kayno nir:
4 ‘Israel runakunata kuyaq TAYTA DIOSMI kayno nin: Babiloniapa mandaqnin reypa soldädunkunata atacananpaq soldäduykikunata kachaptikipis vincimunqami. Tsaymi marka murälla waqtancho jiruruypa churanakushqanpita Jerusalénman yaykamunqa.
5 Jutsa rurapäkushqaykipita rabyashqa kar kikïmi contrayki sharkushaq.*
6 Tsaymi Babilonia soldädukunawan kay markacho taqkunata lapanta ushakätsishaq. Tsaynölami runakuna y uywakunapis pesti qeshyawan wanupäkunqa.
7 “ ‘Tsaypitanami Babiloniapa mandaqnin rey Nabucodonosorpa makinman kachaykushayki. Tsaynöpis paypa makinmanmi entregashaq soldäduykikunapa capitanninkunata y kawaykar quëdaq runakunatapis. Pesti qeshyawan, guërrawan y yarqaywan mana wanuq kaqtaqa mana kuyapaypami espädawan wanutsinqa. Noqa TAYTA DIOSMI tsayno nï’ ”.
8 Rey Sedequíaspa kachankunata tsayno wilaykuptinmi Jeremíasta TAYTA DIOS kayno nirqan: “Noqa nishqäta Jerusalén runakunata kayno niy: ‘Ali kawayta karpis o mana ali kawayta karpis mayqantapis akrapäkuy.
9 Jinan markalacho quëdarqa wakinniki guërracho wanupäkunkipaq, wakinniki yarqaypita wanupäkunkipaq y wakinnikinami pesti qeshyawan wanupäkunkipaq. Kay markapita yarqur jiruruypa tsaparaykäshuqniki Babilonia runakunaman rindikurqa kawapäkunkipaqmi.*
10 “ ‘Salvanäpa trukanqa kay markata ushakätsishaqmi. Ushakätsinäpaqmi Babilonia nacionpa mandaqnin reypa makinman entregashaq. Paymi lapanta rupatsir ushanqa.* Noqa TAYTA DIOSMI tsayno nï’ ”.
Judá reykuna alita rurananpaq yätsishqan
11 “David aylu reyta y aylunkunata kayno ninki:
12 ‘David aylu mandaqkuna, TAYTA DIOSMI kayno nin: Runakunata waran waran ali juzgapäkuy. Nakatsiq runakunapa makinpita nakaykaqkunata jorqapäkuy. Mana alita rurashqaykita rikarmi nina rataykaqnöraq fiyupa rabyakushaq. Rabyakuptïqa bunyaypa bunyar rupaykaq ninata upitsiyta mana kamäpakuqnömi pipis rabyaynïta pasatsiyta mana kamäpakunqatsu’ ”.
Jerusalénman castïgu chayananpaq nishqan
13 TAYTA DIOSMI kayno nin: “Jerusalén runakuna, qamkunapa contraykimi kaykä. Jatun qaqachöno markayki kaptinmi nipäkunki pipis mana vincishunaykipaq kashqanta y pipis markaykiman mana yaykamunanpaq kashqanta.
14 Tsayno nipäkuptikipis jutsata rurashqayki tupumi castigashayki. Muntikikunatapis rupatsirmi ushashaq. Marka nawpankunatapis chipyaqmi rupatsir ushashaq. Noqa TAYTA DIOSMI tsayno nï”.
Ichic wilacuycuna
^ 21.1-2 2Rey. 25.1-11; 2Crón. 36.17-21.
^ 21.5 Deut. 29.28.
^ 21.10 Jer. 38.17-18.
