Jeremías 28:1-17
28 Sedequías* chusku wata y pitsqa killa Judá nacionpa mandaqnin rey kaykaptinmi cürakuna y lapan runakuna mayaykaptin Azurpa tsurin Gabaóncho yuriq profëta Hananías templucho kayno nimarqan:
2 “Israel runakunata kuyaq y lapanta mandaq TAYTA DIOSMI kayno nin: ‘Babiloniapa mandaqnin rey qamkunaman churapäshushqayki yügutami pakishaq.*
3 Kananpita ishkay watatami Babiloniapa mandaqnin rey Nabucodonosor templupita apashqan lapan manëjukunata kutitsimushaq.
4 Rasunpami Babiloniapa mandaqnin rey churapäshushqayki yüguta pakishaq. Tsayno rurarmi Joacimpa tsurin rey Jeconíasta kutitsimushaq Judá nacioncho yapay mandananpaq. Judápita Babiloniaman prësu apashqan runakunatapis lapantami kutitsimushaq. Noqa TAYTA DIOSMI tsayno nï’ ”.
5 Tsayno Hananías niptinmi profëta Jeremías templucho kaykaq cürakunapa nawpancho y lapan runakunapa nawpancho kayno nirqan:
6 “¡Tsayno katsun! ¡Alimi kanman nishqaykino TAYTA DIOS kamakätsiptin! ¡Ima kushikuyraq kanman templupita apashqan manëjukunata rasunpa kutitsimuptin! ¡Tsaynöpis fiyupa kushikuypaqchari kanman Babiloniaman prësu apashqan runakunata kutitsimuptin!
7 “Itsanqa qampis y lapan runakunapis nishqäta shumaq mayapäkamay.
8 Qampis ni noqapis manaraq yuriptintsimi unay profëtakunaqa wilakärirqan atska nacionkunacho y reykuna mandashqancho guërrakuna, nakaykuna y pesti qeshyakuna kananpaq kashqanta.
9 Kananqa mayqan profëtapis jawka kawanantsipaq kashqanta wilakuptinqa shumaq tantiyakushun wilakushqan rasunpa kashqanta o lulapaykämashqantsitapis. TAYTA DIOS rasunpa kachamushqan profëta kashqanta musyantsi wilakushqanno cumpliptinraqmi”.*
10 Tsayno niptinmi Hananías jinan höra Jeremíaspa matankancho wataraykaq yüguta qechurir pakir usharqan.
11 Yüguta pakirirmi lapan runakunapa nawpancho kayno nirqan: “TAYTA DIOSMI kayno nin: ‘Kananpita ishkay watatami Babiloniapa mandaqnin rey Nabucodonosor yügunta lapan nacionkunaman churashqanta kayno pakir ushakätsishaq’ ”.*
Tsayno niptinmi templupita yarqur Jeremías aywakurqan.
12 Jeremías matankancho watashqa puritsishqan yüguta Hananías pakishqanpita manaraqpis aykälatami Jeremíasta TAYTA DIOS kayno nirqan:
13 “Hananías kaqman aywaykur nishqäta kayno wilanki: ‘TAYTA DIOSMI kayno nin: Qamqa qeru yügutami pakishqanki. Kananqa fiërru yüguwan yügushqanönami runakuna karkaykan.
14 Fiërru yüguta matankanman churaqnömi lapan nación runakunata Babiloniapa mandaqnin rey Nabucodonosorpa munayninman churashaq. Jirka uywakunatapis paypa munayninmanmi churashaq. Israel runakunata kuyaq y lapanta mandaq TAYTA DIOS karmi tsayno nï’ ”.
15 Tsayno nishqanta wilarmi mastapis profëta Jeremías kayno nirqan: “Hananías, shumaq mayamay. Qamtaqa manami TAYTA DIOS kachamushushqankitsu wilakunaykipaq. Lulakurmi lapan runakunata criyiykätsinki.
16 Tsaymi TAYTA DIOS kayno nin: ‘Lulapashqaykita criyirmi runakuna mana cäsukamannatsu. Tsaymi kay watalacho ushakätsishayki’ ”.
17 Nishqannölami tsay wata aywaq qanchis killacho profëta Hananías wanurqan.
Ichic wilacuycuna
^ 28.1 2Rey. 24.18-20; 2Crón. 36.11-13.
^ 28.2 Yügutami pakishaq ninanqa Babiloniapa mandaqnin reypa munaynincho kashqaykipita jorqushayki ninanmi. Tsaynölami kaykan 28.4 versïculuchöpis.
^ 28.9 Deut. 18.21-22.
^ 28.11 Kay versïculucho nishqanqa Babiloniapa mandaqnin rey Nabucodonosor lapan nacionkunata munaynincho tsararashqanpita ishkay watata jorqushaq ninanmi.
