Levítico 13:1-59
13 Moisésta y Aarónta TAYTA DIOS kayno nirqan:
2 “Pipapis qaran jakaptin, chupu pashtaptin, qarancho yoraq yoraq yuriptin, *lepra niraq qeri yuriptinqa cüra Aarónman karpis o paypita miraq cüraman karpis apanqa.
3 Cüranami rikanqa runapa qarancho kaykaq qerita. Qerincho kaykaq aqtsa yoraqashqa kaptin y qerin uchkukaptinqa leprami kanqa. Tsayno kaptinqa cüranami ninqa tsay runa *impüru kashqanta.
4 “Pipapis qaran yoraqashqa kaptin qerin mana uchkukaptin o aqtsanpis mana yoraqaptinqa qanchis junaqyaqmi cüra wichqarätsinqa.
5 Qanchis junaqchöna yapay rikanqa. Qeri mana miraptinqa yapay qanchis junaqyaq wichqarätsinqa.
6 Qanchis junaqcho qerin tsakipaykaqta rikarqa musyanqa leprapa trukan qerila kashqanta. Tsaymi röpanta tsay qeshyaq taqshakuriptin cüra ninqa püruna kashqanta.
7 “Püru kashqanta cüra nishqanpitaraq qerin miraptinqa cüraman kutinqa rikananpaq.
8 Qeri miraptin qaran yoraqashqa kaykaqta rikarmi cüra tantiyanqa leprawan qeshyaykashqanta. Tsaymi tsay runa impüru kashqanta ninqa.
9 “Pitapis lepra qeriwan kaykaqta rikarqa cüraman apanqa.
10 Cüranami imano kashqantapis rikanqa. Qaran jakashpan aqtsan yoraqaykaqta o qeri yuriykaqta rikaptinqa
11 lepranami kanqa. Tsayta rikarmi cüra ninqa impüruna kashqanta. Impüru kashqanta tantiyarqa amana wichqarätsinqanatsu.
12 “Chaki puntanpita uma pukshunyaq tsay runacho lepra mirashqanta cüra rikarmi
13 aliyashqanta o mana aliyashqantapis shumaq tantiyanqa. Yoraqayparaq intëru cuerpun tsakipashqa kaptinqa aliyashqanta tantiyanqa. Tsaymi püruna kashqanta ninqa.
14 Yapay qeri yuriptinmi itsanqa impüru kashqanta ninqa.
15 Cüra tsayno ninqa qeri imanöpis kaykashqanta rikaykur. Qeri kaptinqa lepranami kanqa.
16 “Tsay qeri tsakipaypa yoraqaptinqa cüraman yapay kutinqa.
17 Qeri tsakipashpan yoraqashqanta rikarqa cüra ninqa püruna kashqantami.
18 “Pipapis qerin aliyaykashqanpita
19 jakaptin o pukayaptinqa cüraman aywanqa rikananpaq.
20 Qerin uchkukashqa kaykaqta rikar o aqtsanpis yoraqashqa kaykaqta rikarqa impüru kashqantami cüra ninqa. Tsayno karqa leprami kaykan.
21 Qerin aliyar mana uchkukaptin y aqtsanpis mana yoraqaptinqa qanchis junaqmi tsay runata wichqarätsinqa.
22 Qerin miraptinqa impüru kashqantami cüra ninqa. Tsay qeriqa lepranami kaykan.
23 Qerin mana miraptinmi itsanqa siralan kashqanta musyanqa. Tsayno kaptinqa püru kashqantami cüra ninqa.
24 “Pipis rupakuptin qaran yoraqaptin o pukayaptinqa
25 cürami rikanqa. Rupakushqancho aqtsa yoraqaptin y qerin uchkukaptinqa leprami kanqa. Tsayta rikarqa cüra ninqa leprawan qeshyar impüru kashqantami.
26 Rupakushqancho aliyaykashpan aqtsanpis mana yoraqaptin y qerin mana uchkukar tsakipaptinqa qanchis junaqmi cüra wichqarätsinqa.
27 Qanchis junaqchöna cüra yapay rikanqa. Tsaycho qeri antsaykaqta rikarqa impüru kashqantami ninqa. Tsawraqa lepranami kanqa.
28 Aliyarqa manami lepratsu kanqa, sinöqa rupakushqan siralami. Tsaymi cüra ninqa püruna kashqanta.
29 “Olqupa o warmipa umancho o tsakalwancho qeri kaptin
30 cürami shumaq rikanqa. Qeri uchkukaptin y qericho kaq aqtsan qarwashtaptinqa tsay runa o tsay warmi impüru kashqanta cüra ninqa. Umancho o tsakalwancho karpis tsay qeriqa leprami kanqa.
31 Tsay qeri mana uchkukaptin y qarancho yana aqtsa mana kaptinqa qeshyaykaq runata qanchis junaqyaq wichqarätsinqa.
32 “Qanchis junaq wichqararkatsir yapaymi cüra rikanqa aliyashqanta o mana aliyashqantapis. Qeri mana miraptin, aqtsan mana qarwashtaptin y aytsan mana uchkukaptinqa
33 qeri nawpancho kaq aqtsata rutukunanpaq cüra ninqa. Qeri kaykashqanta itsanqa ama rutunqatsu. Nirkur qanchis junaq yapay wichqarätsinqa.
34 Tsaypita qerita yapay cüra rikanqa. Qeri mana miraptin y mana uchkukaptinqa tsay runa püru kashqantami ninqa. Röpankunata taqshakurir pürunami kanqa.
35 “Püru kashqanta nishqanpitaraq tsay qeri miraptinqa
36 cüra yapay rikanqa. Qeri miraykashqanta rikarqa aqtsan qarwashtashqanta manami ashinqanatsu. Tsay runataqa impüru kashqantami ninqa.
37 Qeri tsakipaptin y yana aqtsana winaptinqa qeri aliyaykashqanta musyanqa. Tsayno kaptinqa qeriwan qeshyaq runata püru kashqantami cüra ninqa.
38 “Olqucho o warmicho kancha yuriptinqa
39 ima kashqantapis musyananpaq cüra rikanqa. Oqi oqi karqa kanchalami kanqa. Tsayno kaptinqa tsay runa o warmi pürumi kanqa.
40 “Pipapis aqtsan ushakaptin sepla rikakurpis pürumi kanqa.
41 Urkulanpa aqtsan ushakaptin paqla rikakurpis pürumi kanqa.
42 Sepla kaptinpis o paqla kaptinpis pukaypa pukar qeri yuriptinqa lepranami kanqa.
43 Tsayno kaptin cüra rikanqa. Cuerpucho lepra yurishqanno yoraqayparaq qeri jakaptinqa
44 tsay runapa umancho lepranami kanqa. Tsawraqa impüru kashqantami cüra ninqa.
45 “Leprawan qeshyaqqa röpanta rachirir qara umala qaqlanta tsapakurkur qaparashpan kayno nir purinqa: ‘¡Impürumi kä, impürumi kä!’
46 Tsay runaqa lepra aliyänanyaq impürumi kanqa. Tsayno karqa aliyänanyaq campamentupita juk läducho tanqa.
47 “Milwapita o lïnupita awashqa röpacho karpis,
48 milwapita o lïnupita awashqacho karpis, qaracho karpis, o qarapita rurashqacho karpis
49 mupaliqno verdiyaypa y pukayaypa yurirqa leprami kanqa. Tsayno kaptin cürata rikatsinqa ima kashqantapis tantiyananpaq.
50 Cüraqa shumaq rikaykur mupalishqa kaptin qanchis junaq wichqaykunqa.
51 Qanchis junaq cumplirkuptin yapay rikanqa imano kaykashqantapis musyananpaq. Röpacho karpis, awacho karpis, qaracho karpis, qarapita rurashqacho karpis mupalishqan mas miraptinqa mana aliyaq leprami kanqa. Tsaykunaqa impürunami kanqa.
52 Manana aliyaq lepra kaptin rupatsinki röpa kaptinpis, awa kaptinpis, qara kaptinpis o qarapita rurashqa kaptinpis.
53 Mupalishqan manana miraptinmi itsanqa
54 taqsharkatsir qanchis junaqyaq yapay wichqaykunqa.
55 “Taqsharkatsir wichqarätsishqantami cüra yapay rikanqa. Mupalishqan mana elqaptinqa impürumi kanqa. Tsaymi jananpa o rurinpa mupalishqa kaptinqa rupatsinqa.
56 Taqshashqanpitaraq cüra rikaptin manchala quëdaptinqa rachiypa jorqurinqa röpapita kaptinpis, qarapita kaptinpis o awapita kaptinpis.
57 Rachir jorqushqanpitaraq röpacho karpis, awacho karpis, qarapita rurashqancho karpis yapay mupaliptinqa lapanta rupatsinqa.
58 Röpata, awata, qarapita rurashqata taqshariptin mupalishqan elqaptinqa yapay taqshanqa. Tsaypitaqa pürunami kanqa.
59 “Lepra yuriptin tsay leykuna nishqannömi ruranqa röpacho kaptinpis, milwacho kaptinpis, lïnucho kaptinpis, awacho kaptinpis o qarapita rurashqacho kaptinpis. Imanöpis kaykashqanta rikaykurmi püru kashqanta o impüru kashqantapis cüra ninqa”.
Ichic wilacuycuna
^ lepra Lepra qeshyaqa runapa qarancho tukuy casta qerikunami karqan. Israel nacioncho lepra qeshyawan qeshyaykaqkunaqa markapita juk läduchömi täkäriq (Lev. 13.45-46). Paykunataqa runakuna manami yataylapis yataqtsu (Lev. 22.5). Tsayno kaptinpis Jesucristo munayniyuq karmi leprawan qeshyaykaqkunata yataykur aliyätsirqan (Mar. 1.40-43).
