Levítico 2:1-16
2 “ ‘Pipis TAYTA DIOSPAQ tsaki mikuy ofrendata apamurqa alinnin kaq harinata apamunqa. Tsay harinaman winapänanpaq aceitita y inciensutapis apamunqa.
2 Tsay apamushqantami Aarónpita miraq cürakunata entreganqa. TAYTA DIOS imaypis yarparänanpaqmi aceitiwan ushmashqa kaykaq juk aptay harinata inciensuntawan takurkatsir *altarcho cüra rupatsinqa. Rupatsishqanpa ali asyayninta* mayarmi TAYTA DIOS kushikunqa.
3 Rupatsishqanpita putsuq kaqmi *sagrädu kar Aarónpaq y paypita miraq cürakunapaq kanqa.
4 “ ‘Hornucho kuwarkur tsaki mikuy ofrendata apamurqa alinnin kaq harinapita aceitiwan masararkur levadüraynaqta apamunki. Tsayta mana apamurqa levadüraynaq lapsha tantata rurarkur aceitiwan lushiparkur apamunki.
5 “ ‘Sartincho ankarkur tsaki mikuy ofrendata apamurqa alinnin kaq harinapita rurashqa tantata apamunki. Itsanqa levadüraynaqta aceitiwan tsapunki.
6 Tsay ofrendata atskaman pakirir aceitita jananman winapanki. Tsayqa tsaki mikuy ofrendami kaykan.
7 “ ‘Caserölacho ankarkur tsaki mikuy ofrendata apamurqa alinnin kaq harinapita aceitiwan rurashqa tantata apamunki.
8 “ ‘Tsay ofrendakunata kamarirkur TAYTA DIOSPAQ apamurmi cürata entreganki. Paynami altarman apanqa.
9 TAYTA DIOS imaypis yarparänanpaqmi walkalata altar janancho rupatsinqa. Rupatsishqanpa ali asyayninta mayarmi TAYTA DIOS kushikunqa.
10 Rupatsishqanpita putsuq kaqmi lapan apamushqan ofrendapitapis mas sagrädu kanqa. Tsay putsuqkuna kanqa Aarónpaq y paypita miraq cürakunapaqmi.
11 “ ‘Tsaki mikuy ofrendata altarcho TAYTA DIOSPAQ rupatsishpayki ama takutsinkitsu levadürawan. Imaypis TAYTA DIOSPAQ ama rupatsinkitsu levadürata ni abëjapa mishkintapis.
12 *Primicia kaptinmi itsanqa levadürawan y abëjapa mishkinwan takushqatapis TAYTA DIOSPAQ apamunki. Apamuptikipis altarcho ama rupatsinqatsu.
13 “ ‘Tsaki mikuypita ofrendata rurarqa kachiyuqta ruranki*. Kachiynaqtaqa ama imatapis rurankitsu. Kachiqa qamkunawan TAYTA DIOS *pactu rurashqantami yarpätsishunki. Tsayno kaptinmi ima ofrendamanpis kachita winanki.
14 “ ‘Tsaki mikuykunapita primiciata TAYTA DIOSPAQ apamurqa aqarkur ankashqata apamunki.
15 Tsayman aceitita y inciensuta winapanki. Tsayqa tsaki mikuy ofrendami kaykan.
16 TAYTA DIOS imaypis yarparänanpaqmi tsay apamushqan tsaki mikuyta y aceitita walkalata cüra rupatsinqa. Tsaynölami apamushqan inciensutapis rupatsinqa.
Ichic wilacuycuna
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 2.2 Wakin runakunaqa mushkuyninta nipäkun.
^ sagrädu Liyinki santupita tantiyatsikuyta.
^ primicia Primiciaqa kaykan Israel runakuna qechpa kaqkunata y chakrancho punta poquqkunata Tayta Diospaq apashqanmi (Éxo. 23.19; Lev. 2.11-12; Deut. 14.23; 18.3-4; 26.1-11; 2Crón. 31.11-12; Neh. 10.35-37; 12.44; Eze. 44.30; Rom. 8.23; Apoc. 14.4).
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
