Josué 10:1-43
10 Jerusalén markapa mandaqnin rey Adonisedecmi mayarqan Jericó markata y mandaqnin reyta ushakätsishqannöla Hai markatapis y mandaqnin reytapis Josué ushakätsishqanta. Tsaynöpis mayarqan Gabaón runakunawan ali kawananpaq Israel runakuna *pactu rurashqanta.
2 Gabaón markaqa Hai markapitapis mas jatun karmi rey tashqan markano karqan. Tsaycho taq runakunapis ali chölumi karqan. Tsaymi Israel runakuna atacaptin Gabaón runakuna yanapananpaq kashqanta yarpar Adonisedec y Jerusaléncho taq runakunapis pasaypa mantsakarqan.
3 Tsaymi Jerusalén markapa mandaqnin rey Adonisedecqa propiuta kacharqan Hebrónpa mandaqnin rey Hohamman, Jarmutpa mandaqnin rey Pireamman, Laquispa mandaqnin rey Jafíaman y Eglónpa mandaqnin rey Debirman. Chayaykurmi kachashqan runakuna kayno nipäkurqan:
4 “Gabaón runakunami Israel runakunawan y mandaqnin Josuéwan ali kawananpaq pactuta rurashqa. Tsawraqa shamur yanapaykalämay Gabaón runakunata ushakätsinantsipaq”.
5 Tsayno niptinmi Jerusalén markapa, Hebrón markapa, Jarmut markapa, Laquis markapa y Eglón markapa pitsqan mandaqninkuna soldädunkunawan juntakaykur aywapäkurqan Gabaón markata ushakätsinanpaq. Tsay reykunaqa amorreo runakunapa mandaqnin reykunami karqan.
6 Tsayta musyaykurmi Gabaón markacho taq runakunapis propiuta Gilgalman kacharqan Josuéta wilananpaq. Chayaykurmi kayno nir ruwakärirqan: “Jalqakunacho taq amorreo runakunapa mandaqnin reykunami soldädunkunawan juntakämushqa ushakätsimänanpaq. Ashmayniki karkaykaptïqa mana ushakätsimänanpaq jukla shamur yanapaykalämay”.
7 Tsayno niptinmi Josuéqa Gilgalpita jukla aywarqan ali chölun kaq soldädunkunata pushakurkur.
8 Aywapäkuptinmi Josuéta TAYTA DIOS kayno nirqan: “Gabaón markata atacaq runakunata ama mantsakuytsu. Ichipänaykipaq yanapaptï manami mayqanpis ichipäshunkipaqtsu”.
9 TAYTA DIOS tsayno niptinmi Gilgalpita warayta* aywaykur elaqpita amorreo runakunata Israel runakuna atacarqan.
10 Tsayno atacaptinmi amorreo runakunapa shonqunman pasaypa mantsakuyta TAYTA DIOS churarqan. Tsaynöpami Israel runakuna tsaytsika runakunata Gabaóncho wanutsipäkurqan. Wakintanami qeshpiykaqta qatipaykur Bet-horónpa aywaq nänicho wanutsipäkurqan. Bet-horónpitanami wakintapis wanutsipäkurqan hasta Azecayaq y Macedayaq.
11 Amorreo runakuna Bet-horónpita uraypa Azecayaq qeshpiykaptinmi rumi tsikasaq runtu tamyata TAYTA DIOS tamyatsimurqan. Tsay tamyawanmi Israel runakuna espädawan wanutsishqanpitapis mas atska runakuna wanupäkurqan.
12 Amorreo runakunata ushakätsinanpaq TAYTA DIOS yanapashqan junaqmi lapan Israel runakunapa nawpancho TAYTA DIOSTA manakur Josué kayno nirqan: “Gabaón marka janancho intita takyakätsiy. Tsaynöpis Ajalón pampa janancho killata takyakätsiy”.
13 Josué tsayno manakuptinmi intipis y killapis mana kuyukurqantsu contran runakunata Israel runakuna wanutsir ushakätsishqanyaq. Jaser libruchöpis* tsayno pasashqanmi qelqaraykan. Pulan ciëluchömi cäsi juk junaq qoyayta inti takyararqan.
14 Tsay junaq intita takyatsishqannöqa manami pï runa manakuptinpis TAYTA DIOS takyatsishqatsu. Tsay junaqmi Israel runakunata TAYTA DIOS yanaparqan contrankunata ushakätsinanpaq.
15 Tsaypitanami Josuéwan Israel runakuna kutipäkurqan Gilgal campamentunman.
Pitsqan reykunata Josué wanutsishqan
16 Amorreo runakunapa pitsqa mandaqnin reykunami qeshpir pakakuykurqan Macedacho kaykaq machayman.
17 Machaycho pakarpaykashqanta wilapäkuptinmi
18 Josué kayno nirqan: “Jatusaq rumikunawan machay punkuta tsaparkur runakunata churapäkuy täpananpaq.
19 Mana täpaq kaqkunaqa contrantsi runakunata qatipaykur wanutsipäkuy. TAYTA DIOSNINTSI makintsiman churaykämuptinqa markankunaman mana kutinanpaq lapanta wanutsipäkuy”.
20 Tsawraqa amorreo runakunata Josué y Israel runakuna vincishpan atskata wanutsipäkurqan. Juk ishkaylanami qeshpir amparakurqan corralashqa markankunaman.
21 Tsayyaqmi Josué shuyararqan Macedacho kaykaq campamentucho. Wanutsiyta usharkurmi Israel runakunaqa Josué kaykashqanman lapan sänu kutipäkurqan. Tsaypitaqa manami pipis Israel runakunapa contran rimarqannatsu.
22 Lapan chayaptinmi Josué kayno nirqan: “Machay punkuta kicharir pitsqan reykunata apamuy”.
23 Tsayno niptinmi machaypita jorqapäkamurqan Jerusalén markapa, Hebrón markapa, Jarmut markapa, Laquis markapa y Eglón markapa mandaqnin reykunata.
24 Chayaykatsiptinnami Israel runakunata qayaykatsir mandaq soldädukunata Josué kayno nirqan: “Kay reykunapa kunkanta jarupäkuy”.
Tsawraqa nishqannölami rurapäkurqan.
25 Nirkurmi Josué kayno nirqan: “TAYTA DIOS kanan junaq ushakätsishqannölami lapan contrantsikunata ushakätsinqapaq. Tsayno kaykaptinqa pitapis ama mantsakäriytsu”.
26 Tsaypitanami Josuéqa tsay reykunata wanurkatsir ayanta tardiyaq qerucho warkurätsirqan.
27 Inti jeqaykaptinnami qerukunacho warkuraykaqta jorqarkatsir pakakushqan machaylaman jitatsirqan. Nirkurmi jatunkaray rumikunawan tsapaykatsirqan. Tsayqa kananyaqpis jinalami kaykan.
Wakin markakunata Israel runakuna ushakätsishqan
28 Maceda markacho taq runakunata y mandaqnin reytapis tsay junaqlami Josuéqa soldädunkunawan aywar espädawan wanutsipäkurqan. Jericócho taq runakunata y mandaqnin reyta wanutsishqannömi tsaycho taq runakunatapis lapanta wanutsipäkurqan.
29 Tsaypitanami Israel runakunawan Josué aywaykur Libna markata atacarqan.
30 Tsaychöpis vincinanpaq TAYTA DIOS yanapaptinmi tsaycho taq runakunata y mandaqnin reyta asulapäkurqan. Jericócho taq runakunata y mandaqnin reyta wanutsishqannömi tsaycho taq runakunatapis wanutsipäkurqan.
31 Libnapitanami Israel runakunawan Josué aywarqan Laquis markaman. Nirkurmi cercancho campamentunta ruraykur atacaq yaykapäkurqan.
32 Atacashqanpita juk junaqtami Laquis markacho taq runakunata y mandaqnin reytapis Israel runakunapa makinman TAYTA DIOS churarqan. Tsaymi tsaycho taykaqkunataqa Libnacho rurashqannöla lapan runakunata y uywakunatapis Israel runakuna wanutsirqan.
33 Atacaykashqanta musyaykurmi Gezer markapa mandaqnin rey Horam soldädunkunawan aywarqan Laquischo taqkunata yanapananpaq. Jina kaqtami Josuépa soldädunkunaqa lapanta wanutsipäkurqan.
34 Laquis markapitanami Josuéqa Israel runakunawan aywarqan Eglón markaman. Cercancho campamentunta ruraykurmi paykunatapis atacarqan.
35 Laquischo runakunata y uywakunata wanutsishqannölami tsaychöpis tsay junaqla lapanta espädawan wanutsipäkurqan.
36 Eglón markapitanami Israel runakunawan Josué aywaykur Hebrón* markata atacarqan.
37 Tsay markachöpis Eglón markacho ushashqannölami lapanta espädawan wanutsipäkurqan. Tsaymi reyta, markacho taq runakunata y caseriunkunacho taq runakunatapis lapanta wanutsiptin pipis karqannatsu.
38 Tsaypita aywar Debir* markata Israel runakunawan Josué atacarqan.
39 Tsaychöpis Hebróncho y Libnacho wanutsishqannölami Debir markapa mandaqnin reyta, tsaycho taq runakunata y caseriunkunacho taq runakunatapis lapanta espädawan wanutsipäkurqan.
40 Yärakushqan TAYTA DIOS nishqannölami Israel runakunawan Josué wanutsipäkurqan jalqakunacho taq runakunata y mandaqnin reykunata, *Neguevcho taq runakunata y mandaqnin reykunata, *Sefelacho taq runakunata y mandaqnin reykunata y Jordán mayu pampakunaman aywaq bajädacho taq runakunata y mandaqnin reykunatapis.* Tsaymi paykuna tashqanqa lapanpis Israel runakunapaqna karqan.
41 Tsay runakunatami wanutsipäkurqan Cades-barneapita hasta Gazayaq y Gosénpita hasta Gabaónyaq.
42 Israel runakuna yärakushqan TAYTA DIOS yanapaptinmi campamentuman mana kutiylapa lapan tsay runakunata ushakätsirqan.
43 Tsaypitanami Gilgalcho kaykaq campamentuman Israel runakunawan Josué kutikurqan.
Ichic wilacuycuna
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ 10.9 Wakin runakunaqa warati nipäkun.
^ 10.13 Jaser libruqa manami Bibliatsu kaykan, sinöqa juk librumi. Tsay libruqa unaynami oqrakashqa (2Sam. 1.18).
^ 10.36 Jos. 15.13; Jue. 1.10.
^ 10.38 Jos. 15.15; Jue. 1.11.
^ Neguev Neguevqa Israel nacionpa sur kaq lädunchömi kaykan. Neguevcho kaykan Beerseba, Siclag, Gerar y Arad markakunami. Neguevcho shumaq mana tamyaptinmi aläpaqa mana murukärintsu. Tsaymi tsay partichöqa uyshata y cabrata ashmakular täkärin (Gén. 24.62; Núm. 13.17; Jos. 11.16).
^ Sefela Sefelaqa Israel nacioncho jirkan jirkan partimi kaykan. Sefelapita inti jeqanan lädupami Mediterraneo lamar kaykan. Sefelapita inti jeqamunan lädupanami jirkakuna kaykan. Norti lädupita sur kaq läduyaqmi Sefela kaykan chusku chunka pitsqa kilömetruno. Inti jeqamunan lädupita inti jeqanan läduyaqmi chunka soqta kilömetruno kaykan. Sefelacho chakrakuna ali kaptinmi mikuykuna ali wayun. Filisteo runakunawan pelyarmi Israel runakuna Sefelacho kaykaq markakunata y chakrakunata qechunakärirqan (Jos. 10.40; 12.8; 1Rey. 10.27; 2Crón. 28.18).
