Josué 12:1-24
12 Jordán mayuta manaraq tsimparmi ishkay reykunata wanutsir nacionninkunata Israel runakuna tsarikarkärirqan. Tsay reykunaqa mandarqan Arnón mayupita hasta Hermón puntayaqmi. Tsay karqan *Arabá pampa tsimpan inti jeqamunan kaq lädupami.
2 Juk wanutsishqan rey karqan amorreo runakunapa mandaqnin Sehón. Payqa Hesbónchömi tarqan. Rey Sehónqa mandarqan Arnón mayu nawpancho kaykaq Aroerpita patsa hasta Jaboc mayuyaqmi. Jaboc mayu amonita runakunapa lindërun kaptinmi pulan Galaadpis paypa munaynincho karqan.
3 Tsaynöpis Sehónpa munayninchömi karqan Jordán mayu nawpan pampakuna Cineret qochapita* patsa hasta Arabá Lamaryaq (Arabá Lamarqa *Kachi Lamarmi kaykan) y Bet-jesimotpita sur kaq lädupa aywar hasta Pisga nishqan punta chakinyaq. Tsaykuna karqan Arabá pampa tsimpan inti jeqamunan kaq läduchömi.
4 Jukaq wanutsishqan reynami karqan Basán partipa mandaqnin rey Og. Paylanami karqan refaíta runaqa. Og tarqan Astarotcho y Edreichömi.
5 Ogpa munayninchömi karqan Hermón puntapita hasta Salcayaq, intëru Basán partipita hasta Gesur lindëruyaq y Maaca lindëruyaq. Pulan Galaadpis Hesbóncho taq rey Sehónpa lindërunyaq paypa munayninchömi karqan.*
6 Tsay ishkay reykunatami TAYTA DIOSPA sirviqnin Moisés Israel runakunawan vincirqan. Nirkur tsay partikunatami posisionta aypurqan Rubén trïbuta,* Gad trïbuta y pulan Manasés trïbuta.
Josué wanutsishqan reykuna pï kashqanpis
7 Israel runakunawan Jordán mayuta tsimparkur atska reykunatami Josué wanutsirqan. Tsay reykuna mandashqan partikuna karqan Líbano pampacho kaq Baal-gadpita hasta Seir partiman aywaq Halac puntayaqmi. Tsay partikunata Israel trïbukunata Josué aypurqan posisionta.
8 Tsaymi Israel runakuna chaskishqan partikuna karqan jalqakuna kashqan partikuna, *Sefela, *Arabá pampa, lamar kuchun pampakuna, chunyaq tsaki partikuna y *Neguevpis. Tsay partikunaqa karqan heteo runakunapa, amorreo runakunapa, cananeo runakunapa, ferezeo runakunapa, heveo runakunapa y jebuseo runakunapami.
9 Wanutsishqan reykuna karqan:Jericó markapa mandaqnin rey,Bet-elpa nawpancho kaykaq Hai markapa mandaqnin rey,
10 Jerusalén markapa mandaqnin rey,Hebrón markapa mandaqnin rey,
11 Jarmut markapa mandaqnin rey,Laquis markapa mandaqnin rey,
12 Eglón markapa mandaqnin rey,Gezer markapa mandaqnin rey,
13 Debir markapa mandaqnin rey,Geder markapa mandaqnin rey,
14 Horma markapa mandaqnin rey,Arad markapa mandaqnin rey,
15 Libna markapa mandaqnin rey,Adulam markapa mandaqnin rey,
16 Maceda markapa mandaqnin rey,Bet-el markapa mandaqnin rey,
17 Tapúa markapa mandaqnin rey,Hefer markapa mandaqnin rey,
18 Afec markapa mandaqnin rey,Sarón markapa mandaqnin rey,
19 Madón markapa mandaqnin rey,Hazor markapa mandaqnin rey,
20 Simron-merón markapa mandaqnin rey,Acsaf markapa mandaqnin rey,
21 Taanac markapa mandaqnin rey,Meguido markapa mandaqnin rey,
22 Cedes markapa mandaqnin rey,Carmelucho kay
23 Dor provinciacho kaykaq Dor markapa mandaqnin rey,Gilgalcho kaykaq Goim markapa mandaqnin rey
24 y Tirsa markapa mandaqnin rey.
Tsay lapan wanushqan reykuna karqan kimsa chunka jukmi (31).
Ichic wilacuycuna
^ Arabá Arabáqa jatun pampami kaykan. Galilea qocha sur kaq kuchunpitami qalaykun. Tsaypita sur kaq lädupami Jordán mayu kuchunkunapa Kachi Lamaryaq pasan. Kachi Lamarpitanami Puka Lamarcho kaq Golfo de Acabayaq chayan. Arabápa anchunmi chunka kilömetruno kaykan. Largunnami kimsa pachak ishkay chunka (320) kilömetruno kaykan. Arabápa ishkan lädupa jirkakuna kaptinmi tsaki kaykan. Norti kaq lädu chakrakunatami Jordán mayu yakuwan parqupäkun. Sur kaq lädu chakrakunatami itsanqa yaku mana kaptin mana parqupäkuntsu (Deut. 1.7; 2.8; 3.17; 4.49).
^ 12.3 Cineret qochaqa Galilea qochami kaykan.
^ Kachi Lamar Kachi Lamarqa (Gén. 14.3; Núm. 34.3) chusku pachak ishkay kimsa (423) metru bajo el nivel del marmi kaykan. Anchunmi chunka pusaq kilömetru kaykan y largunnami pusaq chunka (80) kilömetru. Kachi Lamarmanqa Jordán mayumi yaykuykan. Maypapis yaku mana yarquptinmi tsay lamarqa pasaypa pochquq kaykan. Tsaymi ima jachapis ni ima pescädupis tsaycho kantsu. Kachi Lamarpa jukaq jutinmi kaykan Arabá Lamar (Deut. 3.17; Jos. 3.16) y jukaq jutinnami kaykan inti jeqamunan kaq lädu qocha (Eze. 47.18; Zac. 14.8). Kananqa runakuna reqipäkun Mar Muerto jutiwanmi.
^ 12.5 Núm. 21.21-35; Deut. 2.26—3.11.
^ 12.6 Núm. 32.33; Deut. 3.12.
^ Sefela Sefelaqa Israel nacioncho jirkan jirkan partimi kaykan. Sefelapita inti jeqanan lädupami Mediterraneo lamar kaykan. Sefelapita inti jeqamunan lädupanami jirkakuna kaykan. Norti lädupita sur kaq läduyaqmi Sefela kaykan chusku chunka pitsqa kilömetruno. Inti jeqamunan lädupita inti jeqanan läduyaqmi chunka soqta kilömetruno kaykan. Sefelacho chakrakuna ali kaptinmi mikuykuna ali wayun. Filisteo runakunawan pelyarmi Israel runakuna Sefelacho kaykaq markakunata y chakrakunata qechunakärirqan (Jos. 10.40; 12.8; 1Rey. 10.27; 2Crón. 28.18).
^ Arabá Arabáqa jatun pampami kaykan. Galilea qocha sur kaq kuchunpitami qalaykun. Tsaypita sur kaq lädupami Jordán mayu kuchunkunapa Kachi Lamaryaq pasan. Kachi Lamarpitanami Puka Lamarcho kaq Golfo de Acabayaq chayan. Arabápa anchunmi chunka kilömetruno kaykan. Largunnami kimsa pachak ishkay chunka (320) kilömetruno kaykan. Arabápa ishkan lädupa jirkakuna kaptinmi tsaki kaykan. Norti kaq lädu chakrakunatami Jordán mayu yakuwan parqupäkun. Sur kaq lädu chakrakunatami itsanqa yaku mana kaptin mana parqupäkuntsu (Deut. 1.7; 2.8; 3.17; 4.49).
^ Neguev Neguevqa Israel nacionpa sur kaq lädunchömi kaykan. Neguevcho kaykan Beerseba, Siclag, Gerar y Arad markakunami. Neguevcho shumaq mana tamyaptinmi aläpaqa mana murukärintsu. Tsaymi tsay partichöqa uyshata y cabrata ashmakular täkärin (Gén. 24.62; Núm. 13.17; Jos. 11.16).
