Jeremías 36:1-32
36 Josíaspa tsurin Joacim* chusku watana Judá nacioncho rey kaykaptinmi* Jeremíasta TAYTA DIOS kayno nirqan:
2 “Rey Josías kaykashqan witsanpita hasta kananyaq lapan wilapashqäkunata mushuq rölluman qelqay. Qamta wilaparmi musyatsishqä Israel runakunata, Judá runakunata y wakin nación runakunata castiganäpaq kashqanta. Tsay lapanta mana qonqaypa qelqay.
3 Paykunata castiganäpaq kashqanta musyashpan Judá runakuna capazchari jutsa ruraykunata kacharinmanpis. Kachariptinqa jutsata rurashqanta perdonashaqmi”.
4 Tsaymi TAYTA DIOS lapan revelashqanta Neríaspa tsurin Baructa qayaykur mushuq rölluman qelqananpaq Jeremías dictarqan.
5 Nirkurmi Baructa Jeremías kayno nirqan: “Musyashqaykinöpis noqataqa manami TAYTA DIOSPA templunman aywanäta munapäkuntsu.
6 Tsaymi qam aywaykur Judá runakuna markankunapita templuman ayunaq shamuptin TAYTA DIOS imata nishqantapis kay rölluta lapan runakunata liyipanki.
7 Fiyupa rabyashpan kay markata castigananpaq nishqanqa mantsakuypaqmi kaykan. Tsayta mayar jutsa rurashqanta kacharir TAYTA DIOSTA ruwakäriptin capazchari perdonanmanpis”.
8 Tsaymi Jeremías nishqannöla templuman aywaykur Neríaspa tsurin Baruc röllucho qelqaraykaqta runakunata liyiparqan.
9 Tsayno liyiparqan Josíaspa tsurin Joacim pitsqa wata isqun killana Judá nacioncho rey kaykaptinmi. Tsay witsanmi intëru Judá nacioncho kaykaq markakunapita templuman aywapäkurqan Jerusaléncho taqkunawan TAYTA DIOSPA nawpancho ayunapäkunanpaq.
10 Tsaycho juntakaptinmi TAYTA DIOSPA templunman Barucpis aywarqan röllucho qelqaraykashqanta liyipänanpaq. Chayaykurmi secretariu Safánpa* tsurin Gemaríaspa cuartun punkupita lapan runakunata liyiparqan. Tsay cuartu karqan jana kaq patiucho y Mushuq Punku cercanchömi.
11 TAYTA DIOS nishqanta Baruc liyipashqantami Gemaríaspa tsurin Micaías mayarqan. Micaías karqan Safánpa wilkanmi.
12 Mayaykurmi reypa palaciunman aywar yaykurqan secretariupa despächunman. Tsaychömi tarirqan lapan autoridäkuna jamarpaykaqta. Paykuna karqan secretariu Elisama, Semaíaspa tsurin Delaía, Acborpa tsurin Elnatán, Safánpa tsurin Gemarías, Ananíaspa tsurin Sedequías y mas wakin autoridäkunapis.
13 Paykunatami Micaías wilarqan templucho runakunata Baruc imata liyipashqantapis.
14 Wilaptinmi autoridäkunaqa Jehudíta kacharqan Baructa pushamunanpaq. Jehudí karqan Netaníaspa tsurin, Selemíaspa wilkan y Cusipa wilkanpa tsurinmi. Baruc kaqman chayaykurmi kayno nirqan: “Lapan runakunata liyipashqayki rölluta apakurkurshi aywashun”.
Niptinmi liyipashqan rölluta apakurkur Neríaspa tsurin Baruc autoridäkuna kaqman aywarqan.
15 Chayaykuptinmi autoridäkuna kayno nipäkurqan: “Jamakuläshun, tayta. Templucho liyipashqayki röllupita noqakunatapis liyipaykalämay”. Tsaymi Baruc liyiparqan.
16 Liyipayta usharkuptinmi mantsakashqa rikapänakur Baructa kayno nipäkurqan: “Lapan liyipämashqaykita reyta wilashun”.
17 Rey kaqman manaraq aywarmi Baructa tapupäkurqan kayno nir: “¿Jeremíasku nishushqanki lapan tsaykunata qelqanaykipaq?”
18 Tsaymi Baruc kayno nirqan: “Aw, pay dictamaylantami rölluman lapanta qelqashqä”.
19 Tsaymi Baructa kayno nipäkurqan: “Maycho kaykashqaykita pipis mana musyananpaq Jeremíaswan pakakäriy”.
Rölluta rey Joacim rupatsishqan
20 Nirkurmi secretariu Elisamapa despächuncho rölluta kachaykur rey kaykashqan patiuman aywapäkurqan. Chayaykurmi wilapäkurqan imata mayashqantapis.
21 Wilapäkuptinmi Jehudíta reyqa kacharqan rölluta apamunanpaq. Tsaymi secretariu Elisamapa despächunpita rölluta aparkamur reyta y tsaycho kaykaq autoridäkunata liyiparqan.
22 Tsay witsanqa isqun kaq killami karqan. Tsaymi tamya killa kar qasaptin sälancho ninata ratarkatsir mashakur rey kaykarqan.
23 Kimsa o chusku höjatano Jehudí liyiylantami rey cuchilluwan rölluta kutsurir mashakuykashqan ninaman qaykurqan. Tsaymi lapan rölluta rupatsir usharqan.
24 Liyipashqanta mayarpis manami reypis ni yanapaqninkunapis mantsakurqantsu ni lakikur röpankunatapis rachirqantsu.
25 Tsay rölluta mana rupatsinanpaq Elnatán, Delaía y Gemarías ruwaptinpis rey manami cäsurqantsu.
26 Tsaypa trukanqa tsurin Jerameelta, Azrielpa tsurin Seraíasta y Abdeelpa tsurin Selemíasta kacharqan secretariu Baructa y profëta Jeremíasta prësu tsarimunanpaq. Kachaptinpis TAYTA DIOS pakashqa kaptinmi mana tarirqantsu.
Juk rölluchöna qelqananpaq Jeremíasta Tayta Dios nishqan
27 Jeremías dictashqan y Baruc qelqashqan rölluta rey rupatsiptinpis yapaymi Jeremíasta TAYTA DIOS kayno nirqan:
28 “Yapay juk rölluman qelqatsiy Judá nacionpa mandaqnin rey Joacim rupatsishqancho qelqarashqantanöla.
29 “Nirkur rey Joacimta kayno ninki: ‘TAYTA DIOSMI kayno nin: Tsay röllucho qelqaraykarqan Babilonia nacionpa mandaqnin rey chaykamur kay nacioncho runakunata y uywakunata ushakätsinanpaq kashqanmi. Tsaymi lakikunaykipa trukanqa ¿imanirtaq rabyar tsay rölluta rupatsishqanki?
30 “ ‘Tsayno rupatsishqaykipitami TAYTA DIOS kar qamta kayno nï: Qampita miraqkuna manami mayqanpis David jamarashqan trönucho mandar jamaranqatsu. Wanuptiki manami pampashunkipaqtsu, sinöqa junaqpa shanaychömi y tsakaypa qasaychömi ayayki jitaranqa.
31 Qamtapis, tsurikikunatapis y lapan yanapashuqnikikunatapis jutsata rurapäkushqaykipitami castigashayki. Castiganäpaq wilakatsishqäta mayayta mana munaptikipis wilakatsishqänölami Jerusaléncho taqkunata y intëru Judácho taqkunata castigashaqpaq’ ”.*
32 Tayta Dios tsayno niptinmi Neríaspa tsurin secretariu Baructa Jeremías juk röllutana kamariparqan yapay qelqananpaq. Judá nacionpa mandaqnin rey Joacim rupatsishqan röllucho qelqarashqantanölami lapanta qelqarqan. Tsay qelqashqanman mas atskatami Jeremías yapatsirqan.
Ichic wilacuycuna
^ 36.1 2Rey. 24.1; 2Crón. 36.5-7; Dan. 1.1-2.
^ 36.1 Tsay wata karqan 627 a. C.
^ 36.10 Jer. 26.24.
^ 36.30-31 2Rey. 23.36—24.6; Jer. 22.18-19.
