Jeremías 51:1-64
51 TAYTA DIOSMI kayno nin:“Babilonia runakunata ushakätsinanpaq löcu wayratanömi contrankunata kachamushaq.
2 Tsay junaqmi Babilonia runakunata maytsaypitapis atacapäkunqa.Trïgu punshata jurquëtawan jitaqnömi runakunata nacionninpita qarqunqa.Tsaymi tsay nacioncho juk runalapis mana tanqanatsu.
3 “Atacaq soldädukuna, Babilonia soldädukunata mana kuyapaypa chipyaq ushakätsiy.Flëchankunata kamarikunanta ama kachapaytsu.Pelyananpaq chalëcunkunata jatikunantapis ama kachapaytsu.
4 Wanutsiptikimi Babilonia* nación markakunapa cällinkunacho aya jitarpanqa.
5 Lapanta mandaq TAYTA DIOS karmi Israel runakunata y Judá runakunata mana qonqaypa yanapashaq.Kuyaqnin santu Tayta Dios kaykaptïpis rabyanätsimarmi nacionnincho jutsata rurapäkurqan.Tsayno kaptinpis paykunapa favorninmi sharkushaq.
6 “¡Kuyashqä runakuna, Babilonia nacionpita aywakäriy!¡Imaykanöpapis qeshpikäriy!¡Jutsata rurapäkushqanpita castïgu shamuptin mana wanunaykipaq qeshpikäriy!Paykunata pasaypa castiganä junaq chayamushqanami.Tsaymi jutsata rurapäkushqanman tupu castigashaq.*
7 “Babilonia runakunaqa qoripita rurashqa cöpanömi makïcho kashqa.Noqa rabyakushqäqa tsay cöpacho poqushqa vïnunömi kashqa.Tsaymi Babilonia runakuna atacaptin maytsay nacionkuna shinkashqa runakunano löcutashqa.*
8 “¡Babilonia ushakashqanami!¡Elaqpitami ushakashqa!*¡Babilonia nacionpaq lapayki waqapäkuy!¡Malograkushqanta jampinanpaq ima jampilatapis ashipäkuy!Jampiptiki capazchari aliyanqapis.
9 “Babiloniacho taykaq Judá runakuna kaynömi nipäkunqa:‘Babilonia nacionta imanöpa jampirpis manami aliyätsishqätsu.Jutsa rurashqankunapis jana patsayaqmi chayashqa.*Tsayno kaykaptinqa nacionnintsikunaman lapantsi kutikärishun.
10 TAYTA DIOSMI yanapamashqantsi.TAYTA DIOSNINTSI imano yanapamashqantsita wilakunantsipaq Siónman lapantsi aywashun’.
11 “Media nacionpa mandaqnin reykuna, ¡soldäduykikuna flëchankunata afilakäritsun!¡Guërracho tsapakunan escüdunkunatapis kamarikäritsun!¡Babilonia nacionta ushakätsinanpaq aywapäkutsun!Babilonia runakunataqa templüta ushakätsishqanpitami chipyaq ushakätsishaq.
12 ¡Babilonia markapa murällanta juchuratsir atacaq yaykapäkunanpaq bandërata ichitsipäkuy!¡Soldäduykikuna atskaq katsun trukanakunanpaq!¡Rikachakuqkunatapis intëruman churapäkuy!¡Pakakuykur atacanaykipaq shumaq kamarikäriy!Babilonia runakunataqa imanöpa ushakätsinäpaq yarpashqänölami ushakätsishaq.
13 “Babilonia runakuna, jatun mayukuna nawpancho kaptikipis* y rïcu kaptikipis ushakänaykipaq höra chayamushqanami.Kanan kashqaykino manami imaypis kankipaqnatsu”.
14 Lapanta mandaq TAYTA DIOSMI kikinpa jutincho jurar kayno nin:“Noqami contraykikunata atska chukluskunatanöraq qaykamushaq.Tsaymi vincishushpayki fiyupa kushikärinqa”.
Tayta Diosta alabar cantashqan
Jeremías 10.12-16
15 TAYTA DIOSMI munayninwan kay patsata kamashqa.Yachaq karmi kay munduta jamatsishqa.Yarpayniyuq kashpanmi jana patsatapis kamashqa.
16 Pay mandaptinmi ciëlucho kaykaq yakupis qaparämun,pukutaypis patsapa kuchunpita sharkamun,tamyashqan höra elquypis atsikyämun,y wayrapis churaräkunanpita yarqamun.*
17 Runakunaqa lapanpis upano karmi imatapis mana tantiyakärintsu.Ïdulukunata rurashqanpitami penqakärinqa.Tsay ïdulukunaqa manami imatapis rurapäkuntsu.Runakuna yärakuptinpis manami yanapantsu.
18 Tsay ïdulukunaqa asipaypaqmi karkaykan.Tayta Dios castiganan junaqmi tsay ïdulukuna ushakanqa.
19 Jacob yärakushqan TAYTA DIOSQA manami ïdulukunanötsu kaykan.Paymi lapan imaykatapis kamashqa.Herencian kanantsipaqmi akramashqantsi.Jutinpis lapanta mandaq *Yahwehmi kaykan.
Tayta Diospa martillunno Babilonia runakuna kashqan
20 Mastapis Tayta Dios kaynömi nin:“Babilonia runakuna, qamkunaqa martillüno* y guërracho pelyapaq armänömi kaykanki.Qamkunawanmi nacionkunata y reykuna mandashqankunata ushakätsï.
21 Qamkunawanmi cawallukunatapis muntaraqnintinta y guërra carrëtakunata manijaqnintinta ushakätsï.
22 Qamkunawanmi ushakätsï runakunata, warmikunata, awkinkunata, wamrakunata, mözukunata y jipashkunatapis.
23 Qamkunawanmi ushakätsï uyshayuqkunata uyshantinta, törukunata barbichaqnintinta y autoridäkunata yanapaqnintinta.
Babilonia runakunata castigananpaq nishqan
24 “Babilonia runakunaqa *Sión runakunata pasaypami nakatsishqa. Tsayno nakatsishqantaqa kikikikunami rikashqanki. Tsaymi Babilonia runakunata pasaypa castigashaq. Noqa TAYTA DIOS karmi tsayno nï.
25 “Noqa TAYTA DIOSMI kayno nï:Babilonia nación, qamqa mikukuq jirkanömi kaykanki.Lapan nacionkunatami ushakätsinki.Tsaymi qampa contrayki kaykä.Jatun jirkata juchutsir ushakätsiqnömi qamtapis ushakätsishaykipaq.Ushakätsiptï ninawan rupashqa jirkanömi kankipaq.
26 Imayyaqpis chunyaq jirkalami kankipaq.Qamcho kaykaq rumikunata wayipa cimientunpaq ni perqananpaqpis manami pipis apanqatsu.Noqa TAYTA DIOSMI tsayno nï”.
27 ¡Babiloniaman pelyaq aywapäkunanpaq maytsaychöpis bandërata ichitsipäkutsun!¡Intëru nacioncho *cornëtata tukapäkutsun!¡Pelyapäkunanpaq lapan runakuna kamarikäritsun!¡Ararat, Mini y Askenaz nacionkunapis pelyaq aywapäkutsun!¡Pelyacho mandananpaq capitanta churapäkutsun!¡Muntädu aywaqkunapis atska chukluskunanöraq aywapäkutsun!
28 ¡Lapan nacionkunapis kamarikutsun atacaq yaykapäkunanpaq!¡Tsaynöpis Media nación reykuna, capitankuna, autoridäkuna y tsaycho kaykaq lapan runakuna pelyananpaq kamarikäritsun!
29 Babilonia runakunataqa yarpashqannölami TAYTA DIOS castiganqa.Tsaymi kay patsapis fiyupa mantsakushpan siksikyayta qalaykuykan.Babilonia nacionta ushakätsiptin manami pipis tsaycho tanqanatsu.
30 Babilonia soldädukuna manami pelyayta valuranqanatsu.Murallashqa markankunalachömi pakarpanqa.Kalpankunapis pasaypami ushakanqa.Warminömi pasaypa mantsakashqa rikakärinqa.Marka murällapa punkunkunata pakirmi contrankuna yaykapäkunqa.Yaykurirmi wayikunatapis rupatsir ushanqa.
31 Babilonia nacionpa mandaqnin reyta wilananpaqmi runakuna qatinaylanpa aywapäkunqa.Chayaykurmi wilanqa contrankuna vincir markanman yaykuykashqanta,
32 mayu pasakunan vädukunachöpis juntarpaykashqanta,amparakunan wayikunata kanaykashqantay lapan soldädunkunapis fiyupa mantsakashqa kaykashqanta.
33 Israel runakunata kuyaq y lapanta mandaq TAYTA DIOS kaynömi nin:“Babilonia nacionqa ëracho jarutsinanpaq qoturaykaq trïgunömi kaykan.Babilonia runakunata castiganäpaq kaq junaq chayamunqanami”.
34 Jerusalén runakunami kayno nipäkunqa:“Babilonia nacionpa mandaqnin rey Nabucodonosormi fiyu alquno kanimar ushakätsimashqa.Pasaypa pobritami kacharimashqa.Lamarcho mantsakuypaq pescädunömi ultakarkamashqa.Munashqan kaqta saksashqanyaq mikukarkamarmi gumitamashqa.
35 Noqakunata atacamashqannöla kikin Babilonia runakunatapis atacapäkutsun.Aylükunata wanutsishqannöla kikinkunatapis wanutsipäkutsun”.
36 Tsawraqa Jerusalén runakunata TAYTA DIOS kaynömi nin:“Noqa juzgashpämi contraykikunata fiyupa castigashaq.Paykunata castigashpämi nacionnincho kaq mayukunata y pukyukunatapis chipyaq tsakitsishaq.
37 Castigaptïmi Babilonia marka pasaypa juchushqa kanqa.Munti uywakunalanami tsaycho tanqa.Tsayta rikarmi runakuna espantashqa umanta awikärinqa.Manami pï runapis tsaycho tanqanatsu.
38 “Babilonia runakunaqa leonkuna qaparaqnöraqmi qaparpan.León malwakunanöraqmi waqapäkun.
39 Mikanaykashqan hörami paykuna mikunanpaq y upyananpaq churapäshaq.Tsaycho mikurkur y upyakurkurmi shinkashqa punukärinqa.Tsaypitaqa manami imaypis rikchamunqanatsu.*Noqa TAYTA DIOSMI tsayno nï.
40 Camalman pishtananpaq uywakunata apashqannömi Babilonia runakunatapis wanutsinäpaq apashaq.Uyshakunata, carnikunata y chïvukunata apashqannömi apashaq.
41 “¡Pïmaypis alabashqan Babilonia runakuna vincishqanami kanqa!Tsayno kaykaqta rikarmi lapan nación runakuna fiyupa espantashqa rikakärinqa.
42 Lamar yaku sharkur imaykatapis tsapakurkuqnömi Babilonia runakunata contrankuna ushakätsinqa.
43 Babilonia markakunapis chipyaqmi ushakanqa.Chunyaq jirkami rikakunqa.Tsaychöqa manami pipis tanqanatsu ni purinqanatsu.
44 “Babilonia runakunapa diosnin Beltapis castigashaqmi.Lapan mikushqankunatapis* gumitatsishaqmi.Tsaymi mayqan nación runakunapis tsay diosta adoraq mana aywanqanatsu.Babiloniapa murällankunapis chipyaqmi juchur ushakanqa.
45 “Kuyashqä runakuna, Babiloniapita qeshpikäriy.Kawayta munarqa imaykanöpapis qeshpikäriy.Pasaypa rabyarmi nina rupaqnöraq Babilonia runakunata ushakätsishaq.*
46 “Pïmaypis rimanqa autoridäkuna wanutsinakushqanpitami.Cada watami tsay rimashqankuna jukno jukno kanqa.Tsayno rimaptinpis ama mantsakäriytsu ni lakikäriypistsu.
47 “Babiloniacho ïdulukunata ushakätsinäpaq kaq junaq chayamunqanami.Tsay ïdulukunata ushakätsiptïmi intëru nación penqaypaq kanqa.Runakunapa ayankunapis markankunachömi jitarpanqa.
48 Norti kaq lädupita shamurmi Babilonia nacionta ushakätsinqa.Tsaymi jana patsapis, kay patsapis y kay patsacho lapan kaqkunapis kushikuypita cantapäkunqa.*Noqa TAYTA DIOSMI tsayno nï.
49 Babilonia runakuna tsayno ushakanqa Israel runakunata y juk lädu nación runakunatapis wanutsishqanpitami.*
50 “Wanuypita qeshpiq Judá runakuna, mana ichiypa Babiloniapita qeshpir aywakäriy.Nacionnikipita karucho karpis noqa TAYTA DIOSNIKITA yarparämanki.Jerusalén markata ama qonqapäkunkitsu.
51 Qamkunaqa pasaypa lakikurkaykanki Babilonia runakuna *santu templüman yaykur manakaqman churashqanpitami.Tukuyta ashlishuptikimi pasaypa penqakur umaykitapis shukutakurkaykanki.
52 Tsaymi noqa TAYTA DIOS kayno nï:Babiloniacho ïdulukunata ushakätsinäpaq walka junaqlanami pishiykan.Intëru markakunachömi runakuna nanaywan qaparpanqa.
53 Babilonia runakunaqa jana patsayaqmi marka murällanta sharkatsipäkushqa.Tsayno kaykaptinpis contrankunata kachashaq yaykuykur ushakätsinanpaqmi.Noqa TAYTA DIOSMI tsayno nï.
54 “Babilonia ushakashqanpita lakikur qaparpashqanmi maytsaychöpis mayakanqa.
55 Babilonia runakunata noqa TAYTA DIOSMI ushakätsishaq.Wayrawan atska yaku qaparaqnömi contrankuna qaparar ushakätsinqa.Cällikunacho ima büllapis manami kanqanatsu.
56 “Noqa TAYTA DIOSMI mana alikunata rurashqanman tupu lapanta castigashaq.Tsaymi Babilonia runakunatapis castiganäpaq contrankunata kachamushaq.Babiloniata atacarmi ali chölu soldädunkunatapis prësu tsarinqapaq.Flëchankunatapis pakirmi ushapäkunqapaq.
57 Babilonia runakunata castigashaq mandaqninkunata, yachaq runakunata, capitanninkunata, autoridäninkunata y soldädunkunatapis.Aytsayashqanyaq shinkashqano karmi punushqanpita imaypis mana rikchamunqanatsu”.Tsaynömi nin mandamaqnintsi rey.Jutinpis lapanta mandaq *Yahwehmi kaykan.
58 Lapanta mandaq TAYTA DIOS kaynömi nin:“Babilonia markapa murällan anchu kaptinpis chipyaqmi juchutsipäkunqa.Jatusaq punkunkunatapis rupatsirmi ushapäkunqa.Tsay markata mejorananpaq maytsay nación runakunata arutsishqanpis manakaqlapaqmi kanqa.Tsayjinanpa arushqantapis ninami rupar ushanqa”.
Jeremías qelqashqanta Babiloniaman apashqan
59 Juk runami karqan Seraías jutiyuq. Payqa karqan Neríaspa tsurin y Maasíaspa wilkanmi. Seraíasqa rey Sedequíaspa yanapaqninmi karqan. Tsaymi rey Sedequías Seraíasta pushakurkur Babiloniaman aywarqan. Tsayno aywarqan Judá nacioncho Sedequías chusku watana rey kaykarmi.
Seraíastami profëta Jeremías juk rölluta apatsirqan.
60 Tsay apatsishqan röllumanmi Jeremías qelqarqan Babilonia nacionta ima desgracia pasananpaq kashqantapis. Babiloniata ima pasananpaq Jeremías lapan nishqankunapis tsay rölluchömi qelqaraykarqan.
61 Apatsirmi Seraíasta Jeremías kayno nirqan: “Babiloniaman chayaykur kay rölluta mana qonqaypa fuerti liyipanki.
62 Liyiparkur Tayta Diosta manakur kayno ninki: ‘TAYTA DIOS, qammi nishqanki kay nacionta ushakätsinaykipaq kashqanta. Tsaymi runapis ni ima uywapis kaycho kanqanatsu. Pasaypa chunyaqmi imayyaqpis kanqa’.
63 “Liyiyta usharkur kay rölluta rumiman watarkur Éufrates mayuman jitarinki.
64 Jitarirna kayno ninki: ‘Kay jitarishqä röllu talpukar elqaqnömi Babiloniapis elqanqa. Tayta Dios castigaptinqa manami yapay imaypis kanan kashqanno kanqanatsu’ ”.*
Kayyaqlami qelqaraykan Jeremías wilakushqankuna.
Ichic wilacuycuna
^ 51.4 Hebreo idiömachöqa Caldea ninmi. Caldeaqa Babiloniapa jukaq jutinmi kaykan.
^ 51.6 Isa. 48.20; Jer. 50.8; 51.45; Apoc. 18.4.
^ 51.7 Apoc. 17.2-4; 18.3.
^ 51.8 Apoc. 18.2.
^ 51.9 Apoc. 18.5.
^ 51.13 Apoc. 17.1.
^ 51.16 Sal. 135.7.
^ Yahweh Yahwehtami wakin traduccionkuna castellänucho traducin Jehová nir, wakinmi traducin Yavé nir, wakinmi traducin Yahweh nir y wakinnami traducin EL SEÑOR nir. Quechua Bibliachöpis Yahweh atska kutimi traduciraykan TAYTA DIOS nir.
^ 51.20-23 Jer. 50.23.
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
^ cornëta Cornëtaqa carnipa waqranpita rurashqami karqan. Cornëtata cüra tukashqanta rikanaykipaq rikanki Lev. 25.9 versïculucho kaykaq dibüjuta. Qellaypita rurashqa cornëtapis karqanmi (Núm. 10.1-10).
^ 51.39 Mikunanpaq y shinkashqa punukunanpaq parlarqa guërracho wanunanpaqmi parlarqan.
^ 51.44 Babilonia runakunapa diosnin Bel mikushqankunapita parlarqa Babilonia runakuna juk lädu nacionkunapita suwakur apakushqankunapitami parlaykan.
^ 51.45 Isa. 48.20; Jer. 50.8.
^ 51.48 Apoc. 18.20.
^ 51.49 Apoc. 18.24.
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ Yahweh Yahwehtami wakin traduccionkuna castellänucho traducin Jehová nir, wakinmi traducin Yavé nir, wakinmi traducin Yahweh nir y wakinnami traducin EL SEÑOR nir. Quechua Bibliachöpis Yahweh atska kutimi traduciraykan TAYTA DIOS nir.
^ 51.63-64 Apoc. 18.21.
